Носиндалава ирийхана яханана хуркари’’ сер’’ ваераӈгу’’. Округханана хусувэй выӈгана ты’’пэртина харто’ манзаидо’ минре’’, явнана ӈокханда юр’’ мат’’ ю’’ ёнаркад’ вата ты’’ хадырӈа’’.

Хойхана мюсерта’’ ненэциена носиндалава ириян’ тэвась забой’ манзаидо’ пясьты’’. Тарця манзаяхато’ нина’’ маля хаманды’’, забоян’ тэвравнда тыдо’ ӈод яӈгревы’’. Валакада нумда тамна ты’’ хабарпава’’ серт’ ни’’ серос’’. Тецьда яля’’ яхана тэвась тэхэ’’на’’ мэна ненэциена ханярина забой’ манзаи’’ пяӈгудо’. Валакада лавкахана тюку по’ хадавы’’ ты’’ ӈамзам’ тэмдабаӈгува’’. Тарця ялу’’ ханярина илена’’ хибярина маля ӈатейдо’.

Тамна Няръяна маркана ненэцие’’ паднава сер’ нямна таславы ялуна’’ ваераӈгу’’. Тарця ялуна’’ носиндалава ирийна няхарамдэй’ яӈганя толыркана нэйнаць’. Ирий’ ямбан хуркари’’ тарана’’ сер’’ ваераӈгу’’. Паднава’’ед’ таславы’’ ялуна маля ӈарка пэвдэй’ ирийхана талгуна’’, тамальӈгана Няръяна маркна ӈарка конференция’ ваераӈгу. Тарця ма’’лёван’ товнда хибярина ненэцие’’ паднава’’ сер’, ненэцие’’ вадава нерня минрева нямна ӈобкана тасалкода’’. Тарця ма’’лёйкана Москва, Санкт Петербург, Салехард маркад’ товнда нина’’ харто’ вадидо’ мэта’’.

Культура’ манзаи’’ пэртя’’ нина’’ ӈод сертавнда манзаяхато’ хамяку’’. Межрегиональный фольклорный конкурсм’ хамандаби’’, хуний округна еркы маркана ӈарка пэвдэй ирийхана ваераӈгу. Тарця конкурс’ яханана хусувэй сидя по’ ваерась ненэцие’’ ма’’лабсеты’’, нюртеймэвна сидя ёнар’’ няхарамдэй похона танясь. Тюку по’ маттамдэймэвна «Печорянкам’» мэтава’’, хуний нерняна товнда ирийна си’’ивумдей толыркана «Арктикам’» нюбета КДЦ мякана ваераӈгу’’. Конкурсан’ хуркари’’ тенз’’ мэта пирибця’’ ма’’лаӈгуд’: некоця’ танеӈгу, ӈысма, хабене, устьцилём’, саам’, хадян’ некоця’’ танеӈгу’’. Пыдо’ округна еркы март’ Ома, Несь, Виска ӈэсыхыд’ тута’’, тикахад’ мядондина’’ Ижевск, Архангельск маркад’ танеӈгу’’, Мурманской областьхад’ тута’’. Поӈгнандо’ пирдырта’’ некоця’’ визитной карточкамдо’ манэ’’лабтаӈгу’’, харто’ паӈгудо’ ваде’’та’’, паныто’ нямна лахарёдо’ ханаӈгу’’, тикахад’ харто’ вадавнандо’ сём’ мэта’’.

Пудана’ мэвна тарця конкурсва ёнар’’ хасуюёнар’’ ӈоб’яӈганя похона ваерась, тамальӈгана «Печорянкаӈэ’» нянэй некоця’ хаясь. Тикы Наталья Тайбарей, хуний тамальӈгана маркана аграрно-экономический техникумхана тоходанась. Наталья вы’ тер’ пирибцякось, «Ямб то’» няна мюсерта’’ ненэцие’’ мякана соявы, нянэй мякана вадюданвы, хой’ илм’ теневана некоця.

Тюку по’ ваеравнда «Печорянкан’» тоида’’, КДЦ мякана ваераӈгу, ӈарка пэвдэй ирийна си’’ивумдей яляхана.