Ӈока по’’ тяхана Ленинград’ маркана ӈэрм’ яхана илена’’толырто’ тянё хуркари’’ тенз’мэта’’ ненэцие’’ институт’ ӈадимясь. Институт народов Севера – тарем’ нюмдевысь. Тамальӈгы’’ похот’ яндат’ товы’’ хибярина таняна хуркари’’ луци’’ манзаяха’ тоходана’’.

Ваеравы век’ самляӈг’ юдимдей мат’’ юдимдей похо’’на таняна тоходанвы’’ хибярина ӈокаць. Хуркари’’ яхат’ товы’’ ненэця’’ харвась’ тоходанаць; поӈгнандо’ сававна илець, нидо’ хусувэй серкана нядабиць. Ӈэрм’ яна ӈадимы’’ нюртей паднана’’ ӈокаювдо’ тикы маркана тоходанаць, институт Севера ёльцевыць. Ӈока тохолкода’’ таняхад’ тарпыдаць. Елена Николаевна Окотэтта теда Саля’хардана иле. Пыда Ленинград’ маркана тохолковамда илеванда ямбан валакада сава няюд’ ваде’’цетыда. Таняна торомдавы’’ нита’’ няюв’ тенад’ ӈоб’няюв тэворцеты’’.

Елена Николаевна Окотэтта нямна тюку яля’ вадин’ падбидм’. Хэвхы округхана илена тохолкодам’ торомдахава’’. Елена Николаевна тюку ирий’ самляӈг’ яӈганя толыркана си’’ив ю’’ самляӈг’ помда ядабтаӈгу. Пыда ёнар’’ хасуюёнар’’ няхар’’ ю’’ сидндетимдей по’ носиндалава ирийхана Я’мал няӈэна Надымской выӈгана соявысь. Нисяда Ӈопой Салиндер ӈэвысь, тыда тянё ӈэвыць. Тарем’ янамбовна, ӈока маям’ манэць, ненда няюв’ нюкциди’ вадабась илевэхэ’. Саю’’ по’’ тось Ӈопой Салиндер сайнормась ӈэдалавыць. Ленинград’ марад’ хэвхана сайнормысь, таняна яӈгумысь. Тикы’ пуд небядо ӈопойӈэ’ нюкцида тю’’увку и’’илбась хуркари’’ манзаи’’ пэрць манзаравысь, хасава’’ няюв’ хуркари нумӈгана халям’ пэрмысь. Маля ёнар’’ хасуюёнар’’ тет ю’’ тетимдей похона Ленамда тоходанвась ми’’ӈадась. Не ӈацекы небяда тамальӈгана маля хамандабидась, нерняна товнда похо’’на хойхана падарм’ теневана’’ хибяри’’ тараӈгу’’, тикахана мят терхана’’ ӈод незеларка ӈэӈгу’’. Тарем’ Елена Николаевна интернатан’ илевась’ тэвыць. Тамальӈгана Лена маля хасую’’ подась. Школан’ тось пыда маля сававна сэдорась’ теневась, харта парколась. Тоходанвахад’ ныланавандо’ мальӈгана не’’ ӈацекы’’ ӈухукодамдо’ сэдбасьты’’, тикыдо’ ембпаӈгудо’. Таремъюв’, сянакова сер’ пыда сававна сэдорась’ тухусь, тикым’ илеванда ямбан мэ’’ӈада. Теда’ ӈод тарабнанда сырэй паным’, паской нояцям’ сэдгу. Мань’ ной’ панэв’ пыда сэдадась.

– Мань’ Ныда ӈэсыкоцяхана тоходанадамзь’, – тарця вадаха’’на’’ Елена Николаевна Окотэтта лахарёмда ханадась. – Сайнорма’ поць, илва саць тоенась. Интернатханана тецьсяты, мальцята, пивата ядэрцетыва’’. Ӈаврава нисьты тэвор’’. Тохолкодина, воспитательна нянана саць сава ӈэсьты’’. Валентина Владимировна Сброжек воспитательма тенад’ ихинян’ иле. Пыда сидна’’ ӈока сава серт’ тохолась: сярода, тохоцяхад’ ӈавори’’ сэдбась, мяд’ мюй тавдабась. Маня’’, хойхад’ товэӈэ’, тикым’ ехэра’’ нисявам’. Ӈарка нина’’ вадаха’’ инзелесьтыва’’.

Школахана харвась’ тоходанаваць, ӈокавна толаӈгостыва’’, хуркари’’ пирдыр’’мана нердесьтыва’’. Ӈокаювна тамальӈгана, школамдо’ ёльцесь тохолкодаӈэ’ тоходанвась хэван’ харвасеты’’. Мань’ ӈод ихинян’ тарцямась. Ти’, школан’ пуд Ленинград’ март’ хаядамзь. Таняна няхар’’ по’’ ямбан Северной отделение подготовительной курсхана тоходанамась, тикы’ пуд институтан’ тэвываць. Таняна маля тоходанвы’’ ӈаркамбой нина’’ сидна’’ нядабасьты’’. Тоходанась саць савархась, мар’’мана ядэрцетыва’’, хуркари’’ музейхана мэсьтыва’’, театрхана сянакоди’’ маниесьтыва’’.

Ленинградхана институтм’ ёльце’’махаданда Елена Николаевна Салиндер Саля’хардан’ манзаравась’ тэвыць. Дошкольной образование методистӈэ’ тарась, окронона, окружком’ партии мякана манзарась, педучилищехэна тохолкодаӈэ’ таравысь. Елена Николаевна илеванда ямбан ханярина манзарабнанда несэй ӈавори’’ пюрцеты. Пыда садикхана манзарана’’ нита’’ е’’эмня программам’, хуркари’’ манзаяна тарана методической пособие’’ падась. Елена Николаевна падвэмна теда садикхана манзара’’.

Теда Елена Николаевна Окотэтта Саля’хардахана иле, маля ӈахакуд’ ни’’ манзара. Тарем’ ӈод мяканда турта’’ нида’’ ӈока ӈэсьты’’. Хусувэй хибярим’ сава сёнзяхана ядтабсетыда, тарабнанда нядаӈгуда. Елена Николаевна хасенавам’ ехэрана не. Таӈы’ мальӈгана ӈодиманзь, тудаком’ ма’’лавась хоян’ ядэрцеты’’, тикы’ хавна яхана вадюданни’’ ӈамдтабсеты’’,тикахад’ вадавыда’’ ма’’лабгу’’. Не нюмда, хасава нюмда хуркари серкана нядабасьтыда. Нюта’’ ню’’ хадандо’ мят’ маймбась турцеты’’.

Елена Николаевна Окотэтта манзараванда мальӈгана ӈока Няръяна март’ тэворцеты. Маня’’ яханана теневана’’ нида теда’ ӈод иле’’.