Паднана’’ хибярина ханярина иле’’, хуркари’’ тенз’ мэта поӈгана таня’’. Нянэй ненэцяӈэ’, хари’’ паднанина’’ малӈэ’ теневына’’. Пыдо’ падвы’’ манзаидо’ харвась’ толабасьтына’’. «Сэдоранако» тикы Лукерья Валей падвы манзая. Небянана ялям’ ядабтабвахана тикы падвэмда толара’’.  

Тамальӈгана мань саць нюдямась. Мякана еся печьм’ нерохона пятамбиць. Печь’ нина ӈамзэ’ едко, сяйник ти валакада пиӈгу’’.

- Небяков, тюку яля’ ӈамгэм’ пэртан?

- Тайком’ латако’ ни’ масибтеӈгув. Едпаӈгув. Пыдар ӈани’ ӈамгэм’ пэртан?

- Ӈухукон мальцядамда сэдван’ харвадм’.

- Тедари’ сянаку’’. Пунарка сэдораӈгуни’.

- Сава.

Небяв ты тайм’ латако’ ни’ хыносумба едпа пя. Мань ӈо’’ сянакумась. Небян хэвхана сюрамась. Ти вэн’’ мад пихина со. Тэ’’на мэна тыда мяд’’ няю’ танэвы.

- Нисяв то! Пин’ хантадм’.

Тикымбохона тяханий хасава ӈацекы мальцямда паромбари сера, пин’ сюрба тарпы’’.

Небяв надорцямда, есеймда, на’’мы ты таймда ва’’ав’ ниня хаейда. Панымда сера, пин’ тарпванда сер’ ма’’нив: - Ненюкоми, мальцямд серад, пин хэхэни’.

Тарця вади хэта пыда мякад тарпы.

Сеӈгасавэй мальцяков мэв, валакада серба пяв, тад тайком’ манэ’’ӈадм’. Сэвкун тэри ялякоӈэ хаяха’.

- Теда’ мань небякон тотрев’ сэдораӈгумэй! Пыда пихина пон’ мэӈгу. Мань ӈо’’ тайком’ ханзер’’ тара сертаӈгумэй.

Савамбовна  ва’’ав’ ни’ ӈамдыв’’. Тикы париденя тайком’ мэдм. Небян туцяӈгад ӈэбтобэрцьм’ тюхулӈадм’. Хыносумба тайком’ тэри маторпа пяв. Янамбоковна маторпивась, ӈудин мада тосамась.

Тарем’ хыносумба манзара ёльце сава ӈэвы. Нюдякоця’’ пусак’’ ӈокма’’.

Небяв ӈани’ лакри’ мят’ тю. Пыда манзарана сэдоранам’ маниеда, нямюда тоенанаӈэ хая, вадам’ хэтась я’’ма. Няӈэн’ тэри пыса сырӈа. Парко нябаков няӈэн’ сырць ма: - Ювэкокондэй’’! Несэй сэдорана ӈадимыню’’! Ханзер’’ савамбоковна тайком’ парквы! Небянд нядаӈгодаӈэ сацей серо’’ӈанэй’’!

Небяв тэри ванерабтё ну. Нензямбой тарця вадахат сейкон мюй тэри халакабтысь – похобэм’ ӈэвэдм’. Небяв тэри маймби.

Няби яляхана мал’ мя’’на’’ тер’’ ёркалаванзь пин’ тарпыд’’. Мань ӈани’ сэдораван харбелыв’’. Валакада сэван нерняна ӈамгэхэрт тар’’ пусак нись ӈадю’’. Небяв туцямда ӈунд’ сярвэда. Ханзер’’ теда’ тикым мэӈгув?

Мальцяв’ серадм, пин’ тарпыв’’. Ёрколава хибяри’’ поӈгана небяков пюрць пяв. Таминда ховась, тикэн ма’’нидам’: - Небяковэй’’, сэдораван’ харвадм’. Валакада туцял сацей тю’’уна ӈа. Ха’’аврадэй’’, ха’’аврад! 

Небяков тэри сеӈгасавэй мальцятанан’ ванерабтё сырӈа.

- Тедари’ ӈатенэй’’, мань тэтнадм’. Пунарка ӈобкана сэдораӈгуни’. Ӈобкана серм’ серта саварка ӈэӈгу.

Тикы яля’ пуд мань ӈобӈгэв’ сэдора пяв.