Округна хусувэй школахана манзаидо’ мэнена’’, теневана’’ хибярина’’ манзара’’. Пыдо’ ӈацекы’’ тохолаби’’. Ӈокаюв’ тохолкодина’’ не’’. Ненэця’ вадам’ минрена тохолкодина’’ ӈод’ харто’ манзаидо’ няхар’’яӈганя школахана минре’’. Няръяна маркы’ санаторной школахана тарця тохолкодина манзара’’.

Ӈопой тарця нява Полина Александровна Большакова, хусувэй сертаба манзаянда ив’ ер сырта некоця. Няръяна маркана педучилищем’ ёльцесь,  тикахад Архангельскхана педуниверситетхана тоходанась. Тикы’ пуд  Усть Кара, Нарыга, Холговхана манзаравы.  Март’ то’’омахаданда пили’’ санаторной школахана ӈацекы’’ тохолаби. Тюку по’ февраль’ ирийна си’’ивумдей яӈганя толыркана Полина Александровна самляӈг ю’’ помда ядтась. Пыда няюв’ тарця лаханавав’ танясь.

Большакова: Мань Холгов’ терам’. Небяв’ Анна Изосимовна, пыда ӈэсынана школахана манзарась; нисяв’ Александр Филиппович совхозхана миртяӈэ’ ӈока по’’ манзарась. Мань’ нин’’ Бугринохона иле’’, не няв’ Ольга Александровна Холговхана иле, хар’’на ӈэсыхана школахана тохолкодаӈэ’ манзара. Сидя хасава’ няв Изосим, Владимир, пыди’ ӈоб таняна илеӈаха’. Хасава няхаюн’ хардана илеӈаха’, таняна манзараӈаха’.

Мань’ маркана школа - интернатхана нюртей классхад ю’’ по’’ ямбан тоходанамась. Хар’’на яханана ӈарка школава яӈгусь, ӈодьбянда мал ӈацекына’’ март’ тоходанвась турцеты’’. По’’ ямбан таремъюв’ миӈа’’. Мань’ ӈод нин’’ няюв’ маркана тоходанамась. Хардахана пилибт’ харвасетыва’’. Хусувэй та’ каникул’ мальӈгана маня’’ хоян’ тэворцетыва’’. Таняна не някав’ Ион Иванович Ардеев манзарась, тыбэртяӈэ’ тарась. Пухуцяда Роза Алексеевна нисян’ ня, пыди’ мякнанди’ мэсьтыва’’. Хойхана ёльце сава  ӈэсьты. Роза Ивановна, Ион Иванович мякнанди’ пилибт’ хари’’ вадаривна лаханасьты’’. Маня’’ ӈод’ ненэця’ вадаривна поӈгнана лаханасьтыва’’. Маркана школахана тоходанвана мальӈгана няна’’ тарем’ лаханасьты’’: хари’’ вадавнанда нёда’’ лахана’’, луца’’ вадавна лаханада’’. Ӈодьбянда харн’ вадав’ юр’’ хацявась. Хойхана мэбнана та’ ямбан хар’’на’’ вадава намдурцетыва’’, ненэця’ вадаривна лаханасьтыва’’. Нин’’ хэвхана илесь вадав’ сававна тохолавась, теда

ӈод пилибт’ лаханам’. Харн’ ненэця’ вада тохолкодаӈэ’ манзарам’, ӈацекы’’ тохолабим’.

Корр: Оин Иванович пухуцянда’ ня ӈацекыди’ мал’’ лаханаван’ хабе’’, нюдякодандо’ тохолавы’’ ним’ ӈа’’?

- Роза Алексеевна, Ион Иванович ӈацекыди’ мал’’ сававна лаханорӈа’’, вадамдо’ мэне’’, харто’ яханандо’ иле’’, манзара’’. Пыдо’ илевандо’ ямбан харто’ вадавнандо’ лаханорӈа’’. Тарем’ ӈэбта нив’ тара’’. Мякана хари’’ вадавна лаханась, ӈацекыдо’ нися, небя тохолабнандо’ тара. Вадам’ намдурць, хусувэр’ лаханаӈгу.

Мань’ теда маркана санаторной школахана манзарам’. Ненэця’ вадам’ пэрӈам’, ӈацекына няюв’ конкурсхана манзарасьтыва’’, лаханаком’ пэрцетыва’’, хобцоко’’ хобсетыва’’, хыноцетыва’’. Ӈацекына школанана мал’’ ненэця’ вадам’ пэрӈа’’, харвась’ тоходана’’. Толанзёсьты’’, паднасьты’’, лаханасьты’’. Ӈацекына школанана ӈока’’. Пыдо’ округна ӈэсыхыт’ тобэй’’, маркад’ турта’’ таня’’. Нельмин Носхад’, Бугриноход’, Каратайкахад’, Варнекхад’ тюку по’ таня. Хануй’’  ӈацекы’’ няюв’ манзарава’’. Маня’’ школаханана хуркари’’ тенз’ мэта’’ малӈэ’ ненэця’ вадам’ тохолаби’’, нянандо’ мэкад’, харвась’ манзарасьты’’.