Вы здесь

Сава вадам’ хэтада’’

Н. Талеева мякнанда вадамдо’ тенева’’, паӈгудо’ нерня минре’’

Сенз’ ӈава сер’ ты’’саполана ириян’ тэвына’’. Товы ирийна сиднтетимдей яля’ я’ сяр ниня’’ ӈахы’’ похот’ хэбидя яляӈэ’ таславы’’. Тикы не’’ ӈарка яля’. Небянана’’, хадунана’’, не’’ нина’’, нябакуна’’ ӈарка яля’. Тикы яляхана хусувэй не’ ихид’ миндя’’ вадам’ намдувнда.

Тикы яляхана небяна мят’ сава ихиня’ тэворцетыва’’, небякохона мядонзэйм’ тэврабсетыва’’. Ӈобкарт’ небя юрвы’’ ӈэбнанда ни’ тара’’. Ты’’ саполана ирийна сиднтетимдей толыркана небякуда’’ нёда’’ юр’’.

Ӈарка яханана ханярина илена’’, хуркари’’ манзаяхана манзарана’’ не’’ хэбидя яляхана сава вади’’ намдгу’’. Тены’’ похо’ таслась не’’ нюкцидо’ вадабавандо’ хавна хуркари’’ манзаи’’ минре’’, хуркари’’ манзаям’ пэрць пир’’ӈа’’. Маня’’ ӈод илесь’ яханана’’ ӈани’ тарця. Яханана не’’ ханярина манзара’’. Некоцина нюкцидо’ вадабась, хасавидо’ нядабась хойхана мюсерӈа’’. Пыдо’ харто’ мято’ тер’’ илм’ тидхалембидо’. Пыдо’ по’ ямбан ныланавам’ ехэрась, мято’ ибам’ лэтби’’. Хойхана мюсерта’’ нехэ’ сямянд’ ӈарка вада’’.

Округна   ӈэсына’’, маркана  ӈод’ маня’’ нина’’ ханярина манзара’’. Ӈацекы’’ тохолаби’’, хибяри’’ савумдаби’’, паднава серм’ пэрӈа’’, мярдатна’’ поӈгана таня’’, культура’ серу’’ тасламби’’. Не’’ хуркари’’ манзаи’’ пэрць’ тенева’’. Харто’ манзаито’ поӈгана не’’ тамна хуркари общественной манзаи’’ пэрцеты’’, хуркари’’ кружокха’ ядэрӈа’’, фольклорный группахана хыно’’ӈа’’. Тикы’ поӈгана харто’ мято’ тер’’ сававна пэрӈа’’, хусувэй серкана нидо’ нядаби’’. Не’ ныхыдо’ ханяри’’ тэворӈа’’. Тарем’ ӈод Надежда Николаевна Талеева иле. Харта маля ӈока по’’ ямбан толаӈгова’ хардахана манзара. Тикы’ хавна маля ӈахэт’ «Илебц» театрхана сянаку. Нюда’’, нюта ню’’ харто’ вадамдо’, культурамдо’ мэнесь’ тохолабида. Мал’’ тикым’ ваеравы хари’ вада нямна хамандавы ма’’лёвахана манэ’’ӈаваць. Пыдо’ пэдоваць. Малӈэ’ тарем нюкцина’’ нерня’ пэрпана’’ вадава мал’’ теневаӈгуваць. Надежда Николаевна харта хусувэй серкана пэдова. Харта вадамда мэнена, харта вадавнанда хыно’’ӈа’’, ярабц’ теневана, харта паӈгуда нерняри’ пэртя не.

Тамна ӈопой тарця некоця Татьяна Павловна Бецко. Ӈарка яхана мюсерта ненэця’’ мякана соявы, хойхана вадювы’’. Пыда мята’ терсавэй маля сидя юкад’ вата по’’ ямбан маркана иле’’. Татьяна Павловна лекарь’, ӈацекы’’ няюв’ манзара. Манзаямда ив’ ер минрена некоця. Тикы’ хавна пыда нянэювна харта паӈгуда теневана. Харта нюда’’ӈод вадамдо’ мэць’ пилибт’ тохолабида. Ненэцие’ культурахад’ перена серкана пыда’ мята тер’’ маниесьтына’’. Татьяна Павловна ӈод’ харвась хыно’’манзь’ турцеты’’, нюда’’ таняюв’ тэврабсеты’’.

Нянэювна хэтась: харто’ вадамдо’ нерня минрена, харто’ культурамдо’ теневана’’ не’’ яханана ӈока’’.

Тюку ирийна сиднтетимдей’ толыркана не’’ хэбидя ялям’ ядтаӈгува’’. Тикы яляхана небянада’’, хадунада’’, манзарась нята’’ нида’’ юр’’. Хусувэй не’ сейхад’ миндя вадам’ намдая! Сава ихиня ӈарка ялям’ ядабтара’’, сензда  ӈада’’, хусувэй серуда саваривна миӈая!