Округна этно-культурный центрхана манзарана’’нани’’ маркана илена’’ хибяри’’ культурно-деловой центр’ мякана ма’’лабсетыдо’. Хуркари’’ ихиня сомбой ма’’лёва хамадабсеты, ханяна хибярина ӈобкана ныланасьтыд’. Тарем’ ӈод носиндалава ирийна сиднтетимдей толыркана ӈась.

«Арктикам’» нюбета хардахана ӈока хибяри’’ ма’’лэйдаць. «Венок дружбы» нюбета ныланавам’ ӈобкана мэ’’ӈаць. Тарця ма’’лёвава хусувэй по’ танесеты. Яханана «Клуб землячеств» таня, тарця клуб’ манзаям’ пэртина тюкумэвахана хибяри’’ ма’’лаць. Невхы’’ похо’’на яханана тарця ӈэсы’’ таняць, хуний тены’’ похо’’ нидаць’’ тэв’’, тарця ӈэсы теда округна картахана яӈгу’’. Тарем’ ӈэбнанда ӈод, тарця ӈэсыкоцяха’’на соявы’’, вадюданвы’’ хибяри’’ теда ханярина иле’’. Ӈопой яхад’ перена’’ хибяри’’ сяӈгова сусандавы’’ ӈэсыдо’ илелътембидо’, землячество’ сертамби’’. Тюку ялян’ лаханая, округханана землячество’’ толыр’’ няхар’’ юд’ мян’’. Вижас, Никитцы, Кореговка, Ледково, Просундуй, Сопка, Голубковка, Варандей, тамна тарця ӈэсыкоця нюмдева’пир’’, ханяна хибяри’’ маля ни’’ иле’’. Тюкумэвахана ма’’лёвахана округна ӈэсыхыт’ товы’’ хибяри’’ таняць, хуний харто’ ӈэсыдо’ сахарамби’’, харто’ ӈэсыто’ историям’ ма’’лаби’’. Хорей-Вер, Усть Кара, Каратайка, Харута, Андег ӈэсы’ тер’’ харто’ манзара’’мидо’ тэвраць. Янда’’хана илена’’ хибяри’’ харто’ ӈэсыто’ нямна стенд’ хамандаць, хуркари’’ тадтавы’’ манзаидо’ манэ’’лабтаць. Тикахад’ хусувэй землячество’’, хуркари’’ тенз’ мэта ненэця’’ харто’ ӈаврадо’ тэвраць. Ханяӈы’’ ныланавась товы’’ нидо’ мядолабтабиць, ханяӈы’’ ӈаворидо’ мирдапиць.

Нюдя’ я’ тер’’ нина’’, Саляхад’ перенина’’ ӈобкана сян’’ по’’ тяхана ма’’лэйдаць. «Нюдя ява» – «Малая земля» землячеством’ ӈадимдець. Тюкумэвахана Саляхад’ тарпвы’’ нина’’ харто’ лоходо’ танясь. Стендхана тадтавы’’ манзая’’ ӈокаць, невхы похо’’на илевы’’ нито’ нямна падвыдо’ таняць. Округна хибяри’’ поӈгана Саляхад’ тарпвы’’ хибярина ӈока, хуний хуркари манзаяхана са’’ӈаць, хуний илевандо’, манзаравандо’ ямбан яханана ӈока сава серм’ сертаць. Ӈопой тарця не Роза Ивановна Канюкова. Тикы не образование’ серкана сертавэда тянё ни’’ӈа’’, илеванда ямбан вадава тю’’увкури пэртава. Теда ӈод маля ӈарка хибяриӈэ’ хэсь тамна нерня’ пэрӈада. Роза Ивановна сертавы’’ манзая’’ презентациям’ Саля’ тер’’ нина’’ манэ’’лабтаць. Сертавы’’ манзаита поӈгана тюку по’ ӈадимы манзаида таняць. Тарця манзаи’’ манэ’’сарць хибярихина ёльце савархась, хусувэдо’ хонаркосьты’’: ханяхад’ тарця книгам’ ханаб’ сава, ханяна мирдапидо’? Ӈани’ тенз’’ мэта хибяри’’ ӈод ненэця’’ вадам’ тохолаван’ харвадо’. Ма’’нисям’: тарця книгава танябнанда маня’’ ӈод сян вадам’ тохолаӈгува’’, тикахана хамадабгува.

Людмила Алексеевна Булыгина стендханандо’ танеда ӈаворито’ нямна ӈока вади’’ мэ’’ӈась. Харто’ ӈэсындо’ нямна викторинам’ сертабись. Саля’ тер’’ нина’’ тамна сава вадам’ Юрий Выучейской нямна хамандавыць, тикы хасава Нюдя яхана соявысь, тикахад’ лекарьӈэ’ тохо’’махаданда илеванда ямбан Ханты-Мансийской округхана манзаравысь. Тикы ненэць’ нямна падвына ӈани’ си’’ивхана таневнда газетана толаӈгуда’’.