Маня’’ яханана’’ хуркари’’ тенз’ мэта ненэцие’’ поӈгана тарця хибярина’’ таня’’, хуний тюнто’ пуд ӈобкана ӈока’’ по’’ ямбан иле’’. Нидо’ нядабась илевамдо’ мэӈадо’, хусувэй серкана нидо’ нядабась’ нерняри миӈа’’. Тарця хибярина’’ неняӈг’’ ирийна’ сиднтетимдей яляхана маркы’ культура’ хардахана ма’’лабидонзь.

Ӈокханда самляӈг’яӈганя семья’’  сцена’ ни’’ танпыдаць. Хусувэдо’ медальм’ «За любовь и верность» ня’’амась, ихид миндя’’ вади’’ намдась, мядонзэйӈэ’ ӈамдэд’’ ня’’амась. Тарця хибяри’’ поӈгана, хуний тет’’ юкад вата’’ по’’ ӈобкана’’ иле’’, харто семьидо’ сававна пэрӈа’’, нюдо’ сава хибяриӈэ’ вадаць маня’’ нина’’ ӈод’ таняць.  Людмила Алексеевна, Ким Андреевич Вонгуевха’ тюнди’ самляӈг ю’’ по’’ тяхана ваераць. Таӈок по’’ ямбан пыди’ ниди’ нядабась илеӈаха’. Тюку по’ маӈгты ирий’ нертей яляхана золотой тюнямди’ мэ’’ӈаханзь. Пыди’ нямнанди’ падвын’ таняць.

Тамна ӈопой семья’ хуний Няръяна маркана «За любовь и верность» медальм’ ня’’амӈаханзь. Тикы няхаюна Саляхана’’ илеӈаха’. Екатерина Николаевна, Степан Андреевич Ардеевха’ тюку по’ нодя’ пэвдэй ирийхана маля’’ тет’’ ю’’ самляӈг поӈэ’ ханта ханзер’’ пыди’ ӈобкана  мэ’’ӈаха’. Екатерина Николаевна Ардеева тарця вади’’ хэтась: - Мани’ тет’’ ю’’ тет’’ по’’ ӈобкана илени’. Ноябрьхана тет’’ ю’’ самляӈг ӈэӈгу. Мани’ ӈопой ӈэсы’ терни’, Саляхана илевани’ ямбан илени’. Хардани’ няхататто’ хахаиць, ӈопой школахана тоходананись. Маркана школа-интернатхана нини’’ хойнись. Мань’ сиднтетимдей классхана мэдамзь, пыда си’’ивумдей  классхана мэсь ёнар’’ хасуюёнар’’ мат’’ ю’’ си’’ивумдей похона. Тикы’ похот’’ ӈобкана мэсьтыни’ школахана, тикахад’ мань’ педучилищехэна тет’’ по’’ ямбан’ тоходанадамзь’, ӈобкана ядэрцетыни’. Педучилищем’ ёльце’’махадани’ нелейнись, мань’ хаюпа’ хаядм’. Тюнями’ Саляхана мэ’’ӈамись. Небяда Таисья Яковлевна, нисяда  Андрей Николаевич пилибт’ хойхана илеӈаханзь. Тамальӈгана тыбэртя’’ Салян’ тобнандо’ валакада няхар’’ яля’’ мэбнандо’ тарасеты. Пыди’ няхар’’ ялян’ тованди’ мальӈгана  тюн’ сертаваць. Ти’, тет’’ ю’’ самляӈг по’’ ямбан илени’.  

Екатерина Николаевна вэсакода Степан Андреевич Ардеев ӈока по’’ ямбан колхозханандо’ ёртяӈэ’ манзарась. Та’ сенокосхана мэсьты’’, сыра’ конюхӈэ’ манзарась. Юнохона силос’’ тэврабсеты’’. Теда пенсияхана мэ.

Тамна Екатерина Николаевна тарця вади’’ мэ’’ӈась: -  Илевами’ хуркари’’ ӈэсьты. Ханяна сава ӈэсьты, савада хань’ ӈокарка ӈа’’. Ӈамгэ маля ни’ танеӈгу’ илева’’ сер’?

Мани’ пили’’ Саляхана илени’. Манзаранись’, ӈацекыни’’ вадабинись, мат’’ нюми’’, мал’’ ӈарка хибяри’’. Не’’ нюн’’ манзара’’ мал’’. Нюдяко’ хасава’ нюв’ Толикув’ хойхана мэ’’, тыбэртяӈэ’ тоходана, тыбэртяӈэ’ общинахана манзараван’ харва’’. Тамна сидя ню’’хуюн’ Николай, Владимир ниӈаха’ манзара’’. Манзая’’ яӈгу’’ ӈэсынана’’. Ӈарка  не нюв’ Людмила Степановна Коновалова этнокультурный центрхана Нельминхана манзара. Диана Степановна Ардеева тохолкодаӈэ’ школахана манзара, музыкам’, трудм’ пэрӈа’’. Таисья Степановна  ӈацекы’’ английской вадан’ тохолаби’’.

Хасую’’ внукми’’. Тет’’ хасава’’, самляӈг не’’ ӈацекы’’. Сямянд’ ӈаркани’ Настяни’ сидя ю’’ ӈопой пода’’. Пыда маркана иле, тоходанвась’ ятна’’ поварӈэ’ тоходангу. Сямянд’ нюдякони’ тет’ пода. Тарем’ илева’’.