Ӈэсыхынана’’ ӈани ханяӈэхэ’’на маймба илемась, ӈани ханяӈэхэ’’на тябихутась. Ты мядо’ хэван’ танабто’, саць сава ӈэсьты. Сеӈгако’’ тайна’’, тобако’’ лакадарӈа’’. Ненэця’’ я’’авлахамзеты’’, ӈаркаркавна тёрырцеты’’.
Валакада тикыримда хамада я’’мав. Ханзер’’ ӈэда ӈамгэ? Ты’’ мандал’’ сюреде’’. Ваӈгды’’ суюдо’ пюрӈа’’. Ненэця’’ ӈани’ тикымбохона сяйрамби’’. Манзьван сюдсавэй’ яркалаӈгумась. Ти, ты’’ вынд’ танабэй’’. Сейкоми есьмя. Мяд’’ евакодрев’ ну’’. Сянакохорта няв яӈгу. Евдяко папаков саць нюдя, ӈоб’’ ӈудан тарка’’ – ӈокарка’’. Ӈухукорида сянаку’’ӈа. Микитко тамна таня нив. Вэра Семён’ ню. Нядан пеӈган пирувна пирцярка, инда ӈу’’ ӈань’’ тынзя’ пирувна хэмарка ( тикымда саць сававна теневав). Ӈарка’’ хибяри’’ манзьты’’:- Пыди’ ӈобкана соябэйха’. Ябсяда похона тобэйха’. Тев’ мальӈгана тюнд’’ ӈэваха’’на нярцо тоена ханимгась. Сояхава сидя ирий пирувна школамди’ пубтади’. Ӈадьбята тоходанвахад ва’’ларэйбэйхась…
Ӈоб’’мэва’ школахана тарця серт’ еремямась. Шкаф терсись. Мюньда валакада сянмбой невхы книга тамна пудкодрев’ маномбэй лата’’я падар’’ танявы. Манзьван таӈга ӈамдымась. Тамна халъява мянась, хонёва мянась. Посанана Егорко нян ма’’нив: – Нянд мамзиню’’, тюкона нянанд сава ӈэӈгу. Мань ӈод’’ пыдар классхананд сяхав’ лыӈгараӈгув’’. Классан’ таисья Петровна, тохолкода, тюнараха. Ӈацекы’’ лакри’ мунзялма’’, сыӈгосялма’’. Тохолкода мамононда: – Надя, шкаф’ мюд нумлаха табличкам’ мэ’’, классной латан’ ӈадад. Толыр’’мана нядаӈгодава’’, ха’’авраӈгодава’’. Не ӈацекы саць мерець ядалтархы’’. Няӈэн’ яднарха. Мань лэрё ниду’’м сана’’. Шкафан нё харта ӈэсонда няӈгаръй’’. Не ӈацекы пуня’ тёрсавэй харцей’’. Тохолкодари нись парумбю’’ някун то. Си’’ми ӈудахан тоса ня’’ма, юнра: – Хасавако, ханяӈы классхад тон? Ӈацекы’’ мал’ нидо’ нертемба лахана пядо’: - Тикар Нюдяко Валей. Сямянхат Егорко Явтысый я’’авлысь. Пыда нида тырцпа тохолкодаханда хэтна: – Таисья Петровна, Нюдяко нита ня’’ тоходанван’ ни харва’’. Пыда буквы мал’ тенейда, толанзё мян’’ӈа. Нюдяков! Тарем’ нив ӈа’’? Маньен ӈэварив туйласьтым’, «тарем’, тарем’» хэтнадрев’’. Тикымбохона хар’’н тохолкодав то, «безобразие» вадасавэй’ си’’ми харта классханда вадла хана.
Урок’ пуна харедорт’ тарпва серта яӈгосеты. Ӈацекэ’’е минханда нян вадасавэй лабценасьты’’, та’’альтеӈгодарев’’ юнрасеты’’: - Нюдяко! Сидна’’ классхат мэӈгун? Пыдар хэвханат тоходанва мянри, хонёва мянри. Пилёдарев’’ лабцеӈга’’. Пилё’’ тарем’ сэрако’’ хоба’’ ни’ лабцеӈгасеты’’.
Ненэця’ вадавна
Роза’ хэтвы’
Александр Канюков падвы повесть” пелякода
