Вы здесь

Харючи вэсако

Тюку яля’ «Харючи вэсако» лаханако’ пудана пелям’ толара’’. Хибя тюку лаханаком’ наӈгадяӈэ’ толаван’ харвабнанда. Хаювы яляхана ӈадибермы «Ялумдхана» ӈани’ пелядо’ хоӈгуда’’.

Пин’ тарпыв’’. Нёр Тавысе’’э сидя хабтарканда иням’ ня’’амбида. Ӈэдала’’ ниним’. Тарем’ миндяхани’ ты’ вэ’ няна Тет Хабт Пари мяд’’ таня хаи’’. Нердани’ ня’юр’’ Вэя’ Сэв’ мядодо’ ӈадимя’’. Юр’’ Вэя’ Сэв пой ӈутоканда Нюдя Вэя’ Сэвм’ нямдо’ ӈамдалмы’’. Нюдя Вэя’ Сэв’ ӈамдёди’ еркад икда ямбума. Пыда тарем’ ма: – Ӈысы’ ӈацекы’’ ӈамгэм’ ӈатеда’’? Харючи нюдя нювэямда тавы. Си’’ив ӈэсы’ тер’’ нида’’ хо’’карӈада’’.

Ӈамгэ пирка’’на ханяд – таняхад яраха’’ саю’’ ӈа’’ӈо’ пыяраха’’. Ненда’’ енана’’ нена’’ теба’’. Мани’ сидяӈэ тад ӈэдаба’’ни’, харад’ нёдрев’ лырартамбини’. Си’’ивахад яля’ енри’’ ха’’ярӈа’’. Ӈаво’’ пирка’’на Вэя’ Сэв’ ню манзь ханада: – Не ӈацекы ханяна хаян. Тюкохо’ са’’монди’. Еркы ӈарка мяд нё пехэбтэй’’. Мякы мякад не Вэя’ Сэвы’ ӈадимя. Вар мадавэмда ниси’ тамда’’пида. Нид’ ядри нимда сярыбида. Маниенахани сидя я’ понд’ тэри та’ юху. Нув’ няби ядан’ ӈоб’’ ту морём’ ӈодь’ хэдамӈадм’.

Ӈани’ си’’ив яля’ енри’’ ха’’ярӈа’’. Си’’ив ӈэсоӈгана нув’ няби ядан’ саӈоми ха’’мы’’. Нув’ ядахана сидя еся нюня падвэ савним’ ниринди’ пявэди’. Таси’ пяб’’нанда сидя хэвахад сидя пыя’ тю’’у’ илыбиди’. Нюдя Вэя’ Сэвм’ пулы’ ядан’ хамотанаханда сидя хэвахад тю’’у илади’. Мань хэвахани’ сидя еся нюня’ хадади’ палъй’’. Няби еся ниня Тысъя ӈацекэ, няби еся ниня Недко папами. Падвэ савни – не Вэя’ Сэвы неканда хэван’ сюра ха’’мы’’. Няда тарем’ маси’’: – Не ӈацекы са’’лан ӈэвэн. Тю’’уй ялян’ харваенахани си’’ми хадан!

Ӈани’ сян яля’ енри’’ ха’’ярӈа’’. Ӈобо’’ ӈэдаба’’ ярха’’ саюв’’ техэ малахандо’ лырартамбин. Ӈаво’’ пирка’’на ӈэсохондо’ суса’’. Ӈоб’’ляри сюдбям’ санлабтава’’. Мань тарем’ мадм’: -Вэя’ Сэв ню пыдар нянанд харами яӈгуси’’? Ӈамгэ сер’ нид мядони хадэйд?

Пыда тарем’ ма: – Ӈули’’ ябтаен’! Туми хабтёда! Ӈари’’ маньзяван’ вунисядм’ харва’’. Нюдя Хабт Пари няхар’’ по’ ямбан’ си’’ми нялыбись. Ӈоб’’ не нями’ мирци татав! Тарем’ хыномданам’ ӈэвадалава’’. Ӈавэми яхана’’ маня’’ мюселъяна’’. Ӈоб’’ мюсевава’’ нинякы ӈа’’, яв’ сяд’ ни’ мядо’ палӈава’’. Ӈавормана’’ сер’ хэвыхы няни няюв’ ӈэвами ярэй’’: – Нёр Туӈгосе’’э,ӈани’ тавандами мань яӈгу’’ нив’, Не Вэя’ Сэвым’ ханаӈгодакэн. Хэбянди’ нерня ха’’мава’ явна хандадима. Манда’’ манзеты’’ Не Вэя’ Сэвы’ халмер илебтемби. Вадани пирда. Яхана’’ пява’’. Тайна хунана яхана’’ тэвына’’. Няхар’’ юр’’ тер’’ ӈацекэсавэй пивня санарӈа’’. Не Вэя’ Сэвы ненэся ӈэвы, тадебя ӈэвы. Та’ илелъяна’’.

Та’ малда.