Маня’’ яханана харто’ӈудидо’ мэта’’ хибярина маркана , округна хусувэй ӈэсыхына таня’’. Тарця хибярина сертавы’’ манзаи’’ маркана танеда’’ выставкахана маниесьтына’’, ханяӈэхэна ивнянд’ ӈэда ӈавориком’ тэмдасетыва’’. Ӈокаюв’ мел’’ хибярина нюбидо’ теневына’’. Мел’’мана’’ манзаранина’’ хэвханана иле’’, харто’ манзаидо’ сертамби’’, хусувэдо’ яӈга манзарана.
Анастасия Помылева, Федосья Кауц, Александр Ледков, Филипп Ардеев, Виктор Вылка, Лукерья Валей, Маргарита Латышева, Наталья Латышева тарця нина’’ нюбедо’ теневана’’. «Мел’’ не’’» клубхана мэна’’ нина’’ саць сомбой манзаи’’ сертаби’’. Хусувэдо’ ӈока и’ӈута сертамбада манзаянда масьтебсеты, манзаидо’ несэюмдабсетыдо’. Няръяна маркана мел’’мана мазарана’’ харто’ ма’’люрць хардадо’ таня – «Мел’’ манзарана» мастерская народных промыслов. Тюкумэвахана этно-культурный центр’ манзаранина’’ мел’’хибярина е’’эмня ма’’лёвам хамандаць. Луца’’ вадавна тарем’ нюмдевы : Окружной форум «Сувенирная продукция Ненецкого автономного округа».
Тюку по’ тарця форум яханана нюртеймэвна ма’’лаць. Няръяна маркана няхар’’ яля’’ ямбан мел’’ хибярина манзараць, манзаянандо’ танеда’’ тоенана серудо’ ӈобкана тасламбиць. Хибярина хуркари’’ ӈамгарид’ манзаи’’ сертамби’’. Хибяхова лэхэд, пяхад матора; хибяхова пенахад, хоба’’ пускэцяхад’, нярахад’ сэдора; ӈанир’ ӈани ӈодякоцяхад’ паской’ манзаи’’ ма’’ламби’’; нябир’ сярода’’, тикахад’ овца’ таркад (войлокхад) ӈамгари сертаби. Округхана ӈод войлок’ мэць хибярина манзара’’. Мел’’ хибяри’’ няхар’’ яля’’ ямбан ма’’лыць. Тюку ирийна сидя ю’’ маттамдэй яляхана войлокмана манзарана Жанна Григорьева хибярина е’’эмня мастер-класс манэ’’лабтабись. Тикы не Архангельскхад’ турӈась. Нябимдей яляхана нина’’ малӈэ форумхана манзараць. Тарця ма’’лёва манзаям’ ЭКЦ ӈэвахана мэна нява Валентина Сергеевна Зганич минредась, сямянд нерде вадам’ ханась. Ихид’ ӈэда вадида мел’’ няхата тэврась. Форумхана лаханавы’’ хибярина тянё ниць’ ӈа’’. Маня округна мел нина’’ вадидо’ мэ’’ӈаць. Сувенир’ нямна Маргарита Латышева лаханась, пыда манзаяда тюку по’ Москва маркана ваеравы фестивалькана «Кочевье Севера» нюртей местам’ ханавысь. Хусувэй сувенир хибярихи’ мирда’’ма нерня сомбовна сертась тара. «Мел’’ не’’» клуб сертабада манзаи’’ нямна М.Е.Латышева лаханась. Хуркахова конкурсан’ тэвравы’’ манзаи’’ ханзер’’ манэ’’саръяда, сямянд сава манзаи’’ ханзер’’ тэрамбасьты’’, ӈамгэ тикы е’’эмня тара? – тарця сер нямна Марина Маргось вадам’ тэврась. Округна школахана тоходанна’’ ӈацекына няюв’ манзаравамда Харута ӈэсыхы тохолкода Светлана Михеева хэтась. Мел’’ ненэциена ма’’лёвахана ӈани яхад товы’’ хибяри’’ ӈод манзараць. Удмуртияхад’ В.П.Степанов турӈась, яханандо танеда Удмуртской государственной университет декоративно-прикладной искусство кафедра доцент. Пыда харта манзаида манэ’’лабтабись, ӈокаюв хибярина тарця манзаи манэць, тэмдабидось. «Ибыр весь» – «Обережные бусы» нюбета мастерскойдо’ яханандо таня’’.
Мел’’ хибяри’’ малёвахана ӈока тарана серудо’ таслаць. Нито манзаи’’ манэ’’ӈа, харто манзаидо’ манэ’’лабта’’. Тад нерня ханзер манзаравамдо’ ӈобкана ваде’’ӈадось. Хусувэй манзарана мел’’ хибяри’ харта манзара,сертабада манзаяханда ӈока ныхымда паклемби, ида хусувэй сертабада манзаянда нямна пилибт ядэрцеты. Ӈодьбяндо, тарем ма’’люрма’’ нянандо саць тара.
Пудана яляхана нина’’ ӈобкана нылэйдаць, мядондидо’ мят ядалэйдось. Удмуртияхад’ турмы хасава пуданана тарця вади хэтась: – Пыдара’’ ӈэрм яхана иленаӈэ сава хибярида, сёнзянда мюй’’ ибака’’, яра саць паской. Тад нерня ӈод, ямда мэнесь иледа.
