Няръяна маркана хусувэй по’ харто’ серудо’ тасламбада’’, харто’ манзаидо’ минрена’’ хибярина е’’эмня ма’’лёва танесеты. Тарця ма’’лёвам’ ӈэрм’ ненэця’ отделкана манзарана’’ нина’’ хамандабсеты’’. Ханзер’’ хари’’ манзаи’’ минресь, ханзер’’ тарана падро’ хамадабась.

Маля ӈахакуд’ округханана семейно-родовой общинахана хибярина манзара, ханяна ненэця’’ харто’ яханандо’ тыдо’ пэрӈа, халям’ ня’’амарпи’’. Тарця ненэця’ харто’ манзаидо’ пэрӈа, харто’ илевамдо’ тидхалембидо’. Ӈокханда яханана няхар’’юд мян семейно-родовой община’’. Хусувэй по’ общинахана манзараван’ харвана’’ хибяри ӈадиберӈа. Тюку по’ сидя общинам’ нэць, тикы «Салды» семейно-родовой община, хуний Холговхана тыбэрӈа, тыдо’ вадабаӈгу, ненэцие’’ илм’ нерня минреӈгу. Тикахад’ «Сятва», таняна манзарана’’ хибярина’’ харто’ янандо’ халям’ пэрта’’.

Хаювы си’’ивна сидя яля’’ ямбан община серу’ пэртя’’ хибярина’’ Няръяна маркана тоходанаць. Пыдо’ е’’эмняндо’ семинар’ хамадавыць. Ненэця’’ тарана серуто’ нямна ӈока ӈамгэм’ намдаць.

Тюкумэвахана Няръяна март’ Якутияхад’ Сивцева Татьяна Васильевна товысь. Тикы не’ харта яхананда маля ӈахакуд’ общинам’ сертавысь, таняна харта нида’’ ӈобкана манзаравась ма’’лавыдась. Нерде’ манзарась’ пявандо’ мальӈгана ӈу’’ли’’ саӈго’’вомысь. Тарем’ янамбовна ӈока’’ серудо’ тю’’у минзь’ пэйдось’. Ӈэсы’ тер’’ хибяри’’ теда общинахана манзара’’, хусувэндо’ харта манзаяда, есям’ недвопи’’. Халям’ ня’’амарпи’’, пэдарахана вадюданна’’ ӈавори’’ – ӈоди’’, тудако’’ ма’’лаби’’; ханисэйм’ на’’амарпи’’. Хибяридо’ маля тэри’’ тарем’ ни’’ иле’’, мэсури’’ ня’’амвыдо’ нидо’ мипю’’. По’’ ваерась общинахана манзаранидо’ ӈэто’ ни’’ мэёвна нулъяд’. Тикахана нядаӈгодадо’ Татьяна Сивцева. Татьяна Васильевна падарм’ теневана не’, харта общинанда е’’эмня Уставм’ падвысь, тикы’ нерде тарана’’ Закон’’ малӈэ’ сававна тохолавыдась.

Маня’’ яханана семейно-родовой общины’’ ня’’амбада’’ хибярина ӈобтарем’ ныхыто’ пирувна манзаидо’ нерня минрейдо’. Тарем’ ӈод Анастасия Засухина «Некуця» общинамда’ маля ӈахакуд’ ӈуданата ня’’амбида. Пыда’ харта нита’’ няюв’ Варандэй’ няна иле’’. Харто’ со’’явы янандо’ яв’ халям ня’’амарпи’’, та’ мальӈгана мараӈгам’, ӈодям’ ма’’лаби’’.

Засухина: - Теда ма’’лёваханана ӈока’’ тарана’’ ӈаву’’ намдамась. Якутияхад’ товы не’ танясь, пыда харта манзаямда ваде’’ӈась. Халям’ пэрӈа’’, тым’ пэрӈа’’. Тикы некоця’ манзарава ихин’ мэёвна ха’’мы. Небой по’ Москвахана мэмась, «Сокровища Севера» фестивалькана тикы нем’ хомбивась. Тамальӈгана пыда общинанандо’ хомбада’’ ӈаворидо’ тэвравысь. Сертабададо’ тянё ни’’ӈа’’.

Общинам’ сертабава серкана ӈока’’ ӈамгэм’ тенева’’ тара’’. Маня’’ халям’ пэрць’ теневава’’, тым’ пэрць теневава’’. Тарця манзаина’’ сававна пэрць’ теневына’’. Падро’ сертабась’ ӈани’ теневась’ тара’’, тикы серкана маня’’ хаюрӈава’’. Тарем’ ӈод, маня’’ нерняри’ пэрӈава’’. Сидна’’ тарця семинаркана тохолабсеты’’. Хари’’ серкана ханяӈэхэна ныхыр’’ сусана’’ то’’олха’ ӈэсьты. Ханяӈэхэна ярсавэй’ пэртар’. Инян’ масьтым’: ӈоб’ нерня минзь’ тара’’, хари’’ илва ӈэ’’нив’, харна ява’. Теда ӈани’’ сидна’’ няда’’, луца’’ вадавна манзь’- грант’ ня’’амава, няд’’ма’’ нянана’’.