Тюку по’ ӈарка пэвдэй ирий’ мат’’яӈганя толыркана ненэцие’’ паднана Василий Николаевич Ледков сидндет ю’’ пода пангусь. Тарця ялян’ паднана нява тенена’’ хибяри’’ хамяку’’. Маня’’ ӈани’ няна’’ манзаи’’ газетанана падбина’’. Нюртей падбадава’’ повесть «Нярмодана хубта».

Хадав менюй ирийкодрев’ ванебты. Ӈоб’ лахана. –Эх-ха! Василей’’ ӈани’… мер’ ни’’ хааӈг’’? – сём’ намдхава Пыря Василей ирива’’ таӈобэй тибида вэхэрта. – Ни. Василей’’ мер’ ни’’ хаӈг’’, -мадм’, вадаха’’ан хар’’н пунранарахыв. – Пыдар, мадм’, харт пыдаханд сылад’’ма: ӈэваер сывэхэд сэр’’ню’’! Муноцял ӈод’’… сырараха! Лэмбаранд ний паромдэрха! Ӈэбта ӈо’’ тамна небось та’’нюӈо’’ няю’ сэв ярабинню’’! Пыда, – нюн нюн’ табекудм’, – ӈобтарем’ Василей.

Вэсакор инда ватовна ванерабтыва, сэр’’ муноцянда хылвобтялабива. Маньзьва ӈани’… тэри тарем’ нисядам’ хынос’’: – Тецьдов, ирабтёв’’! Хад’’я, марабтёв’’! Хаяерл – танаӈгов’’! Хаерл’ – мэбе’’ӈов!...

Хадав ӈыхы мэсы’’мананда хыно’’ӈась, сёда валакада невхэнда ирэхэ’’на сатаркавна ледобтысь.

По’’ ваера’’. Ти, мале няхаркад юкад вата по’’ ямбан’ тикы харасяда сёкоцянд ӈэдрё те’’над’’ хаха’’нани сонараха. Ненэся хэ’’ли’ хадан сён’ инзелесадам’, тикамд мань теда’ пулыта нися тара’’масавэй’ тенев, нибтя тикамд хадан вадахат мале пуна ихин пэнзавув’ – таслава серта яӈгу: саць ӈока и’’ил хэлкада, юр’’ си’’ив понда ӈэсонд’ илевы хадами ӈод’’ мале ӈахакуд яӈгу’’ нив’.

Сямян нюртей ӈацекы ӈэ’’ма пон нисян мюсерта мякана ваераса’’ма, тикыд теда’ валакада тире’’ тяхад тарпорта лэхэ’’ хаерат лэркабт’ ялэмдавы вы я’ ӈокоцядрев’ ирихинан яловорӈа’’. Тикахавамд мань ханяӈэхэ’’на теда’ ӈопойри ялярахаӈэ манэцятыв – тид’’мана хэм’ ӈэдараха нив’ ӈа’’. Тад ӈо’’ сайнорманд ныкалмы ӈаць ӈэ’’мав ненэсянда ӈо’’ хэм’ ӈа’’ нисяв’.

Мя’’ма’’ Хараляӈг яханд тиркы ӈарка варю’ Нина мярысь. Лимбякаця, ё’’ойдако мерця явысумбись. Янда нимня мырый сырит, нядэят, илебей нерцит, нерот ӈабт’’ лехэдарӈаць. Маня’’ хар’’на’’ тына’’ таня’’ма. Сянамдо’ ӈэвамдо’ – вунив тенев’’. Нисяв манзеты, тына’’ вэӈграмба тара’’, нябинзер’ тикыд мерривна еданд мю’ танавана’’ пир’’.

– Ни, тыд ед’ мю’ нид танаӈгу’’! – мань пыхы’’лыдм’, – Тикыд ӈока’’ню’’, ӈарка’’ню’’. Едъена’’ мю’ тэнд ӈэвахарт ни нялт’’.

–Тарця ни’’ӈа’’, хасавав нюв, -нисями ӈэвамда пар’’ӈа. – Едамд пили’’ пандавар сяхаӈгарт’ ни тут’’. Нюдя ӈэб’’нанда ӈод’’, едамд хусувэй яля’ тердемба тара. Ядаӈгазу’ мань ха’’маӈгарт’’ нидм’, хусувэй яля’ ӈамгэхэвам’ ӈамзь нив’тара’’, тад ӈод’’ ялянд ер’ някуна мэтина’’ саӈона’’ янзавэй една’’ няю’ харто’энаналцетыд’’.

Ӈамнела ӈаворо’’махавахад сёнзя’’ савоворӈа’’, сэв’’ яловорӈа’’. Ӈопойри тэнд ӈамзахава ханя малебцо ӈа’’. Тохо’’на, есит мюня нисява халям’ пэрцеты, ябтонзетыва, нявакорцетыва. Мань не нян ня’ пунонци есмбини’, небява’’ ӈыери’’ яӈго мярбасьты. Мя’’ма’’ сэдорпа хадава’’ валакада нибясавэй’, тэнакосавэй’ Хусувэй яля’ лехэбтавы еята, мюйкута нимня нялабарцеты. Ӈоб’’ вадахана хусувэва’’ хари’’ серцавэй. Нисява’’ ӈоякари’’ ӈадиберӈа. Паромбари ӈаворо’’махаданда пыда ӈани’ ӈэдаласеты’’. Хадри’, тэхэта хан’’ӈава, тэвэй мядо’’ хэвхана маня’’ мале ӈахакуд нинаць манэцю’’. Хэ’’нё. Тябихабцо. Тэсипойкава’ мале ханзер’’ и’’лика ӈэвна? Пунонцяамна ханеба’’ни валакада юрхалцетыв’’. Ӈадьбянда маня’’ханесетыва’’… Небява’’ хувэхэд тамна Мехэлкамда нявако той’ мю’ юйцетыда, еся хоротанда мю’ пэнзетыда, тикымда тикахад ӈыерита яӈго ватабава’ сер’ яханд сяд’ сыра’ нимна ханакодрев’ нюделасетыда. Ӈыерит яӈго’’ сыра’ сяр’ нина такалмадавэй’ мяры’’ма. Няръяна ӈавладотана’’ яӈго’’. Ӈавладод тыт тивак’’ ютер’’ма, ӈыерит сядхалавы’’ ӈэва’’ма, няръяна тохосадот ӈадук’’ ӈод’’ ӈэсеты’’ма. Тикыд манзхало’’ енха’’ сярвэӈэ мале мярвы яӈгонд еркы ваӈгцяха’’на юседасеты’’. Ӈавладо манэць тю’’уд вэдандорта’’ са’’лако’’ ӈыерид тире’’ панхад пэрдев’ ха’’амсетыд’’, харёй хадаха’’на ӈаврамд сарвадасеты, лэроць лакадавы яӈгонд няӈохо’’ ти еремзеты’’. Тарем’ небява’’ хусувэй яля’ ӈыеринзеты, ӈыерида ӈани’ ёненана нисява’’ небяна’’ ябтоӈэ нюмдебасетыда. Ялэт ямбха’’ яханд сядо’’ нимна Мехэлкана’’ ханӈэ мэта еся хоротанд лаб’’нари сосьты. Тарем’ илева’’ма.

Малда тамна ни’’ӈа.