Няръяна маркана ӈока теневана’’ нина’’ иле’’, хуний нядана со’’яма яляханандо’ сава вади’’ намдувнда’’. Ӈокаюв’ тарця нина’’ маля ӈарка хибяри’’. Пыдо’ илевандо’ ямбан ӈокавна манзаравы’’, теда маля нись манзара’’ тэри’ тарем’ ӈамгахэрт’ нись пэр’’ нисьты’’ ӈамдю’’.
Тарця нина’’ хасенавам’ ехэрасьты’’. Пыдо’ пиликов манзаядамдо’ хосьты’’. Тарця не’’ поӈгана мань Федосья Семеновна Кауц нюмдегудм. Харта тензда Коскова ӈэвысь. Пыда ёнар’’ хасуюр’’ няхар’’ ю’’ си’’ ивдей похона Нюдя яхана мюсерта’’ ненэцие’’ мякана соявысь. Сайнорма поӈэ хэсь нисяда сайнормась хэвысь, тарем сайнормы яхана юнси юховысь. Нюда’’ вадёсь тенад ехэра – ханяна нися’ хасандо лэкцида сюры. Нисяси’ вадюданась незелта яӈгусь. Тарем’ ӈод Федосья Семеновна ӈацекы ӈэ’’мяхаданда нерняри миӈась. Школахана тоходанась, тикахад Саляхардахана зоотехникӈэ тоходанась. Ёнар’’ хасуюр’’ самляӈг ю’’ тетимдей поход харта яхананда манзарась. Хуркари’’ манзаяхана манзарась пыда мэрецеты, ӈамгахэрт манзаям нисьты волтамбю. Ӈока по’’ ямбан Федосья Семеновна Кауц Саляхана Советандо’ серм’ пэртяӈэ тарась. Таняна манзараванда мальӈгана ханяримна ӈэдалёрцеты, хари’ сэвхана маниесь ненэцие’’ илм’ теневаван’ харвадась. Хойхана мюсерта’’ нита’’ няюв понанда сянмэвна тэворцеты.
Пенсиян’ тарпась Федосья Семеновна Няръяна март илелъяць, маля ӈахакуд округна еркы маркана иле. Хардахананда мэбнанда сэдорасьты, тикахад ӈока по’’ ямбан «Илебц» театрхана сянакусь. Пыда нянэй ненэцие невхы илм теневана, харта вадамда мэта. Небяданда,хадахаданда намдвы невхы хынс’’ тенена, мал тикым нерняна илевнда ненэцяӈга тэвраван’ харвэйда. Пудана сидя по ямбан «Ханебцём» нюбета фольклорный группахана хыно’’ӈа. Хуркари’’ серкана мел’’ нява тюку ирий сидя ю’’ самлязимдей толыркана со’’яма ялямда мэта. Тюку по’ си’’ив ю’’ си’’ив поданда хантана. Маля ӈарка не, тарем’ ӈод хасенавам ехэра – нерня сертавнда планда тамна нюдя ни’’ӈа.
Тюку яля Федосья Семеновна Кауцан’ тарця вади’’ хэтбидм: со’’яма ялямд’ сава ихиня ядабтад, нён хаӈгур, ябда иле, нюд, нют ню’’ сит пилиб нядабая! Нерня ӈод ненэцие вадава, культурава нерня пэрма серкана пон тамна манзара.
