Тюку яля’ « Петров луца’ вадавы – Вэра’ ӈацекы.» ярабц’ тамна ӈопой’ пелям’ толада’’. Тикы ярабцм’ паднана ненэць’ Няю Вэнго хэвхы округханана ненэцие’ вадавна ӈадимберта газетахана манзара. Хари’’ яхананда илена’’ ненэцяӈгат’ ховы’’ ярабцада’’ маля тянё ни’’ӈа’’. 

Сэвни’’ ӈадимзь Ид’ Ерв’ пелей’ няна мэвэдм’. Петров луца няби ӈудахадани’ тамна си’’ми’ ня’’амбавы. Ӈамдбани’ ӈод’’ сея’ хэвхана хора няк’’я таня мэвы. Няби манада яӈговы. Сепни’ мю’ ӈударими’ хая. Хора няк’ манам’ нянда мов. Манада яханда талкада, невхы ӈыхында наӈэдяӈэ ха’’мы’’. Нянда хэвхана хора ӈарти’ таня мэвы. Няби манада ӈобтарем’ яӈговы. Сепни’ мюд ӈартини’ манам’ тюхалӈав. Манасядан’ мов. Ӈани’ ӈобтикы яханда талкада. Хора тивтей ӈани’ таня тикахана мэвы. Манамда ӈани’ нянда мов. Мэлва яханда талкада. Ёндар’ масьнё’’: - Яханди’ хаяди’. Хора тивтей, няхаюд яханди’ ханахаюн. Петров луца тивтейм’ нёмда ня’’марпю’. Ӈудада ся’’мэй.

Хора тивтей пин’ хамедэй’’. Мань тарем’ мадм’: - Петров луца, инзеленаси’’, хора тивтейм’ нёр ня’’марпю’’. Тиканда хора тивтей сидни’ ӈани’ нюхалемба пя. И’’амня миндахана’’ нерняӈы ява’’ ӈадимя. Хора тивтей хасуй мран’ выцдада. Мадорота яха’ ня’’авувна танавэна’’. Ян’ тэвхава тивтейми’ пуня’ ӈэдарав. Тивтейни’ хэсь мани’ хой’ ня’ яхам’ танда ялъяни’. Пон’ нини’ яд’: ӈарвэ’’ни’ ӈыл’ солотэм’ сядотам’ ӈуда’ есям’ манэ’’ӈадм’. Тикым’ ня’’мав. Тюку ӈуда’ еся Ёндар’ не ню’ ӈуда’ еся ӈэвы. Ӈуда’ есям’ ня’’амвани’ сер’ синё саркабтэй’’. Петров луца маси: - Ӈамгэм’ ня’’ман? Синё саркабтэйнё’’? Ӈамгэри’’нёд ня’’марпю’’! Ня’’мвэр’ ян’ мод!

Мань тарем’мадм’: - Ня’’амвэми яӈгу – ӈэми’ тапхалъяць. Синё’ помна  ядэртахани’ мани’ юхуни’ Екар ханямна ядэртакэни’, ӈамгэхэрт мядм’ хось я’’амани’. Няхар’’ по’’ ёхоборӈани’. Петров луца хонё’’мянда сер’ луца хонаравы’’. Тикы яхад ӈани’ ялъяв’’. Ӈамгэхарт мядм’, ненэцям’ хось вударадм’. Няхар’’ по’ ӈэсонзь синё’ вэхэра мядэми’ хов. Ты’’ни’ ӈудм’ нёдалӈадм’. Сянад хунад ядбани’ ӈод’’ Мадорота яха нярхалъй’’. Яха’ малхана пясавэй сохо танявы. Пясавэй сохо’ яля’ няӈы ядхад я’ хора’ нямд’ мал сарковы. Я’ нямдам’ тальня’ нэкалӈав. Сюдбя’’ я мя’’ ӈэвы. Мят’ мятюдм’. Сюдбя’ си’’ив ню’’ ту’ хэвхана тиври’’ салвары’’. Сюдбя вэсако пыда тарем’ ма: - Вэра’ ӈацекы, тохоявэн.

Мань тарем’ мадм’: - Тыни’ хая’’. – Понарка’ яӈгун, сян ю’’ по’’ хэвакы’’? – Ӈанова’’ тахарась. – Нер тюковна хаясь. Лабарта ханадась, теда’ лахана мякнанда иле. Мякнани’ сеӈг’’махаданд ханданава.

Сюдбя’ пухуця ӈайта хабартам’ едан ю’’ӈада. Едва’’ пи. Ӈавормаханана’’ хара вуни таня’. Мань тарем’ мадм’: -Лабартам’ пяб’’нани’ тыра’ хэвӈэ тараӈгобтав’?

Пыда тарем’ ма: - Ханядм’ тара’’. Ӈаворма ӈэ’’нив’. Тедарихав’ харт ханданава. Мань пумнанд хар’’ни’ тутадм’. Яляни’ ялэмзь ты’’ ӈуд’ мюмня ӈани’ ялъяв’’. Сянад хунад ядбани’ ӈод’’ ялям’ нидм’ тола’’.

Малда тамна ни’’ӈа.