Тюку по’ нерняна товнда ирийхана Заполярный район’ ю’’ помда ядтаӈгу. Таӈок по’’ ямбан округна хусувэй ӈэсы’’ таняхад’ пере’’. Район’ со’’яма ялян’ ӈэсы’ тер’’ хибярина хамяку’’ ханярина теда хамяку’’.
Тарем’ ты’’ саполана ирийна самлязимдей яляхана Ома ӈэсыхы’ культура’ хардахана тетимдей муниципальной фестиваль’ ваерась. «Созвездие талантов» ма’’лёвамдо’ Канин’ яхана маля тетимдеймэвна ма’’ладось. Тарця ма’’лёвам’ Ома ӈэсыхы’ культура’ хардахана манзарана’’ сертамбидо’. Тюкумэвахана товы’’ мядондидо’ ӈокаць. Мэбэбцомдо’ манэ’’лабтавась сиднтет юкад’ вата хибяри’’ Канин я’ хусувэй ӈэсыхыд’ тоць. Хибяри’’, хуний харто ӈэсыкоцяханандо сё’’ мэ’’ӈа’’, тара’’, театральный инсценировки’’ манэ’’лабтамби’’. Тарем’ Нижней Пёшахад’ «Ивушка» няби театр народного творчества «Канун» манзаидо’ манэ’’лабтавась тоць, Верхний Пёша ӈэсыд хынокад’ не’’ хор’ танясь, Вижасхад’ «Горницам’» нюбета фольклорной группа хыно’’ӈась, тикы’ хавна тамна Снопа ӈэсыкоцяхад’ сидя коллектив’ таняць. Несьхад’ нянэй не’’ товыць. Тикы ӈэсыхына маля сян’ по’’ ямбан «Сава не’’» вокальной группадо’ манзара. Ома ӈэсыхына ваеравы фестивалькана ненэця’ вадавна хынота’’ таняць. Яндахат’ товы’’ мядонди’’ «Силуэтхана» тарана’’ ядтабидось, тарця коллектив’ Омахана манзара.
Канин’ хусувэй ӈэсыхына илена’’ хибяри’’ ныланась тенева’’, хусувэй ӈэсыхы’ культура’ хардахана хибяридо’ ма’’люрцеты, хуркари’’ программы’’ хамадабсеты’’. Тарця манзаидо’ фестивалян’ тэвравыдось. Ханяна тюкумэвахана хыно’’ма’ хавна хибяри’’ тараць, хуркари мэкад’ сценки’’ манэ’’лабтабиць, частушки’’ мэ’’ӈаць. Хуркари’’ тенз’ мэта’’ ненэця’ ӈобкана ма’’лась харто’ яндо’, ӈэсындо’ нямна ихид’ хыно’’ӈаць.
Канинхана мел’’ хибяри’’ хусувэй ӈэсынандо’ иле’’. Тикым’ «Рукотворные чудеса» выставка манэ’’лабтадась, хуний Омахана фестиваль’ мальӈгана нэяць. Хуркари’’ хари’’ ӈудахана сертавы манзаи’’ хибяри’’ сертаби’’: сярода’’, сэдора’’, матора’’. Канинхана илена’’ хибяри’’ тарця фестивалян’ хусувэй по’ ёльце сававна хамякосьты’’, тикым тюку по’ ваеравы ма’’лёва ӈани’’ манэ’’лабтадась. Хусувэй ӈэсыхыд’ товы’’ хибяри’’ малӈэ’ пэдоваць. Няндо’ ӈарка вада’’!
Хусувэй коллектив’’, хусувэй мел’’ хибяри сава вади’’ намдась, благодарственной письмо’ ня’’амаць. Тикы яляхана хусувэй товы хибяри сававна нылэяць, тикахад сава ихиня мяканда хаясь.
