Маня’’ яханана мел’’ хибярина ханярина иле’’. Округна хусувэй ӈэсыхына ӈудидо’ мэта’’ нина’’ таня’’, маркана ӈод’ тянё вани’’ӈа’’. Тарця нина’’ манзаи’’ хуркари’’ выставкахана маниесьтына’’, ханяӈэна мел’’ нина’’ мастер-класс’ манэ’’лабтабасьты’’.

Няръяна маркана «Мел’’ нем» нюбета клуб’ маля ӈахакуд’ таня, таняна маркана илена’’ мел’’ не’’ сэдоравась ма’’лёсьты’’. Пыдо’ сертабада’’ манзаидо’ сян’ тенз’’ ӈэсьты’’. Сэдорана’’ не’’ харвась манзарасьты’’. Харто’ сертавы’’ манзаидо’ манэ’’лабтавась ӈудидо’мэта’’ нина’’ ӈани’’ яха’ тэвормадо’ танесеты’’. Ваеравы по’ пудана’’ яля’’ пир’’кана’’ Сыктывкар’ маркана «Еджид кепысь» – ( Сэрако ӈоба’’) нюбета Всероссийский фестиваль народного творчества ваерась. Маня’’ округхадана мел’’ хибярина’’ таняюв’ ӈэдалёрӈаць. Ӈысма я’ еркы маркана самляӈг’ яӈганя регионхад’ мел’’ хибяри’’ турӈаць, хуркари’’ тенз’ мэта ненэця’’ манзаидо’ фестивалян’ тэвравыць. Маня’’ нина’’ таняна саваць, пыдо’ ӈод нердець. Маргарита Латышева «Народная игрушка» номинацияхана нерня’ тарпыць, Людмила Лаптандер «Народный костюм» нюминацияхана нердесь. Пыди’ диплом’ нюртей степени ня’’амӈахась, няд’’маӈэ’ еся’’ сертификат. Таняюв’ тэвормы’’ хибяри’’ вадавна: тюку по’ хамандавы фестиваль’ ёльце сававна ваерась, хибярихи’ ӈока сава ӈамгэм’ манэ’’лабтаць; таняна мэвы’’ хибяри’’ ӈока несэй ӈамгэн’ тухуць. Хусувэй мел’ хибяри мастер-класс’ манэ’’лабтабись. Мел’’ нина’’ няхататто’ тоходанаць. Мел’’ ненэцие’’ фестивалян’ товы’’ хибяри’’ поӈгана тарця ненэця’’ таняць, хуний нянэй ненэця’’ падком’ сэдбаван’ тохован’ харваць. Ханзер’’ «Пад» сэдбада? Тарця манзаям’ хибярихи’ Людмила Лаптандер манэ’’лабтась. Хари’’ ӈудаха’’на’’ сувенирм’ сертабась ӈока хибяри’’ тухуць.

Фестивалькана жюри манзарась. Таняна манзаравы’’ хибяри’’ табековна хусувэй ӈани’ яхад’ товы не тэвравы ӈамгарихит’ манзаям’ сэдбата тарась. Маня’’ яна’ тер нина’’ пэдоваць. Маргарита Латышева паской «Не’ савам’» сэдась, Людмила Лаптандер сэрако’ суюкоця хобакоход’ ӈоба сэдвысь.

Сыктывкаран’ ӈэдалёрмы няхаюна’ маля ӈока по’’ ямбан «Мел’’ не» клубан’ ядэрӈаха’, сэдорась маля сававна теневаӈаха’. Нянэй нехэ’, инянди’ ӈэда манзаямди’ мэнеди’. Людмила Лаптандер Нюдя яхана соявы не, хойхана нивы ӈэбнанда вадюдан’ ӈод хой’ илм’ сававна теневада. Небяда, нисяда, ирида, хадада тэхэна’’ мэвы’’ хибяриць. Нянэй ненэцие’’ вотом’ мэць теда Людмила Васильевна иле, сэдора,вадамда мэ’’ӈа.
– Ӈысма яхад’ маня’’ ӈока мядонзэй’’ тэвраваць, ихиняна саць саварха’. Хар’’на ява’ манэ’’лабтава’’, ненэця’’ сэдоро’ ӈысмаха’ манэ’’лабтава’’.Ӈысма’’ яхана ваеравы фестивалькана Людмила Лаптандер харта сэдвы нояцямда манэ’’лабтась, та’ мальӈгана хойхана не хурка паным’ мэ’’ӈа? Тикым ма’’лавы’’ хибярихи’ ваде’’ӈадась.

Тюку яляха’’на нянэй ненэцие’’ традиции’’ тенева’’, лэтбава’’, нерня минрева’’нямна вада’’ ханярина сосьты’’. «Мел’’ не» клубхана сэдорана не’’ тикым’ серкана манэ’’лабтамбидо’. Пыдо’ невхы ватом’ тенесь иле’’, манзара’’. Тарця серкана нядаӈгодадо’ таня, Марина Маргось маркы’ культура’ харад центр народного и декоративно-прикладного творчества нерм’ пэртя’. Тикы хардахана мел’’ не’’ ӈобкана ма’’лёсьты’’.

Ӈэрёй някуна Марий Эл республикахана фестиваль народного творчества ваераӈгу, таня «Мел’’ не» клубхана сэдорана’’ не’’ маля хамы’’. Харвабнанда’ ханта’’.