Теда хойхана мюсерта’’ нина’’ тэтнава’’ ялудо’ мэ’’ӈа’’. Ты’’ пэртя’’ ненэця’’ ялэ’’, пи’’ ямбан тэхэнато’ мэ’’. Выӈгана ты’’ ниць ёльць. Хусувэй яля’ сую’’ ӈадимберӈа’’. Ты’’ ниць ирийна еркы ялян’ таслась округханана мат’’ яӈганя ёнар’’ сую’’ соявыць. Ӈокханда ты’’ толыр’ мат’’ ю’’ ёнарт’ вадёбнанда тара.
Не’’ ӈод хасавидо’ нядабась мякана илевамдо’ минредо’. Ханяӈы ӈэсыхына ӈацембой некоця мяд’ манзаям’ пэртяӈэ’ тара’’. Тарем’ «Ижемский оленевод» кооперативхана.
Ольга Алексеевна Рочева ты’’пэртя ненэцие мякана соявы. Краснойхана илесь. Нисяда «Харп» колхозхана ты’’ пэртяӈэ’ манзаравысь, небяда ӈод’ хойхана мюсермысь. Ольга нюдякоданда хой’ ил’ харвабтада, сававна хамандабида, теневада. Ӈодьбянда теда ӈод’ варёмда мэць хойхана мюсерць иле. Хаюпа’ хэ’’мяхаданда «Ижемский оленевод» СПКана манзара, мяд’ манзаям’ минре. Сидя нюкцямда вадамби. Ты’’ сие ниць ирийхана Ольга Алексеевна Няръяна март турӈась, тамальӈгана «Сямянхат мерета» сянаковахана тэхэна ӈэдалёрӈась. Саць нямбара некоця, ӈацембой ӈэбнанда’ ӈод маля мэёвна ӈэта ниня ну. Илан’ ив’ ер сырта. Харта нямнанда тарця вади’’ хэтась: – Теда мань’ тэна’’ манзарам’, СПК «Ижемский оленевод», хаюпа хэ’’мяхадан’ тюкон’ илелъюв. Вэсков Семен Олегович Рочев. Пыда теда нюртей ӈэсына серм’ пэртяӈэ’ тара. Маня’’ хойхана вэвковна нива’’ иле’’. Саӈговота сер’’ ханяна танесеты’’. Понку мюсерӈгун’, тэдаӈгун’, тикахад’ нумда вэва ӈэӈгуда. Тикахана ир’ вомда, масьтыва’’: мэсь’ ӈэя мюсерць, хардан’ хэсь’ тара. Нумда савумда, ир’ савумда. Тикахана масьтыва’’: Тида, саць саванё! Хой’ илӈгад’ саварка яӈгударха.
Маньзьван’ хардахана илеван’ ним’ харва, ӈобӈгэв’ хойхана, нянэй мякана илеван’ харвам’. Нюдякодан’ хойхана мэмдак. Мал’’ нина’’ хойхана мэць, теда ӈод мэ’’. Не’’ хойхана тара’’ ним’. Манзаява ӈока ӈэ’’ нив. Пирензёдан’, сэдораӈгун’, тикахад мюсеӈгун’, ӈавкына ӈавлаӈгувата. Тикахад’ ӈацекына танята. Мань’ сидя нюкцяв’ – хасаваков’ нябимдей классхана Краснойхана тоходана, не нюв’ хэвханан’ ядэрӈа. Ӈэсыхына хардава таня, тикахад’ маркана илебцядава тэмдаваць.
Хойхана мюсерта не сэдорась теневабнанда тара. Мань’ сим’ небяв Анна Павловна сэдорась тохолась, нянда ӈарка вада. Нябимдей классхана маля савовна сэдорамась. Нерде нюдяко бурки’’ сэдбасьтыдм’, тикахад’ ӈобкана паным’ сэданись. Теда нюкцин’ мальцяха, пивахана харн’ сэдбим’; вэсков сэдорпим’. «Ижемский оленевод» СПК манзарана’’ поӈгана теда ӈармбэй хибяри маля тянё, ӈацембоярка хибяри’’ турӈа’’, манзара’’. Илембэярка танява таня, серм’ пэртяӈэ’ тара. Пыдо’ няндо’ инзелеӈгува’’, сидна’’ тарана серт’ табадамби’’. Сидя ю’’ ӈэсыхына манзарана’’ тянё ни’’ӈа’’, тына’’ ӈод тянё вани’’ӈа’’. Тарем’ илева’’, сава. Хой’ ил’ сямянхат’ сава ӈэдарха. Лакомбой хардан’ тэвгун’, ир’ маля нянэй мят’ нямна няркнаӈгу, хоян’ харвялаӈгун’.
Тарця вади’’ ӈацембой некоцяхад’ намдурць ихиня ӈобтарем’ саварха. Не хойхана мюсерпато’, тикахана ты’’пэртина илева ӈод’ сибицярка ӈэӈгу. Тикахана тына’’ пилибт’ явнана мюсерта’’.
