Сян’’ яля’’ ямбан маня’’ округна делегация’ Вьетнам’ Бариа-Вунгтау провинцияхана мэць. Тюку’ мэвахана тикы ян’ округна губернатор Игорь Федоров’ няюв’ творческой коллектив’’, мел’’ хибяри’’ ӈэдалёрӈаць.

Маня’’ округна культура’ яля’’ Бариа мар’ культурной центрхана миӈаць. Нюртей яля’ концерт’ «Морошки» нюбета коллектив’ нэдась, харто’ манзаидо’ «Северянна» манэ’’лабтась. Людмила Кустышева мел’’мана сэдорана не, пыда сэдвы’’ манзаида ӈани’ яхана илена’’ хибяри’’ манэ’’ядось. Маня’’ яна’ падтаӈгодаха’ Надежда Выучейская, Евгений Одегов тэвравы’’ манзая’’ выставка’ ваерась. Тамна ӈопой мел’’ нява Александр Ледков харта манзаида манэ’’лабтамбись.

Сян’’ яля’’ ямбан маня’’ нина’’ манэ’’мэдо’ тянё нись’ӈа’’. Датдо уездан’ тэворӈаць, Вунгтау молодежный центрхана мэць, «Вьетсовпетро» предприятиен’ тэворӈаць.

Няръяна март’ округна делегация’ носиндалава ирийна сидя ю’’ няхарамдэй яляхана тось.