– Вада-Сюдбабц мерцяӈэ пены. Неро яха’ хэвхана мят’ теб’’ нив’. Ӈун’ таркарись, мят’ тюню’’: вэсако, пухуця. Сидямборихи’. Ӈацекэди’ хад’’ яӈгуедакы – тикыт е’’эмня вада вуни таня’’, – хувы ӈавора’’ма’’ пуд, тюмюнд Нина мале пудана ята’’ми’’ хаёсь, мят мюй’ ӈадя нацвомзь, хадава’’ мэсы’’мананда вадаком’ хана.

– Тикахаюд, хадаӈэ, хавы ирина’’ ня’, хадри’’, пыдри’ нидим’ ӈа’’? – ӈамгэхэва си’’ми нямюхудан нохобтанараха.

Хадав мунзялма. Екар’’ нена, екар’’ пыдамда тобкаларабэӈэ толаба пыда пон’ нян сырӈа. Вамборта тиделтавы сята вадмбой’’ ялэмгава пыда ма:

– Ни, нюн ню. Тик4ар –вадако. Саць ӈыхы ӈэбэй сер’’. Инзеле тенев’’.

Мань вэварахамадм’, нямюхунан ӈани’ мале несэй’’ юнра мэ’’эмда’’ вадан хамады’’ма:

– Ӈыхына, хадри’, маня’’ ӈобтарем’ нисява’’ам’ иле’’?

– Ни, нюн нюкця: ӈани’’ хибя’’ илець. Маня’’ тамальӈгана тамна янд ниня яӈгуваць, – пыда ханда техэм’ хадахалӈа. – Индкабина’’, хадри’, ханя’’ таня’’. Индта хибяринд вуни хаӈг’’. Ӈока’’ пот ваерась тикар валакада ӈани хибяринд инд’’ӈэ хэсь пир’’ӈа.

– Ханзер’’ тарем – ӈани хибяринд инд’’ӈэ?! Маня’’ хавнана’’ ӈамгэ тамна хибяри’’ таняӈа’’ам’?!

– Ӈани хибяри-и’’? –хадан сэв’’ сюртявӈэ хая’’. Пыда ӈудида мярта. – ибярид ӈока’’. Хуркари’’. Пыдар валакада… – пыда нян намданадарев’ сылы’’, нив ман’’, хад’’, вадам’ хэта ватодув та’’ма.

– Вадетва ӈоб’, – мань вэварахамадм’. – Тяха’ мале мань тарцядм’ нидм’ ӈэӈгу’’.

– Нумлаха тонд вархы ӈо’’лери мякна вэсакор пухуцянда ня’ илевэхэ’, – хадав ӈани’ лахана пяда.

Маньзьван пэсьда ӈадьдарха мякы харморпэй вэсакохона, сята сюртяв тёблёко пухуцяхана ӈоб’ хар’’н нись ӈаха’’на яӈгумы ирив хадан ня’ маниенарахадм’.

– Нюди’ яӈговы, -хадав ӈани’ ма. – Тыди’ таняса’’ам’, яӈгуса’’ам’ – вада нида хомбю’’. Тиртяхава выӈгана ӈокава. Хуркари’’ сармикад! Е’’эмняндо’ ӈобтарем’ вада яӈгу.

Вэсаконд, пухуцянд мяд’ иркы тонд иквахана сидямбой халя илевы: Пыряя няби Туи. Халяхаюд няслё илеӈаха’. Ӈавар тэвры. Икна ӈумл, явӈгар, сисор, халцур ӈокава – мал’ халянд ӈавар, Пыряр валакада ӈоб’’ мэва’ ӈамгэхэва ӈамнеладан’, ханзотан’ харбелы. Ӈамгэн’ харбелаванда е’’эмня пыда пон’ ибедорӈа, харта немэйсяваханда нензяманда нид тибяха’’на понта нянда си’’ям’ хортодава’ сер’ Туимд, ӈабобта, ӈамада тикымда. Вэсакор пухуцянда ня’ поӈгахананди’ пырямд сахалӈаха’, ӈамади’ тикамд. Тахаби сидди’ ӈо’’ Пыряркаӈэ нимдеба пя’’. Нюди’ ни’’им’ хань’’. Ӈобтарем’ Пырярка’’. Ти, вадаканд ӈо’’ та’ малда, – хадами маню’’.

– Ма-ал’?! – ялянд ямбан’ инзеле хамадавыӈэ, мань пысадм’.

– Мал’, – макодан’ сылась хадав ма, нядада: – Маня’’ ӈадьбята сяторэйм’ нива’’ ӈавор’’: няданда Пыреркыт’ тэнз хэбэй. Нисянди’ нямнахава пыдри’ – паханзедадима, небяри’ валакада…

– Пырей! – си’’ми хасяламда’’ хацясь, ян’ хан’ нид Сандрар тёре хэ’’нартада.

– Тад ӈо’’: пыда Пырям’ тэнзермитит сэвха’’на сырӈа, – ӈоб’’ ибедорць, хадава’’ ма.

Пихина ӈани’ вэн’’ тёревондо’. Пин’ санэюв’’. Пумнан – Сандра. Небява’’ ӈод вэдандолы’’. Пыда янда’’амна васана. Вэнод мале ни’’ мадар’’. Хаводо’ тёръялтамба тикыд тэвато’ нина ӈамды’’, яха’ няю’ сырӈа’’. Ӈамгэм’ намдомамдо’ – худ манэтар: хаводо’, тюндо’ вэнот пили’’ накры’’.