Вы здесь

Сие’’ ниць, варӈэ иры

Нянэй ненэця’ илӈгана хусувэй ирийна харта нюмда таня. Тарем’ илева сер’ миӈа. Теда мэта ирийна ӈоб харта нюмда таня. Хибяхова’’ сие’’ ирийӈэ’ нюмдебидо’, хибяхова’’ варӈэ’ ирийӈэ’. Тюку ирий’ нямна Раиса Яптуне тарем’ падна.

Ялэда навэд ну ялэ тебта ибевор ӈа, хаерад явохад сыра торма, нюлкаӈэ ӈавэд

ханӈа. Тюку ирыхана ханяӈэхна мер нисерта яхадей ӈадиберӈа, ӈадьбята я’’мидкана тюку иры тарем нюмзевы ӈэдакы. Мер соявы суляко’ хурина илена ниӈа’, тесьдя минханта хадабиду. Ӈэрм нув тамна явкабцю ним, яхадико нюдю’ ӈадьбята хурина вуниду’ лэтрамбю. Тарем ӈод хаерако ну ялэ’ тебта тюури миӈа. Выӈганатнумта нарма мале сэвхана ӈади. Сыранта ний пэвсюм нянанянзикоко салабаӈэ ханӈа. Хурина нарма няна вы’’тер ненэця’ ниту мядомана ядерӈа, ӈэвтана ненэця’ ӈэвтама.

Тюку иры ӈэвана ты’ варёхна ет хурид варӈэ ӈамторӈа. Ӈадьбата тамна варӈэ ирым нюбес ним ты ниць иры. Хубтахна хурид варӈэ тёр су ним ты хадо’ няад. Невхи ненэцяи вадана варӈэ тёрм намбат нумта нарэйвм нив. Хурина варӈэ лабтан ӈамторбату – нара мер мэӈгуда, хэм нара ӈэӈгу. Седа’ ӈэва ни сабнанту – ямб нарам пэрӈа. Сава яля ерня варӈэ’ манталӈэ нув сёр’хана тёрсавэй тирпнанту – тебтаад няна хаерад ялям пэрӈа. Хурина пили нерде Тувы варӈэ ненэця мядхэван сабнанта, тад тикад ӈарка’ явана сёнта  ӈардан тёрыбата – нарма няна яха’ ид’ минханту хэӈгадаӈгу, нара мер мэӈгуда, сырада меэр холкаӈгу.

Сия ниць ирыхана хабт, хора’ нямтоду’ хаморӈа. Тикыту’ ӈылминханта моракоця ӈадиберӈа. Ты’ ниць иры ёльцяӈгана мале нямтотана хабт, хора’ юӈгу ним, ӈопой яхьдейко’ нямтоду маӈгты иры ёльцяӈгана хаморӈа. Сия ниць ирыхана ялэта’ ӈаюворб – танта саре ӈэӈгу. Тад тикад етри нянз ӈэбнанта – ӈоб тарем саре там пэрӈа, ямб нарам.

Хурина сава хаерад яля еркана лакри пэвдя тир’ хаерадм синтабату – тад хуняна нумта хадумта. Ябтакоку еӈглюс тир нумӈгана ӈадимб – хадда пи’’ сер сумта. Вы’’ тер ненэця сия ниць ирыхана амгэ мянувна таӈгворӈа, та’’ ёльцяӈгана мале сабе ӈарка манзаяду юӈгу. Суютаӈго пэванту нерцюна харадан ядерӈа, янамбовна ӈаврадду ӈахакуд тэмтаби, ниту мядомана ядерӈа, хибядя’ ёду’ ханомба ядерӈа.

Сыра’ ваӈг’ хоркадёку хоркыця’ нёраку’’ӈа,

Тэдарев’ нявотарӈа – ӈаворман’ харванакэ’’.

Вы’ ява’’ маймбинё,

Хаерат’ сырӈанё,

Пыхыдамта юдабинё’’.

Манзаида сертабинё’’.