Вы здесь

Тарана тохолковам’ мэ’’ӈаць

Мел’’ хибярина ханярина иле’’. Тарця хибярина округна хусувэй ӈэсыхына таня’’, маркана иленя’’ поӈгана тянё ни’’ӈа’’. Пыдо’ манзаидо’ хуркари’’ выставкахана маниесьтына’’. Тамбир’ мэбета нина’’ манзаи’’ маниесь, ханяӈэна пысасетына’’ – нянов’, мел’’ нина’’ пэдаванё’’!

Тарця хибярина манзаи’’ маниесь, маймбасьтыва’’, ихиняна саварха ӈэсьты’’. Яханана тамна хадунато’, иринато’, нисянато’, небянато’ таром’ мэта’’ хибярина тянё’’ нивы’’ӈа’’. Мал’’ пыдо’ мел’’ ӈэвамдо’ харто’ мято’ терхат’ минредума’’.

Няръяна маркана сян по’’ тяхана мел’’ хибярина ма’’лёва’’ е’’эмня яӈга’ харад’ нэць. Маркана илена’’ хибярина таняюв’ турць мэнесетыдо’. Хибяхова манзаида’ сертабась таня тюӈгсеты, хибяхова тарана лахарёда таняюв’ тэврабсеты. Тарця хардахана манзаидо’ теневана’’ хибярина нидо’ ядтабсеты’’, тикы Маргарита Васильевна Латышева, Александр Алексеевич Ледков, Надежда Яковлевна Дуркина, серм’ пэртядо’ Елена Елисеевна Канюкова. Пыдо’ хусувэй товы хибярим’ сава ихиня ядабтабсетыдо’, тарана серкана нядабасьтыдо’. Ваеравы ирий’ пудана’’ си’’ив яля’’ ямбан носиндалава ирийна нюртей яля’ ӈэсонд мел’’ хибярина хардахана тохолкова миӈась. Тюку’ мэвахана округна ӈэсыт’ товы’’ мел’’ ненэця’’ ӈобкана ма’’лэйдаць. Пыдо’ е’’эмняндо’ луца’’вадавна манзь – семинар этнокультурный центрхана манзарана’’ нина’’ хамандаць, есяхана’ нина’’ тарця тохолкова е’’эмня Заполярный район, тикахад’ округна администрация Управление культуры нядэйдонзь. Си’’ив яля’’ ямбан ӈэсыт’ товы’’ хибярина, маркана илена’’ нина’’ тоходанаць, декоративно-прикладной творчество нямна ӈока мэкад’ ӈамгэм’ намдаць. Ӈока несэй манзаи’’ торомдаць. Этнокультурный центрхана манзарана’’ ненэця’’ нито’ е’’эмня мастер-класс’’ хамандавыць. Таняна хуркари’’ сувенир’’ сертабась нидо’ тохоламбиць; ӈобкана хуркари’’ сянако’’,ӈухуко’’ сэдбиць. Ним’ паӈгалпась нина’’ тоходанаць; пенахад’, хобахад’ несэй ӈавори’’ ма’’лабавам’ торомдамбиць.

Ома, Несь, Индига, Выучейской, Хорей Вер ӈэсыхыт’ товы’’ мел’’ не’’ малӈэ’ нибям’ ня’’амбась нюдякодандо’ теневана’’, малӈэ’ харто’ ӈэсынандо декоративно-прикладной творчество манзаи’’ пэрӈа. Си’’ив яля’’ ямбан ӈока ӈамгэм’ торомдаць, ӈока несэй манзаи’’ хари’’ ӈудаханато’ сертаць. Тарця манзаяхат’ пудана тоходанва яляханандо’ выставкам’ хамандаць. Ульяна Николаевна Индигахад’ товысь, пыда ӈока по’’ ямбан «Индигской» совхозхана сэдорана’’ хардахана манзара. Тюку’ мэвахана пыда маркана тоходанась, лаханавани’ мальӈгана тарця вади’’ хэтась: – Мань’ Индигахана маля ӈока по’’ ямбан илем’, совхозхана манзарам’, сэдорам’. Сэдорась теневабнан’ ӈод теда ӈока едэй ӈамгэм’ манэ’’ӈам’, едэй манзаи’’ сертабась тоходанамась. Хусувэй тарця сер’’ манзаянан’ тарана’’. Ӈухуко’’, сянако’’ сертамбиваць; хуркари’’ несэй сувенир’’ манэ’’ӈава’’. Тарця тоходанва саць ӈарка сер’. Тохолкодахана ӈарка вадам’ хэтбим’!

Теда тоходанвы’’ мел’’ нина’’ сава ихиня’ харто’ ӈэсыхыто’ ӈэдалэйдаць, харто’ манзаидо’ маля пэрӈа’’. Хибя’’ тенева, харвабнанда нерняна маркана таневнда выставкахана пыдо’ едэй манзаидо’ манэ’’тава’’.