Я’ мал няна ӈока’’ манзаидо’ теневана’’ ненэця’’ иле’’, харвась’ харто’ манзаяханато’ манзара’’. Пыдадо’ нерня’ пэртя’’ хибяридо’ хэвхы’ округханана ханярина иле’’.

Илесь яндо’ хусувэй маркана, хусувэй район’’ ӈэсыкоцяхана, округандо’ еркы маркана ӈод’ тарця хибяридо’ тянё вани’’ӈа’’. Пыдо’ хуркари’’ манзаи’’ пэртя’’ поӈгана таня’’. Нянэювна тохолкода’’, лекарь’’, ерв’’, культура серу’’ пэртя’’, радио’, телевидение’ манзаям’ теневана’’, паднана’’. Ямалкана нянэй ненэця’’, хаби’’ харто’ вадавнандо’ сертабада газетыдо’ таня’’. «Няръяна ӈэрм’» нюбета газетадо’ маля синдтет юкад’ вата по’’ ямбан ӈадиберӈа’’. Тикы ненэця’’ вадавна падбада газета, малӈэ’ паднанида’’ ненэця’ тенз’ мэта’’. Ӈока’’ по’’ ямбан тикы газетам’ сертабавы Леонид Васильевич Лапцуй, паднана. Пыда яӈгу’’махаданда «Няръяна ӈэрм» газета нерм’ пэртяӈэ’ Хабыча Хываревич Яуӈгад тось. Ямальский раойнхана сямянд’ япда яхананда яв’ вархана мюсерта’’ ненэцие’’ мякана соявы, хойхана вадювы’’, мюсеромы’’ ненэця’. Тохолковамда ёльцесь Саля’хард маркы’ педучилищехэна тохолкодаӈэ’ тоходанась, тикахад’ Вологда маркана институтм’ ёльцевысь. Тохолкодаӈэ’ тянембёвна манза’’рахаданда ненэцие’’ газета редакторӈэ’ товысь. Партияхана манзарана нида’’ ӈока по’’ тяхана тарця манзаян’ тэвравэдось. Манзаямда теневана’’, округ’’мана хусувэй яхана мэвы ненэць’, тыбэртя’’, ёртя’’ илм’ сахарамбада ненэць’ Хабыча Яуӈгад тюку по’ неняӈг ирий’ еркы’ толыркана мат’’ ю’’ самляӈг помда ядабтась. Паднана ненэцян’ сейхад’ миндя’’ вади’’ янда’’хана’’ илена’’ теневана’’ нида’’ ӈэдараць. Янда’ тер’’ теневанида’’ мядоманзь’ мяканда ма’’лэйдаць. Маня’’ ӈод, паднана няха’’на, сава вадина хэтаваць. Ӈопой манзаяхад’ перева’’, нерня ӈод’ нина’’ хомбась манзарахова’’.