Вано савацянд сидя неда. Сидя нехэданда сидя хасава нюда сояӈаха’. Сянахав пода тарем’ пэ харданда мюня мэ’’эяда. Ӈаво’’ пирка’’на тарця иланда тябибтада. Идя вэва ӈэсеты. Пухуцяхаюта ня’ ӈобо’’ манзеты: - Ӈабтеди’, нянанди’ нидм’ илеӈгу’’! 
Ӈаворпато’, харта яхана, хард’ ёӈгана хыдямда ня’’амба ӈамдёсеты. Таняна  ӈаворцеты. Хонёбата харад’ латахана хонёсеты. Ӈаво’’пиркана мякаданда пилибт’’ хуны’’. Сянри’ хунат ядабата ӈод’’ неранда ня’ сидя пёднам’ манэ’’ӈа. Хэваханди’ тэвахава хонраӈахаюда: - Ӈамгэм’ пидади’? Сидя пёднар ма’’нихим’: - Нисяни’ ха’’махад, теда’ илебцамда тярпини’. Ӈопой паравы трубкам’ тярць я’’амани’. Сидни’ нядаӈгодакэн? Вано савар ма’’нив’: - Тикахав тарем’ ӈэӈгу’’ нив’: хуюмли’ мовы трубкам’ мер’ тэваӈгуда тиканди’ ӈамгэри ӈэӈгу. Паравы трубка ӈамгэхэна тарана? Няхаюда тарем’’ маӈаха’: - Трубкамд тюнеӈгур, тад нэкалтар ӈани’ хуркари’’ ӈавар’’ тэнз’’ ӈадимда’’. Вано савар яхад пякоцям’’ ня’’ама. Харасяда ян’ мода. Сидя няда мовы пянда пумна сюрбаяха’. Няхаюта сюрбахава паравы трубкам’ сепанда мю’ сюрӈада. Неры яд’’манда мин’’ сер’’ ялй’’. Тарем’ яданаханда неранда ня’ ӈани’ сидя пёднам’ манэ’’ӈа. Хахая тэвахава хонраӈахаюда’: - Пиднари’ ӈамгэ? Пыди’ ма’’нихим’: - Нисями’ хаясь, илебцамда тярпини’. Ӈопой ӈадсуй луца’ саварида хаи. Тиками’ тярць я’’амани’. 
Вано сава ма: - Ӈадсуй луца’ сава ӈамгэхэна тарана, ӈамгэмда пидади’? Пыди’ ӈани’ маӈаха’: - Тикы савар ёльце тарана. Тад сербат, сит хыбяхарт ни манэт’’. Няхаюда табэдамба тарем’ ма: - Теда’ савамди’ хэвня’ моӈгув, хуюли’ мер’ тэвада, тиканди’ ӈамгэри ӈэӈгу. Вано сава яхад няӈгадам’ ня’’ма, харасяда ян’ мода. Няхаюдатикы’ пумна сюрбаяха’. Ӈадсуй луца’ савамди’ пюрць хаихи’. Хартасавамда сепанда мю’ сюрӈада. Ӈани’ неры минда сер’’ ялй’’. Яданаханда ӈани’ сидя пёднам’ хо. Хонраӈахаюда. Пыди’ ма’’нихим’: - Нисяни’ илебцом’ тярпини’. Тярпадахатани’ палкасавэй хорова’ хоба хаись. Хобан’ тад мандан ӈани’: - Си’’ми’ хана’’! Сит хэсянд яханд’ ханаӈгу. Вано сава няхаюда ӈани’ нельтеӈахаюда. Хорованда хобам’ сепанда мюд тюхалӈада, тарем’ ма: -Палкасавэй хорова’ хоба теда’ си’’ми Нув’ параӈода’ хардаха’’хана’’. 
Хобанда ни’ тий’’. Хобада тю’’уцей’ санэй’’. Пон’ нись мы’’. Нув’ параӈода’ хардаха’’ тэвы’’. Хобацямда сепанда мю’ сюрӈада. Ӈобээ пархалъй’’. Ху’ тяхавы вэсакоӈэ хая. Параӈода’ харад’ помна яда. Пыянда ня’ тиндырӈа. Нув’ параӈода’ сидер’’ ӈыламна ядавы. Сидер’ сивня параӈода сита манэ’’ӈада. Не манзаранаханда ма’’нив:- Такы маяндорта вэсаком’ мяканд ханад. Ӈавламбад. Вано сава’ илевари серта. Смита ӈавламбасеты’’. Харад’ помна индя сер’ ядэрцеты. Параӈода’ не манзарана сита ядэласеты’’. Ханя’ хэбтя ӈод’ маниесетыда. 
Ся’’ны’ ӈэбта ӈод’’ хэхэ’ мяд’ сеӈга’’ тёрейд’’. Вэсако ихнянда ма: -Теда’ хэхэ’ мяд’ сеӈга’ тёреб’’, параӈода’ солдат’ сайнорманзь хэсеты’’. Хуняна пилибтари’’ ӈод параӈода’ солдат ятнолыд’’.