Сидя ю’’ самляӈг по’’ тяхана Россиянана Всероссийской ассоциациява ӈадимясь. Тамальӈгана Москва’ маркана нюртей ма’’лёвава ваерась.

Ӈэрм’ яхана, Сибирь’, Дальний Восток’ няна илена’’ толырто’ тянё ненэця’’ тоена минда’’ серудо’ сававна таслава е’’эмня ӈобт’ ма’’лэйдаць. Тарем’ маля сидя ю’’ самляӈг по’’ ямбан манзара’’. Хусувэй тет по’’ ваерась Россия’ еркы маркана ӈобт’ ма’’лась ӈарка ма’’лёйкана сертавы’’ манзаидо’ таслабсеты’’. Таӈок по’’ ямбан толырто’ тянё ненэця’’ мэёвна харто’ яханандо’ иле’’, хэвняхад’ няд’’мам’ нись’ ӈате’’ харто’ ямдо’ сахарамбась нерняри’’ миӈа’’. Ӈэрм’ ненэця’’ илевахана ӈод’ несэй ӈамгари’’ ӈадиберӈа’’. Ханярина маня’’ хибярина поӈгана ервуна манзара’’, хар’’на’’ депутатна’’ таня, янда’’хана ненэциена семейно-родовой общины’’ нэмби’’. Тикы едэй ил’, тарем’ ӈэбнанда нив’ тара. Яханана манзарана’’ ассоциациина таня, хуний ненэцие’’ нядабава е’’эмня манзара’’.

Мэта си’’ивна самлязимдей толыркана Москва маркана ӈарка ассоциацияна со’’яма ялям’ мэта’’. Маня’’ округна делегация’ ӈод таня ӈэдалэяць. Таняхад’ тось вадидо’ няна’’ хэтгудо’.