Параӈода’ харад’ няби вэкана, маха левсей хардако’ мюня маӈгабада вэсако илевы. Няхар’’ хасава нюдя. Ся’’ны ӈэбта ӈод’’ вэсако нюхата ма’’нив’:-Теда’ ӈармаданё’’, тарем’ ӈэбта сава ӈэдараха. Параӈгода’ хардаха’’ недбятаванзь хэбта’’ сава. Нерде  ӈарка няра’’ хэя.

Ӈарка хасава нюӈэ инзеле’’: - Поп вэсако’ мяд’’ хэрабтан’’, хальмер’’ нямна хэин.  Тад хуняна некадо’ хая. Нисянда табеко’’ма’ сер’ хая. Параӈода’ марцяхэхэ’ маряд’ нёхона нувэхэ’. Пыда тарем’ маси’’: -Параӈода нянани тара. Параӈодахана манзарана ни тара’’? Пыди’ манзь ханади’: - Манзарана ни тара’’. Тикахав ӈэя. Тарем’ сырпата ялянда пакалмарида хаи. Ихинянда ма: - Мякани хэб’’ни сава ӈэдараханё’’, манзаядами нивандархадамнё’’ ху’’. Мята ня’ ялй’’. Пон’ яднакы, яляда сэя. Мунзи’’ идя ядэрӈа: - Хальмер’’ нямна хэб’’ни’ пэбинё’’, поп вэсако тахав’ ни’’ хона’’, манзаранида ӈод’ӈани’ ни’’ хоню’’. Таняримна хэб’’ни’ сава ӈэдараха.

Поп вэсако’ мяд’ нямна хая. Харад’’ няби вэк’’ ӈод’’ тэвы’’, маханда няна есь’’ лаб’’нам’ намда. Тад сылаванда маханда няна поп вэсако нувы. Поп вэсако ма’’нив: - Маӈгабада вэсако’ ӈарка ню ӈэт’ ни’ ха’’мавэн. Ӈамгэ сер’’ нид тюкон’ тэвын? Вэсако’ ню ма’’нив’: - Параӈодахана’’ манзаядами пюрць ханаӈадамзь. Манзаям’ нидм’ хо’’.

Поп вэсако ма’’нив’:- Манзаяхав тюкохона таня’’ ни’’им’. Теда’ мань ӈудасяда, ӈэсяда хасава нюми таня’’нив’. Пыдар ситя пин’ тэварамбаин, мят’ тюлебаин, ӈавламбаин. Ӈаворкава ӈобкана мани’ ӈаворъини. Ӈопой мань ини сер’, ватони сер’ ӈэин. Теда’ мань ватоми’ тарця: - Ӈопой по’ ямбан’ нянани манзараванд ямбан’ вэва вадам’ нянд ваде’’пани, илебяни’ няби пелям’ нянд таидм’. Пыдар вэвако вадам’ мэпат, недбяси’’  хантан.

Тиканди’ мят’ тюӈаха’. Едамди’ пяӈаха’. Лаханакурӈаха’. Ӈаворманди’ сер’ маӈгабада вэсако’ ню’ хумда нянда син’ ӈод’’ мэӈгудась, ӈоб’’ лахананам’ намда. Поп вэсако нянда маси’’: - Маӈгабада вэсако’ ню манзаяр пядава. Ӈавормадавэй’ манзаямда пяда. Манзара пэй’’. Поп вэсако’ нюм’ няхар’’ яля’ манзая’’ӈада. Ӈоб’ ӈавормадавэй’ хаюрӈа. Няхаромдэй ялянда ӈэсоӈгана маӈгабада вэсако’ ню манзь ханада:- Есьтана поп вэсако, мань теда’ няхар’’ яля’ ӈавормадавэйдамнё’’, нидм’ хаӈгу’’? Есьтана поп вэсако няханда тарем’ масьнё’’: - Теда’ мани’ тарем’ тасламиси’’, няха’’ни вэва вадам’ нини’’сянё’’ вадет’’. Теда’ недбяр яӈгу. Хань’’!  Хуркаси’’, хараси’’ мяканда хаё. Ӈэванда нибкала мяканда тэвы’’. Маӈгабада вэсако нюхунда масьнё’’:- Нер’’  мадамзянё’’, поп вэсако’ мя’’амна нён хань’’. Тедахав’ ханзер’’ мэӈгува’’, ет’ мале тарем’ ерев’’ нив’.  

Хуняна Маӈгабада вэсако ёнэй нюхунда маси’’: - Теда’ пыдар параӈода’ хардаха’’ манэ’’ир. Маси’’ манзаям’ хоӈгун. Ӈопой неканд тотрев’ поп вэсако’ мя’’амна нён хань’’. Тад хуняна техэ яханда нэкалӈада.Нянда тотрев’ параӈода хардаха’’ тэвы’’.