Я’мал няна илена не Нейко Янгасова илеванда ямбан ненэцие’’ лаханако’’, вадако’’, иле’’ми ма’’ламби. Тарця ма’’лавыда книгаӈэ’ хан’’ӈа. «Ненэця’’ вадако’’, сюдбабц’’, ярабц’’» книгахана «Нямд Пай Вэсако» лаханако падвы.
Тынзями нэкалӈам’. Си’’ив хабтаркав ӈэда’’ нинав’. Сидя хабтарками подерӈахаюн. Ӈэдалёби’’ мюмня ӈэдала’’ ни’’ивам’. Ӈадяда тюнд’ ни танэйв’’. Няхар’’ Тавысе’’эт мядодо’ сэван’ ӈадимя’’. Ӈадяда мяк’’ ӈамгэ пон’ мимнам’. Ненэсянда ӈо’’ ханъер ӈока. Сидя’ мяд’ ӈобт’ вэтавы’’. Мяд’ мюня ӈопой марнадо’. Мят ядава’ сер’ сырӈам’: тет нямд пай си’ няна сяры’’, ӈахат хандо’. Нём’ тядэдам’ ламдо лы’ пират’, пирця лы’ пиран’. Малцана тэта’’ ню ту’ хэвхана наро’ ниня ӈамдёвы. Мядонда’’мананда пэм’ хамдапи. Малцана тэта’’ ню пыда тарем’ ма: – Нюдя Сэв Сэр’’ ӈани’ товэнанё’’. Небой похона тюкохона турманолсеню’’. Мань тарем’ мадм’: -Небой похона турӈадамзь. Пыда’ тарем’ ма’’: – Мядонда хасава, ӈамдад’’! Мань тарем’ мадм’: -Ӈамдӈгувма. Нё’ сава ерт’ ти ӈамдыв’’. Пыдо’ тарем’ ма’’: -Ӈари’’ тю’’уку’ ӈамдад’’! Мань тарем’ мадм: – Сырасавэм’ ӈэдакэм’.
Таня нё’ ерня ӈамдёхом’. Небяв не’’я нёхобтарё едм’ пиремби. Харта нюмда ехэрана вуни таня’’. Ӈадябата си’’ми тумда. Небяв вад’ нё’ няку’, вад’ нё’ няку’, пин’ сакада. Небян пумна мань ӈо’’ пин’ санэйв’’. Тет нямд пай сярыць, небян таняна хэвы. Ӈадябата ханм’ ӈэдаби, мэта иням’ екаби. Хунтаванзь мэй’’.
Сянари еӈгари’ таняна хаям’. Ханм’ екабадам’ небяв тырахалӈав. Нивэв ёльце’’, небян ӈэвэйда тяныд’’. Тет нямд пай’ иням’ екав. Хэвня’ ӈэдалэйв’’. Ваӈган нултав. Ӈаха’’ ним’ хань’’. Инзелем’. Малцана тэта’’ ню пыда мамонда: -Мят’ тюсь, тикан’ ня’’ма тарась. Маня’’ маваць нюдя Сэв Сэр’’ ӈэдакы. Ӈамгэ яхананда вадёхаявы, тарси’’ ӈармы. Нюдя ӈэдаханда хадаб’’на’’ тарась.
Ханав мэёвна сярам’, ӈанав тюхулӈам’. Ӈока мядо’’ няю’ ял’’ ни’’вам’. Юр’’ тибян’ нулъяв’’. Си’’ив яля’ ямбхана тюни мал’ хадэйн. Неяков хаирев. Ханахан хаям’, харасяда ян’ ӈэдалэйв’’. Сидя си’’ив ӈэдалым’. Сидя си’’ив ӈэсоӈгана самбляӈг ю’’ мяд’’ ӈадимя’’. Мят’ нултав, мадм’: -Ӈамгэрт енар’’ хыбя яӈгу? Нери’’, ӈацекэри’’?
Пыдо’ ма’’ним’: -Ервутава’’ тюняха’’ хаясь, няхар’’ Тавысе’’э мят’ хаясь. Мань тарем’ мадм’: – Нида’’ ни’’ тут’’, сян нёйда’’ ӈате’’. Харта’’ инда’’ сер’’ иледа’’.
Ӈани’ тяха’ ӈэдалэйв’’. Си’’ив ю’’ мядм’ хом’. Ӈани’ хыбяхарт ервотадо’ яӈговы. Пыдо’ ма’’ним’:- Ӈаркана’’ тюняха’’ хаяць. Мань мадм’: – Неда’’ ӈэбта’’ ӈо’’ нюда’’ харта’’ вадэйда’’. Мань яни’ ед’ миндяра’’ яӈгоя. Нюта’’ нюхурт нёда’’ ӈэдарамбю’’. Пуня’ хаям’. Мяк’’ тэвыв’’. Неякон’ мадм’: – Тюку мя’’л мань е’’эйми. Ты ӈани’ мань е’’эйни.
Ты танам’, неякон’ мадм’: – Мя’’ал хавда’’.
Ти мюселъяни’. Хабтарка тэта’’ мят’ тэвыв’’. Мят’ тюм’. Хабтарка тэта’’ нем’ ханав. Нянда мадм: -Сит ханаӈгум. Ямдаӈгуна’’. Тудав пюрмани’ маляӈгана сава вадам’ хэтанась. Тикы вадит’ е’’эмня сит мякани’ ханаӈгум’. Нехэвадни нинякэн тараӈгу’’, не хабими ӈэин. Ялэма. Хабтарка тэта’’ не ты танаби. Тикана’’ ямдэйна’’. Сыра’ ямбан’ мюсева’’ Мюсеняхана’’ ты’’ ниселыд’’. Сэв Сэр’’ ян’ тэвына’’, неяков недани мэв. Сидя неми. Та’ илелъяна’’.
Та’ малда.
