Вы здесь

Ты’’ ниць иры

Нянэй ненэця’ илӈгана хусувэй ирийна  нюмда таня. Тарем’ илева сер’ миӈа. Теда мэта ирийна ӈоб харта нюмда таня. Те’ ёльцяӈгана хойхана ты’’ ниць  ёльць’, ирийва’ӈод ты’’ниць ирийӈэ’ нюмдебада. Тикы ирий’ Раиса Яптуне тарем’ падбида.

Ты’’ ниць ирыхад нумта нарэйма нинававна савовна ӈадю нив. Вымна мюсярта ненэця суютаӈго пэяд. Ты’ хадо’’ няана ӈобкад туррота’  суляко. Ханяӈы ненэця’ мале иры ӈэвана яхадэйду тэрабиду хабтхат. Тамна ӈавхи илаӈгана пили нердена сую  соямахад нумт ненэця’’ ханоторӈа, хэхэвду’ ханко’ ханомби. Ханонтава яляна мякна ӈэдана хэхэсиду’ ӈоб тарем пин ӈадимзех’я хан’’ӈэ хадабада ты ёнг тяхмана ненэця’ подтамби. Ханм хадабаванту сер нум ервахад тад нерня ябдамту хынумбю ним.

Хурина нарма няана ты пэрця’ суюту еэмня лабтад яхна ӈэда хадохоту ӈысурӈа. Пили нерденна сую’’ ялян ӈадивомарихид седа ӈэва ниня ханебцё ӈоб тарем пидянты ни ӈамторӈа, нердена сарнюмта хомахаданта ну ялэ тебта пидянта ниня ӈамзёда ханебцё сибяко. Хурка нувода тамна тецьбату ӈод ханебцё пидянта мюй ӈарханта тонтавы яйянта таркат ныдмыда нянзахатата’. Тад нерня тет’ сарнюдя амгэрт тецьдяхад ехэраӈгу, небяду сидду пилипон ӈамталбаӈгу нив. Невхы ненэцяи вадана ханебцё тетхад тянё сарнюм хобнанта ямб нара ӈэӈгу. Илеванта ямбан тикы нув сармик падрида ӈэрм яхна хаюр сыранта ямбан хадм, ӈэрм тецьдям палеби. Ӈади вадана тад ӈэванта сыра ямбан ӈэрм нуво’ пэрпата ханебцё яланта ӈопой нюдюм вадяӈгу. Хурина сава яля еркад лакри ханебцё ӈаркая’’вана седа ӈэва нид тёрылабнанта – хад, ӈэрм яля пэрӈа. Селбя няана вэба иры пуданахана ханебцё ханикоця’ тоду’ тамна ниб’’нанту хана – тад ӈадиманта сырана ӈэрм нуво пэрӈа, тад тикад нохо’’ писякоця’ тянё ӈэӈгу.

Ты’’ ниць ирыхана хорки сыра ямбан манталаӈэ тирумахданту’ туда ян лядурӈа’. Ты’ хадо’ помна мале сидлад тирӈа, тад тикад сибякоту еэмня хуна’’тня латрмасавэй омнанту теберӈа хора хорки. Сэвту’ ний няравахна падтавэдарев мале сие’’ ниць ирыхына ханӈа. Хоркыця’ ну ялэ тебта ты’ хадомана тылэрӈа. Нарма няана ненэця’ ӈотаӈод еданту тераӈэ хоркири хадабю ӈани нув’’ сармик това ёльцянт. Хурина хора хорки’ латрёсавэй  явкабта помнанту тебелава ӈайм пэрӈа.

Мякна ненэцяи илеванту ямбан хэвхана илена вэняко’, ты’ ӈоб тарем тасламбиду’ амгэ толха яля ӈэвам. Хурина вэняко’, ты’ ӈоб тарем тасламбиду’ амгэ толха яля ӈэвам. Хурина вэняко помнанту сянакованту’ сер сыра ниня масэлабнанту, тарта халтамбадрев – тебтадняана нумта хадумта. Вэняко лясё, лэнта ямбадан вэӈгалё вэнэлабнанта иба нувм пэрӈа. Яля ямбан ӈопой яхна ванабта, хонёбта тцьдя ял’ тута’. Вэно’ тёр’ няби’ ё вэт сооб, тикана иба’ хадӈэ ханта. Вэн’ ту’’ хэван саб ӈоб тарем тецьдям пэрӈа.