Сидя ю’’ по’’ тяхана округханана этно-культурный центрава ӈадимясь. Тамальӈгана яханана отдел культуры серм’ пэртяӈэ’ Вера Владимировна Ветлугина манзарась. Этно-культурный центр ӈэвахана мэнаӈэ’ Людмила Фёдоровна Бобрикова тарась.
Пыда таняна манзаравнда ненэцие’’ ма’’лась. Нюртей манзаравась товы’’ – Ф.С. Кауц, Ф.Н. Ардеев, О.Е. Латышева. Людмила Фёдоровна тет по’’ ямбан ЭКЦ манзаям’ нерня пэрӈадась, сибиць нись’ӈа’’. Несэй манзаям’ нина’’ пяць. Тамальӈгы похо’’на манзаравы ервуна ӈод’ этно-культурный центр’ ӈадимдевам’ тарана серӈэ’ тасладось. Ненэцяӈгат’ Николай Кириллович Бобриков нядаӈгусь, пыда тарця манзаям’ пявы нита’’ е’’эмня манзарась лохом’ хось нядаӈгусь, тикахад’ ЭКЦ ервӈэ’ тарана няна недбям’ нямарпавам’ таслась. Нюртей фестиваль’’, конкурс’’ нина’’ хамандабиць. Сямянд’ нюртей мядм’ округханана ӈобтарем’ таняна манзаравы нина’’ ӈамдтаць. Ненэцие’’ культурам’ манэ’’лабтабиць, нянэй мякана илевам’ маркана илена’’ хибяри’’ тикахана нюртей манэ’’ӈаць. Тарем’ янамбовна манзаядо’ нерняри миӈась, нока хибяри таняна манзараць, нока коллектив надимяць. ЭКЦ манзаям нерня пэртянэ нока по ямбан Елена Вергунова манзарась, саць мэбета манзаранась, нита няюв нарка манзаям пэрнась. Пыда пуданда маля сян по ямбан Валентина Сергеевна Зганич директорнэ тара. Тикы похот’ сидя ю’’ по’’ ваера’’. Этно-культурный центр’ манзаранина’’ со’’яма ялямдо’ тюку ирийна нюртей толыркана мэ’’ӈадось. КДЦ ӈарка залхана ӈока хибяри’’ ма’’лэйдаць, ӈарка концерт’ ваерась. Этно-культурный центр’ манзарава е’’эмня таняюв’ товы’’ хибяри’’ лаханаць. Ӈока ихид’ ӈэда вада’’ соць. Округна депутатхат вадам А.Лутовинов тэврась, округна администрацияна нэвахана мэна вади Ольга Каменева толэйдась, Заполярный районхад сейхад миндя вади В.Кмит хэтась, ветеранхат Римма Костина сейхад ӈэда вади мэ’’ӈась. Тикахад сценахана хуркари коллектив манзаидо манэ’’лабтабиць, мал пыдо ЭКЦентрхана манзара’’. Ненэцие’’ отделкана нина’’ ӈарка манзаям’ минре’’. «Илебц» театрава ӈока по’’ сеюна маймтемби, таняна сянакодина’’ пэдова’’, «Ханибцёва» теда таня – ихиняна ӈани’ лимбяка. Ӈысма’’ нина’’ харто’ культурамдо’ тю’’у пэрӈа. «Печорянкахана» тара, хыно’’ӈа’’; «Тиньганьяс» нюбета ӈацекы’’ коллективдо’ таня. Тарця сер’ саць’ сава. Ӈацекы’’ нерня илевнда, пыдо’ хари’’ тенз’ вадамдо’, культурамдо’ минревнда’’.
«Родные напевы» коллектив’ ӈани пэдова’’, Зоя Чупрова ӈарка манзаям’ минре. Литературной объединениева сатавна ӈэта’ ниня ну, сертабада манзаидо’ тянё ни’’ӈа’’.
Ма лёва пуданана этно-культурный центр ӈэвахана мэна нява Валентина Зганич ӈарка вадам хусувэй таняна манзарана коллективан хэтась, хусувэйдо грамоты ня’’амась.
Округханана этно-культурный центрава сидя ю’’ по’’ ямбан’ манзаямда минреда. Тюку ялян’ хэтась: ЭКЦентрава хуркари’’ тенз’’ ненэцие’’ культурам’ манэ’’лабтамби’’. Таняна хуркари коллектив’’ манзара. Нерня’ ӈод, ӈока по’’ ямбан тарем’ ӈэя, этно-культурный центр’ манзаранина’’ округна хибяри’’ маймбтембая!
