Вы здесь

Таславы’’ сер’’ ӈокаць

Ӈока'' тарана'' сер'' таславы''

Маня’’ округва нянэй ненэцие’’ илесь я’. Нянэй ненэця’’ сян юр’’ по’’ ямбан харто’ тыдо’ пэрць вымна мюсерӈа’’, нюдо’ вадаби’’, ямдо’ лэтби’’. Тарем’ пилибт’ ӈась, тарем’ нерня ӈод ӈэбнанда нив’ тара’’. Валакада тарем’ маниесь, пудана’’ похо’’на си’’ив ёнаркад’ вата нянэй ненэцяӈгат’ валакада ёнаркад’ ватамбой хибярива хойхана мюсерць иле’’.

 Ӈани’’ ненэця тенз’ мэтина харад’ илм’ мэ’’ӈа’’, луца’’ манзаяха’’на’’ манзара’’. Тарем’ ӈэбнанда ӈод’ хибярина харто’ вадамдо’ мэ’’ӈадо’, ӈацекына вадам’ округна няхар’’ яӈганя школахана тохолабидо’. Ненэця’ вадам’ минрена’’ тохолкодина харвась, ив’ ер манзара’’. Ненэцие’’ культурам’ нерня минрена хибярина’’ ӈод харто’ манзаямдо’ сававна пэрӈадо’. Тикы поӈгана ненэця’ илевахана тоенась миндя’’ сер’’ тамна тянё ни’’ӈа’’. Ханярина манзаясьда хибярина’’ ӈадиберӈа’’, ӈокаюв’ ӈэсыхына илена’’ нина’’ недбидо’ нюдя’’. Едэй школа’, садик’, культура’ харад’ ни’’ сертабю’’, ӈэсыхына илена’’ хибярина ӈокаювдо’ невхы хардаха’’на’’ иле’’.  Мал’’ тарця серу’’ хибярина ваеравы яляхана маркана ваеравы ма’’лёвахана таслабидось.

Ты’’ сие ниць ирийна нертей’ толыркана  Няръяна маркана маня’’ яханана ӈэрм’ я’ тер’’ толырто’ тянё ненэця’’ ма’’лёва ваерась. Ханяна округна ӈэсыхыт’ товы’’ хибяри’’ ненэцие’ илӈгад’ перена серу’’ тасламбиць. Тюкумэвахана ваеравы ӈарка ма’’лёван’ ӈокханда самляӈг ю’’ сидя делегат’’ сидя хасую’’ ӈэсыхыт’ товндаць. Тикы нерцюна округна хусувэй  ӈэсыхына, маркана илена’’ хибяри’’ ма’’лёвидо’ мэ’’ӈаць, таняна съездан’ товнда нидо’ нюмдець. Тикы хибяри’’ харто’ илесь яханандо’ танеда’’ тоенана’’ серудо’ ваеравнда ма’’лёвахана ваде’’мандо’ е’’эмня.

Ӈокханда округна толырто’ тянё ненэцие’ нертей съездхана самляӈг’ юкад’ вата хибяри’’ манзараць.  Яля’ ямбан таславнда’’ сер’’ тянё ниць’’ӈа’’. Ненэця’ съездхана няхар’’ секцияхана манзараць’’. Ханяна хибярина’’ тюку ялян’ таславахана илӈгана сямянд’ тарана серу’’ манэ’’сарӈаць’’. Ханзер’’ яханана толырто’ тянё’’ ненэця’ илм’ саваркаӈэ’ сертась? Тикы’ нямна ненэця’’ ӈобкана ма’’лась лаханаць’’. Хибярина хусувэй таславы серудо’ ив’ ер манэ’’саръядонзь. Ненэця’ вада, культура’, образование’ секцияхана тикы серуна нерня минревам’ ваде’’ӈаць, хойхана мюсерта’’ ненэциена илм’, нерня манзаравам’ нябю’ секцияхана манэ’’сарӈаць, тикахад’ тамна ӈопой секцияхана маня’’ округханана толырто’ тянё ненэцие’ илм’ савумдабвам’, тарця ненэцие’ нядабавам’ манэ’’сарӈаць. Округна ерв’’ секцияхана манзараць, пыдо’ яндахат’ товы’’ хибярина’’ хонаркован’ харто’ вадидо’ хэтаць.

Хусувэй съездхана манэ’’сарманда сер’’  хусувэй делегат’ тованда нерцю харта яхананда илена’’ нита’’ няюв таслабидась. Нина’’ ваеравы съездан’ хамадёсь’ товыць’’. Харто’, ив’ ер таславы’’ предложениидо’ тэвравыць, ма’’лёвахана ваде’’ядонзь’. Съездава сава сёнзяхана ваерась, нись’ поеларамбю’’ манзаяда миӈась. Яля’ ямбан ӈока тарана’’ серм’ нина’’ таслаць. Нэрм’ ненэцие’ нертей ма’’лёвахана таславы серу’’ нямна  делегатна’’ резолюциям’ ня’’амаць’’. Таня’’ падвы серо’’мана илевава нерня минреӈгува’’.

Ма’’лёвахана таславы серу’’ нямна тамна паднаӈгува’’.