Тюку по’ ты’’ ниць ирийхана округна толаӈго’ хардахана манзарана’’ нина’’ ӈарка ялямдо’ мэ’’ӈаць. Нюртей толаӈго’ харад’ ненэцие’’ округхана сиднтет ю’’ самляӈг по’ тяхана нёмда нэсь. 

Ёнар’’ хасуюр’’ няхар’’ юдимдей похона Тельвиска ӈэсыхына ненэця’’ школа Красной уголокхана толаӈго’ харад’ манзаямда пядась. Няръяна уголокмана, изба-читальня’ мям’’на мюсерӈаць манзараць. Тарем’ сидя юд’ мян выставкам’ манзарана’’ хамандаць. Тикы’ пуд библиотекам’ Няръяна март’ тэврадось. Сававна манзаравандо’ е’’эмня округна библиотека ӈока сава вади’’ намдсеты’’, тетмэвна Переходящей няръяна лабакм’ ня’’амбись. Ёнар’’ хасуюёнар’’ синдтет ю’’ няхарамдэй похона – «Библиотека отличной работы» нювм’ ня’’амась.

Таӈок по’’ ямбан маркана толаӈго’ хардан’, луца’’ вадавна хэтась – библиотекан’ хибярина турӈа’’. Маркана толаӈгова’ серм’ харвабтана’’ хибяри’’ тянё вани’’ӈа’’. Толаӈгода’’ пилибт’ танесеты’’. Тенева’’: ся’’ня библиотекава’ невхы, тецьда хардахана ӈась. Тикахана ӈод’ таняна манзарана’’ нина’’ турта’’ хибярим’ ябембада сейханандо’ ядтабсетыдо’. Хусувэй книгам’ лэтбавам’ ив” ер миредось. Тедахова нина’’ едэй, паской, яля, иба хардахана манзара’’. Таня’’ турта’’ хибяри’’ хусувэй по’ нядаӈга’’. Толаӈгода’’ хибяри’’ е’’эмня таняна хуркари’’ мероприятия’’ танесеты’’. Ӈацекы’’ ӈод юрвы’’ ни’’ӈа’’.

Библиотекана едэй’ харад’ толаӈгова серм’ харвабтана’’ хибяри’’ е’’эмня нёмда сидя ёнар’’ си’’ивумдей по’ носиндалава ирий’ маттамдэй толыркана нэдась. Тикы яляхад’ ӈока’’ яля’’ ваера’’, ӈока’’ хибяри’’ таня турӈа’’.

Округна толаӈго’ хардана харта историяда, фондхананда юр’’ няхар’’ ю’’ ёнар’’ мян хуркари’’ документ’’ лэтби. Хусувэй тарана’’ книгам’, журналм’, газетам’, статьям’ тикахана хоӈгун’. Юкад’ вата ёнар’’ хибяри’’ хусувэй по’ библиотекан’ турӈа’’.

Маля ӈахэт’ толаӈго’ хардахана Отдел Севера таня, таняна манзарана’’ нина’’ харвась харто’ манзаидо’ минре. Маля ӈока по’’ ямбан маня’’ отделна нерм’ пэртяӈэ’ Зоя Степановна Ивакилева тара. Манзаямда теневана, мэнена не. Сертабада манзаяда тянё ни’’ӈа’’. Нябимдей по’ отделкана «Толаӈго книга» клубдо’ манзара; паднана’’ ненэциена нямна хуркари’’ мероприятия’’ сертабасьты’’. Ӈацекы’’ няюв’ ӈод манзара’’. Тюку си’’ивна нюртей яляхана библитекан’ площадкахана ныланана’’ ӈацекы’’ турӈаць. Пыдо’ е’’эмняндо’ Пушкин’ со’’яма яля’ ед сянакова’ хамадавысь.

Нерняна’ ӈод толаӈго’ хардахана манзарана’’ нина’’ харвась манзарая’’, толаӈго’ хибяри’’ харвась таня турӈая’’.