Маня’’ яханана «Ясавэй» нюбета ассоциациява сидя ю’’ мат’’ по’’ ямбан манзаямда минреда. Ӈэрм’ тенз’ ненэцие’’ хусувэй серкана нядабава’’ е’’эмня таӈок’’ по’’ тяхана ӈадимдевысь.

Сидя ю’’ мат’’ по’’ ямбан хусувэй ӈэсыхына ассоциацияхад’ перена’’ отделения’’ манзара’’, хуний харто’ яханандо’ тарана серу’’ тасламби’’, харто’ нидо’ нядаби’’. Тарця отделение маркана ӈод’ таня. Хаювы си’’ив самлязимдей яляхана маркы отделение’ ма’’лёвам’ мэ’’ӈаваць. Ханзер’’ таняна манзаидо’ няхар’’ по’’ ямбан миӈаць, тикым’ Елена Канюкова хэтадась. Ма’’лёван’ товы’’ хибяри’’ самляӈг юкад’ ва’’ӈаць. Ханяӈыдо’ тарця ма’’лёвахана ӈани’’ лаханаць. Тикахад’ маркы отделение манзаям’ нерня минревнда хибяри’’ тэраць, ӈокханда си’’ив хибярива таняна манзарагу’’.

Ты’’ниць ирийна сиднтетимдей яӈганя яляхана «Ясавэйна» Совет ма’’люрӈась, манзаямда Юрий Хатанзейский минредась. Нокханда Советхана ю’’ хибяри’’ манзарагу’’, си’’ивдо’ Совет старейшин манзаям’ пэрта’’. Ваеравы ма’’лёвахана хусувэй нерня манзарава нямна вадам’ мэ’’ӈась. Тикахад’ Совет’ старейшин’ манзаям нерня пэртям’ пэрраць, тикы манзаям’ пэртяӈэ’ Пётр Ледков тарагу. Ненэцие школа-интернат’ ервота Людмила Пашкина Советан’ турӈась, хурка серкана сиддо’ нядась’ таранарха’, тикы нямна вадам’ хэтась. Нерняна товнда яля’’хана Советхана мэна’’ хибяри’’ школан’ ядэрта’’, ӈацекы’’ няюв’ лаханаӈгу’’. Ассоциация’ Совет ирыхына ӈопоймэвна ма’’люрта.