Нерняна товнда ирий’ нертей яля’’ пиркана Няръяна маркана округханана ӈэрм’ я’ тер’’ толырто’ тянё ненэця’’ ӈарка ма’’лёва ваераӈгу. Тарця ма’’лёван’ ненэциена яханана хамяку’’. Оргкомитет’ манзаямда минреда. Теда округна хусувэй ӈэсыхына, маркана ӈод’ илена’’ ненэця’’ ма’’лёвидо’

мэ’’ӈа’’, ханяна съездан’ товнда хибяридо’ тэраби’’.

Тарця ма’’лёва поӈгана тамна «Ясавэйм’» нюбета ассоциацияна ма’’лёвам’ мадаӈгува’’. Тюкумэвахана ассоциацияна ӈоб’ яӈганя ма’’лёва ӈэӈгу. Нянэй ненэця’’ ма’’лёвам’ мэпва мальӈгана округна еркы’ маркана тамна тыбэртина сянакова’ ваераӈгу. «Сямянхат мерета» пирдыр’’ма’  ӈани’’ ненэця’’ ма’’лаӈгу.

Ӈокханда округна толырто’ тянё ненэцие’ нертей съездан’ хибяри’’ сидя ю’’ хасую’’ ӈэсыхыд’ тута’’, тарця ма’’лёвахана самляӈг ю’’ сидя делегат’’ манзаравнда’’. Хусувэй муниципальной образованияхана теда ма’’лёва миӈа’’, ханяна ненэця’’ съездан’ товнда нидо’ нюмдемби’’. Товнда съездхана сян’ площадка’’ манзаравнда’’, ханяна тюку ялян’ таславахана илӈгана сямянд’ тарана серу’’ манэ’’сарта’’. Ханзер’’ яханана толырто’ тянё’’ ненэця’ илм’ саваркаӈэ’ сертась? Тикы’ нямна ненэця’’ ӈобкана ма’’лась лаханаӈгу’’. Ӈодьбянда теда маля хусувэй товнда делегат’ харта яхананда тикы серу’’ таслабнандо’ тара, ваеравнда съездан’ хамадёсь’ тобнандо’. Харто’, ив’ ер таславы’’ предложениидо’ тэврабнандо’, ма’’лёвахана ваде’’пато’. Съездава сава сёнзяхана ваерабнанда, нись’ поеларамбю’’ манзарабнана’’. Товнда ӈарка ма’’лёвахана резолюциям’ ня’’аӈгу’’. Таня’’ падвы серо’’мана илевава мэтава’’.

Товнда съездаха’ делегатдо’ маля Индига’, Несь’, Нельмин Нос’, Красной’, Искатели’ ӈэсыхы’’на’’ маля’ тэровы’’. Поӈгандо’ теневана’’ нина’’ таня’’, хуний харто’ яханандо’ ӈока по’’ ямбан ассоциация’ отделения манзаи’’ пэрӈа’’ – Александра Ломанец, Анна Сулентьева. Няръяна маркана ӈод’ ма’’лёва ваерась, ханяна ненэця’ съездхана манзаравнда’’ нидо’ нюмдець.

Ханзер’’ округна толырто’ тянё’’ ненэцие’ ма’’лёван’ хамякова миӈа? Тикым’ Марина Мартыновна Тайбарей тарем’ ваде’’ӈада: - Теда съездан’ хамякова сававна миӈа’’, оргкомитет’ манзара. Хибяри’’ округна ӈэсыхыт’ тута’’, ӈокханда самляӈг ю’’ сидя хибяри’’ тобнандо’ тараӈгу’’. Пыдо’ делегат’’ ӈэӈгу’’. Оргкомитет ӈахакуд’ манзара, манзаяда нерняри’ миӈа. Ӈэсыхына ма’’лёва’’ миӈа’’, падродо’ тюкон’ ӈэдарабидо’. Теда Няръяна маркана ма’’лёва ваера. Мат’’ хибярим’ делегатӈэ’ тэрава’’. Съездхана товы’’ хибяри’’ хуркари’’ серу’’ таслабгу’’. Илӈхад’ перена сер’’ нямна лаханаӈгу’’. Ханявахана школа’ таранакы, ханявахана манзаясяда хибяри’’ танедакы, тоенана сер’ ханярина ним’ таня.

Сие’ ниць ирийна нертей яляхана сямянд’ ӈарка серуна’’ таслабӈгува’’, нертей съездава’ мэтава’’. Ассоциацияна ма’’лёва маля няхарамдэй толыркана ваераӈгу, таняна общественной организацияна манзаравам’ таслаӈгува’’. Тикахад’ президентдава тэрабаӈгува’’, Советхана манзаравнда ненэцие’ нюмдеӈгува’’, Совет старейшин тэраӈгува’’, молодёжной Советан’ хибяри’’ таслаӈгува’’.