Нянэй не хуркари’’ манзаям’ пирдалесь мян’’ӈа. Хуркахарт’ манзаяхад’ сейда ни’ пин. Тарем ӈод Наталья Федоровна Латышева. Пыда Несь ӈэсыхына иле, таняна Дом народного творчества нерм’ пэртяӈэ’ тара. Тикы манзаямда маля ӈахэт’ минреда, культурахана пилибт манзара. Манзаямда мэнена, теневана не.
Тикы’ хавна Наталья Федоровна общественной манзаяхад’ нисьты хадю’’, теда пыда ӈэсынанда «Ясавэй» ассоциацияна отделение’ манзаям’ нерня минренаӈэ’ тэравы. Ассоциацияна ты’ сие ниць ирий нертей яляхана ваеравы ма’’лёвахана Наталья Федоровна маркана манзарась, тамальӈгана пыда няюв’ лаханорӈамась. Лаханась няв’ ӈока сер’’ нямна хонрабивась.
Корр: Наталья Федоровна, ӈамгэ яхад’ тосан, ханяна илен’, ханяна манзаран’?
Латышева: Мань’ Несьхад’ томась, Дом народного творчества мякана ервӈэ’ манзарам’.
Корр: Ассоциация’ манзаям’ харт яхананд’ пыдар ӈани пэрӈар’?
- Теда мань’ тарця манзаям’ пэртав’. Тикы’ нерде Анна Егоровна Сулентьева отделенияна манзаям’ сертабидась. Таняна ӈобтарем тарана манзаи’’ нина’’ няюв’ пэртава’’. Мань’ тюку по’ «Ясавэйна» ма’’лёван’ нертеймэвна том’. Теда инзелем’ ӈаву’’ ваде’’ӈа’’, хурка серу’’ тюкохона тасламби’’. Тикахад’ мякан’ то’’омахадан’ хибярихина’’ ваде’’тав’, маня’’ ӈод Несьхана хари’’ манзаява нерня таслаӈгува’’. Тикы е’’мня теда тюкон’ томась, манэ’’тав’: ханзер’’ манзарая’’.
Корр: Пыдар’ культурана манзаран’, ваде’’карт’ ханзер’’ серуда миӈа’’, хурка коллективда таня’’, ненэця’ вадавна хыно’’тида танедакы’’ яхананда?
- Ханя’’, ненэця’ вадавна яӈгартина’’ таня’’. Хойхана мюсерпэй’’ не’’, теда Несьхана илена’’, ханяӈэхэна ма’’ласьтыд’. Яӈгарцетыва’’, тикахад’ турта’’ ӈацекына’’ тохолабива’’ яӈгарць ненэця’ вадавна. Ӈацекы’’ харто’ вадамдо’ намдурпато’, теневабто’.
Корр: Ӈацекыда харванарха’ харто’ вадавнандо’ лаханась?
- Теда мась, харванарха’. Валакада тикада вэварха’, харто’ мякнандо’ тянёвна лахана’’. Нися’’, нея’’, хуний Несьхана илетак тянёвна лахана’’. Мюсертахова’’ ӈокамбова вади’’ тенева’’, харвась’ лахана’’. Мал’’ пыдо’ хой’ илм’ саць со’’ теневадо’. Хоян’ хэван’ ёльце’ харвасеты’’.
Корр: Пыдар’ харт’ хойхана соявэн’, пыдар’ нисяр’, небяр’ хойхана мюсерӈаха’ тарця?
- Ханьда, маня’’ хойхана вадювэва’’. Тамсинда неяв’, нисяв’ мюсерӈаха’. Мань’ мал’’ нин’’ хойхана иле’’, манзара’’. Неяв’ Ольга Артемьевна, теда Латышева, харта тензда Нюровась’. Нисяв’ Латышев Федор Иванович, «Канин» общинана манзара.
Корр: Пыдар’ харт’ хойхана вадювэн’, теда хоян’ тэворцетын’?
- Пудана’’ похо’’на тянёвна мэсьтыдм’ хойхана. Харвава’’ ханям’ харва’’. Манзараяв’ сим’ ня’’амби. Ты’ яляхана таня тэворцетыдм’. Вертолёт сидна’’ ханаӈгудак, хантава’’. Ӈани’ сер ханзер’’ та’ хоян’ тэвӈгун’? Ядась’ хант’ нин’’а, яда’ хубта нив’ ӈа’’.
Тарця лаханакурмав’ Наталья Федоровна Латышева няюв’ хаювы яляхана танясь. Тамальӈгана пыда Няръяна март’ серута’’ нямна турӈась. Наталья Федоровна тамна ӈудида мэта’’ не’. Тарця хибяри’’ е’’эмня масьтынё’’: мел’’ не’. Пыда сэдора’’, ӈудахатата сомбой ӈухуко’’ ӈадиберӈа’’. Сертавы’’ ӈухукуда’’ ӈока’’ маркана танеда’’ выставкаха’’на’’ маниесьтына’’. Тюку яля’’ мальӈгана Наталья Федоровна Москва маркана «Сокровища Севера» ярмарка-выставкахана манзара’’, таня’’ манзаида ӈод’ тэвыдаць.
