Ты’’ сие ниць ирийна сидя ю’’ няхарамдэй толыркана Москва маркана «Сокровища Севера» нюбета Международной выставка манзаямда нэӈгуда. Тюку по’ тарця выставка хасуюдимдеймэвна ваераӈгу.

Маня’’ округна хибяри’’ хусувэй по таняна манзаравась ӈэдалёрцеты’’. Хибя тюку по’ ӈарка март’ ӈэдалаӈгуд? Тарця серу ваеравы яляхана ӈэрм’ тенз’’ ненэцие’’ серу тасламбада управлениехэна манзарана’’ нина’’ тасладонзь. «Сокровища Севера» хусувэй по’ танесеты, яндат’’ товы’’ хибяри’’ ӈобт ма’’лабсеты’’. Ӈэрм яхана илена’’, хуркари’’ тенз’’ мэта’’ ненэця’’ харто’ иламдо’, манзаравамдо’, культурамдо’, мел’’ ӈэвамдо’ манэ’’ лабтавась ма’’люрцеты’’. Тюку по’ӈэрм яхад’ товы’’ хибяри’’ харто’ яханандо’ сертамбада’’ ӈаврадо’ мирдапгу’’, тикахад яханандо’ туризм’’ серудо’ ханзер’’ мимам ваде’’та’’, ханярид’ товы’’ ненэця’’ национальные художественные промыслы нямна лаханаӈгу’’. Маня’’ округва хусувэй по’ тарця выставкахана танесеты. 2014 по’ «Сокровища Севера» выставка-ярмарка тюку по’ манзаямда тей яля нэдась. Округхадана делегациява маля ӈэдалэяць. Тюку мэвахана таняна манзара’’ – округна администрация ӈэрм’ тенз’’ ненэцие’’ серу’’ тасламбада управлениена манзарана’’, тикахад Заполярный районхад нина’’ таня, этно-культурный центрхана манзарана’’, семейно-родовой общинахана манзаранина хаяць, мел’’ ненэциена харто’ манзаидо’ таняна манэ’’лабтабаӈгу’’, «Хаяркана» тарана’’, сё’’ мэта’’ ненэциена харто’ программамдо’ ханаць. Хусувэй выставкан’ товы’’ хибяри’’ харто’ ямдо’ манэ’’лабтаӈгу’’. Маня’’ нина’’ нянэй ненэцие’’ ила’ нямна вадидо’ мэта’’, ненэця’’ традиции’’, культура нямна лаханаӈгу’’, мел’’ ненэциена’’ манзаи’’ манэ’’лабтаӈгу’’, ӈамза комбинатхана сертамбада’’ ӈавор’’ танеӈгу’’, тикы нямна нани’’ вада’’ танеӈгу’’. Тикахад выставкахана сямянд’ сававна хамандавы экспозициям тэрабаӈгу. Маня’’ округхадана ӈэдалавы’’ мел’’ нина’’ ӈани’’ яхат’ товы’’ нито’ манзаи’’ манэ’’та’’, сертабада манзаито’ нямна нито’ няюв’ лаханаӈгу’’, тикахад мастер-класс манэ’’та’’, тикахад харто’ сертавы’’ манзаидо’ ваеравнда конкурс’ «Сувенирные изделия», «Изделия из меха и кожи», «Национальная одежда» номинацияхана манэ’’лабтангудо’. «Хаяр» ансамблява хамандавы манзаида «Кочевье Севера» нюбета ӈэрм’ тенз’’ ненэцие’’ культура фестивалькана манэ’’ лабтаӈгудо’. Тикы е’’эмня нина’’ несэй программам’ хамандаць, несэй тарабцо’ хамадаць, едэй сё тохолаць.

«Сокровища Севера» хасуюдимдей фестиваль программада ӈарка. Сян яля’’ ямбан ханярид’ товы’’ хибяри’’ манзаравнда, ӈока несэй ӈамгэм манэ’’та’’, тикахад ӈэрм’ тенз’’ ненэцие’’ ила нямна ма’’лёвадо’ танеӈгу, хуркари конференция’’ манзараӈгу’’, презентация’’ ваераӈгу’’, сян’ тенз’’ ма’’лёва’’ танеӈгу’’.

Тюку по’ выставка самляӈг яля’’ манзараӈгу. Сидя ю’’ си’’ивумдей толыркана гала-концерт ваераӈгу, яндат’ товы’’ хибярихит’ сямянд мел’’ хибяридо’ нюмдеӈгу, тамна нерня ма’’лёвамдо’ ӈобкана таслаӈгу’’.