Хусувэй тенз’ мэта хибяри’’ харто’ вададо’, культурадо’ таня. Тикы’ серм’ хибярир’ нюдякоданда минреда. Вадамда намдурпата лаханась тухуда, сём намдурпата хыно’’та, вадакон’ нюдякоданда инзелебнанда вадаком’ мэта.

Хари’’ вадам’ теневава’’ ӈарка сер’. Сянад’ вада иле, хари’’ тенз’ ӈэвар ӈадьгу. Вада’ яӈгоб мал’’ хибяри’’ ӈоб’ то’’олсаӈэ’ ханта’’. Яханана нянэй ненэця’’ тарця’ серм’ хамадабась иле’’. Вадамдо’ тю’’у ныхыто’ пирувна минредо’. Тарем’ ӈод Несьхана илена’’ не’’ манзара’’. Пыдо’ ӈэсынандо’ ӈацекыдо’ вадамдо’ школахана тохолабидо’. Тикахад’ ӈокаюв’ ненэциедо’ хойхана мюсерта’’ ненэця’’. Пыдо’ нюкцидо’ тамна лахана’’, вадамдо’ теневадо’. Хойхана мюсерць’ хари’’ паныдо’, пибидо’, савидо’ мэ’’ӈа’’, ӈаворидо’ лэтбидо’. Культура’ хардахана манзарана хибяридо’ ӈод мел’’ хибярито’ няюв’ манзара’’, харто’ нидо’ хыно’’манзь ма’’ламбидо’. Сян по’’ тяхана «Сава не’’» группадо’ ӈадимясь. Таняна ма’’люрта не’’ малӈэ’ хынокад’. Няръяна март’ пыдо’ нюртеймэвна сян по’’ тяхана тыбэртина’’ «Сямянхат’ мерета» сянакован’ турӈаць. Пыдо’ сёмдо’ тыбэртина пирдырма яляхана нюрте намдаваць. Тарця яляхад сян по’’ ваера. Не’’ нерня ӈод манзаямдо’ минредо’, едэй хынс’’ тохолаби’’.

Тюку по’ ваеравы «Сава сё» фольклорный фестивалькана Несьхад’ товы не’’ ӈани’’ хыно’’манзь март’ товыць. Пыдо’ пэдоваць. Несэй хынс’ тэвраць. Сямянд хынокад’ Елизавета Григорьевна Бобрикова, пыда небя’ хасанда хынс’ нита’’ няюв’ тохолавыць. Елизавета Григорьевна’ хавна «Сава нехэна’» теда хынота’’ – Людмила Максимовна Канюкова, Наталья Федоровна Латышева, Анна Егоровна Сулентьева, Вокуева Дарина,Бобрикова Мария. Мал’’ пыдо ӈарка манзаям’ пэрӈа. Харто’ культурамдо’ тю’’у минре’’, невхы хынс’’ илелтемби’’.