Маня’’ округханана хойхана мюсерта’’ хибярина’’ е''эмня ты’ яля’ хавна тамна хуркари’’ сянакова’’ танесеты’’. Ханяна хойхана манзарана’’ нина’’ поӈгнандо’ пирдырцеты’’, хыныдо’ сян’ тенз’ сянаковахана хорпасьтыдо’.

Тарем’ Канин’ выӈгана мюсерта’’ нина’’ «Канин’ мэбетан’» ма’’ласьтыд’. Маркана ӈани’’ «Сямянхат’ меретава» ненэцие’ ма’’лабсеты. Тарця сянаковаха’ хибяри’’ торумы’’. Ся’’ня ӈэвамдо’ ӈатесетыва’’.

Нерняна товнда ирийна нябимдей толыркана округна еркы маркана тыбэртя’’ ненэця’’ ӈани’’ ма’’лаӈгуд’. « Сямянхат’ меретава» ваераӈгу. Округна тэхэ’’на’’ мэна’’ хибярина’’, хуний Няръяна маркад’ нись’ ӈа’’на мюсерӈа’’ хари’’ тыдо’ мэць тута’’. «Сямянхат’ мерета» ты’’ сие ниць’ ирийна нябимдей’ толыркана ваеравась’ ятна.

Тарця пирдырман’ хамякова’’ маркана маля миӈа. Хусувэй тарана’’ серу’’  оргкомитетхана тасламбидо’. Ханяхад’ пирдырманзь’ хибярина’’ тута’’, сяӈок тым’ тэвраӈгу’’, ханяна тэхэ’’на ӈэдалёрта’’-  мал’ тикым’ сававна таслась нив’ тара’’. Тикахана сянакова ӈод’ со’’ ваераӈгу. Тикы’ хавна культура’ серу’’ пэртя’’ нина’’ харто’ программамдо’ хамадаби’’. Няхар’’ мя’’ мярвы’’ ӈэӈгу’’.