Ты’’ саполана ирийна ӈертей яля’’ пиркана не’’ ӈарка ялям’ хусувэй по’ мэцьтыва’’. Тикы сямянд’ ихиня лимбяка яля – не яля’. Хадунана’’, небянана’’, хусувэй не’’ ӈацекы’’ хэбидя яля’. Тарця яля’ товахана хада’’, небя’’, нябако’’, не’’ ня’’, не’’ ню’’ ихид’ ӈэда вади’’ намдурцеты’’.

Маня’’ яханана ӈод’ тарця яляхана не’’ нямна сава вада’’ янда’’на соць. Илӈгана маниесь, не’’ ӈока’’ серкана нердесьты’’. Не’’ нюдо’ вадаби’’, мято’ тер’’ хусувэй серкана нядаби’’, тикахад’ не’’ хуркари’’ манзаяхана манзара’’. Тикы’ хавна ӈокаюв’ не’’ общественной манзаи’’ пэрӈа’’, хуркари’’ кружокха’ ядэрӈа’’, хыно’’манзь’ ма’’люрцеты’’. Не’’ ханярина поспейӈга’’. Не’’ хэбидя яля’ тось Няръяна маркана маля самляӈг по’’ ямбан « Женщина года» премиям’ мипи. Тарця премиям’ не’’ ня’’амарпи’’, хуний пэртя’ серкнандо’ нерде’’.

Тюку по’ тарця премиям’ ня’’амвы поӈгана сидя нянэй не’ таняӈаханзь. «Хранительница национальных традиций и культуры» номинацияхана нердевы Екатерина Петровна Тайбарей. Ненсянда’ ӈод недво’’мы премияда. Екатерина Петровна Нюдя яхана соявы, вадювы не. Теда Краснойхана маля ӈока по’’ ямбан иле, манзара. Харта манзаямда мэнена, теневана не. Илеванда ямбан харта вадавнанда лаханана, вадава нерня минреда, ненэцие’ культурава’ тю’’ури’ пэрӈада. Тикым’ серкана манэ’’лабтамбида. Культура серкана маля пон’ манзара. Хойхана мюсерта’’ ненэця’’ ӈэсыхындо’ ныланавась тобнандо’, пыдо’ е’’эмняндо’ Екатерина Петровна ныланавам’ хамадабсеты’’, нида’’ культура’ хардахана ма’’лабсетыда’’. Хойхана мюсерта’’ нида’’ тарцям’ теневахая’ харвась’ ӈобкана ма’’люрцеты’’. Екатерина Петровна тамна ӈацекы’’ няюв’ манзара. « Ӈодякоця» коллективм’ манзаям’ нерня’ пэрӈа. Тикы коллектив’ ӈацекы’’ манзаи’’ маня’’ ӈод’ маркана маниесьтына’’. Тамна Краснойхана маля ӈахэт’ «Нянэй сём’» нюбета фольклорный коллектив’ таня’’, тикахана нянэй не’’ хыно’’ӈа’’. Тарця манзаяхана нида’’ нерня’ пэртяӈэ’, ӈобкана ма’’лабдаӈэ’ ӈани’’ Екатерина Петровна Тайбарей тара.

Тюку по’ «Хозяйка тундры» номинациям’ ня’’амвы не Александра Анатольевна Латышева. Канин’ выӈгана мюсерта ненэцие’’ мякана соявы, хойхана вадювы. Школамда ёльце’’махаданда Александра самляӈг по’’ ямбан Санкт-Петербургхана Герцен’ нювм’ нюбета институтхана тоходанась. Пыда луца’ вада, литература тохолкода. По’ ӈацекы’’ тохолабись. Тикахад’ тыбэртя’ хасаван’ хаюпа’ хэсь, хоян’ танэяць. Тедая мята’ терсавэй хойхана иле. Маля пон’ хойхана мядм’ манзаям’ минренаӈэ’ тара. Варёмда мэць вымна мюсерӈа. Харта мякнанда хусувэй манзая’ няданда пере’’. Пыда мяд’ ибам’ лэтбада не, хасавамда нядаби, нюда вадаби. Мел’’ не, пыда сэдвы ембдяркана ядэрць маймбцо.  Тюку ялян’ хэтась: Александра Анатольевна вэсаконда няюв’ «Канин» СПК манзара.

Тюку по’ валакада сидя нянэй нехэ’ тарця премиям’ ня’’амӈаха’. Илан’ мэёвна сырта’’, илевандо’ ямбан сававна манзарана’’ не’’ яханана тянё вуни’’ӈа’’. Тад нерня ӈод’ тарця некоцина’’ нерня пэрпана тара.