Вы здесь

«Икрахана» сайнорпэй

Округханана хусувэй мякад’ сайнорманзь’ хэвы’’ хибяридо’ таняць. Хибяхова’ ирида сайнормакы, хибяхова’ нисяда, хибяхова’ ӈани’ переняда ӈэдакы. Роза Ивановна Канюкова някада’ пилибт’ ихинянда иле.

Небя’ хасанда папако’ Михаил Титович Апицын сайнормахад’ нивысь’ ту. Няканда нямна падвым’ тэврась: – Вэра Михаил, небян’ папакода, мань’ някав’, хэбидя ВОВ сайнормахана мэбэй. Няръяна Маркы’ педучилищехэна тоходанвы ӈацьмбой ненэця’ штрафуймбэй ӈэвахы’ – батальон’ ӈарктаӈэ’ таравысь. Тарця батальон’ ӈарктаӈэ’ саць вэбтый, илхана тид’’миндя’’, падарм’ сававна теневана’’ хибяри’’ тэрабавыць. Михаил Волховской фронт’ тетимдей армияхана мэвысь. Саць пон’ миндя Ленинградской блокадам’ ныкалць тарась. Фашистской саю яӈгумда, питарць тарась. Тикы е’’эмня «Искра» операция ӈадимдебэясь. Сталин’ вада’’амна «Татом’ ненэй ӈарка туӈэ лэямда тара». Ладога то’ хэвхана ӈэда ё’’няна ӈока саюв’’ ма’’ламба пя’’. Январь’ ёнар’’ хасуюёнар’’ тет’’ ю’’ няхарамдэй’ похы ’январь’ нябимдей’ яӈганя’ толыркана саювна’’ немзи’’ саю пирда’’левам’ пяць. Ӈоб’ тикы январь’ сиднтетимдей’ яӈганя’ толыркана Ленинградхы’ блокада ныдпэясь,тикар’ саць ябдана яляӈэ’ хаясь. Немзи’’ сайнорта’’ выдараць, ӈоквадо’ пленан’ еремяць. Ленинградхана мэна’’ таӈга илелъяд’’, ӈорцядар’ яӈгода, ныхысялмбэяр’ савумда. Валакада ӈоб’ тикы ирий’ тетимдей’ яӈганя’ толыркана нёхолпэяд Мелеховской ӈэсы’ хэвхана, Кириши’ маркад нись ӈаха’’на сидя ю’’ сидя потнакое Михаил някав’ хадавэдонзь. Тит ирикэв’ сава пенсиям’ ня’’амбись. Тяхакуна «ошб» нюмгад таютасетым’. Сайнорта’’ штрафник’’ ӈарктахат ва’’лабада’’ ӈэвы’’, военкоматханана’’ нян’ тарем’ маць. Някав’ ӈарктахат’ ха’’аврабэй нивы ӈа’’, лейтенант’ нюмда тюку тендад’ хаебэй. Михаил хасам’ теневана’’ хибяри’’ пон’ саво’’ладонзь, пудана’’ вадидо’ тарця’’ӈэсьты’’: – «Михаил’ хаса’ скрипкахана ненэй хынабцо’’, сё’’ мел’’мана сянако мэцьты.» Округхы’ музейхана Вэра Михаил’, лейтенант’, тяхакуна педучилищехэна тоходанбэй сидяӈгм’ хусувэй турта’’ манэ’’манда мян’’.