Я’малкана мюсерта ненэциена тыбэртя хэбидя ялямдо’ хусувэй по’ сян ирий’ ямбан мэцьтыдо’. Сямянд’ нерде Шурышкарский районхана ненэця’’ ныланавась ма’’ласьтыд’. Сямянд’ пуданаӈэ’ Тазовской район’ тыбэртя’’ ма’’люрцеты’’.

Тюку по’ ӈод хусувэй районхана тарем миӈа’’. Теда хэвхы округхана тыбэртя’’ тэтнава’’ яляхат’ нылана’’. Хаювы ныланава’’ яляхана, ты’’ саполана ирий’ сидя ю’’ маттамдэй толыркана округандо’ еркы маркана тыбэртя ялям’ мэ’’ӈаць. Пэхэ’’на илена’’ ненэця’’, Приуральской районхад’ товы’’ тыбэртя’’ Саляхардахана сянакова яляхандо’ ма’’лыць. Яля’ ямбан хибяри’’ ныланаць. Полуй’ яха хэвхана юкад’ вата мяду’’ мярвыць, таняна яндахат’ товы’’ хибяри’’ нидо’ ядтабиць. Ӈобкана ма’’лась по’ ямбан манзаравидо’ таслабиць. Тикахад’ ненэця’’ поӈгнандо’ пирдырӈаць, сямянд ныхытидо’ нюмдець. Тэхэ’’на ӈэдалёрӈаць. Не’’ едэй сэдвы’’ ӈаворидо’ манэ’’лабтабиць. Культурахана манзарана’’ ныланавась товы’’ нито’ е’’эмня ихиня сомбой программа’ хамадавыць. Хусувэй хойхад’ товы хибяри ӈока ихид’ миндя’’ вади’’ намдась. Яля’ ныланась, ныхыдамдо’ ма’’лась сава ихиня мякандо’ ӈэдалэйдаць. Ӈани’ похона ӈани ма’’лаӈгуд. Маркана илена’’ хибяри’’ ӈод тарця ялям’ ӈатеӈгудо’.