Маня’’ округханана культура’ похона хуркари’’ ихиня сомбой сер’’ танесеты’’. Культура манзаи’’ пэртя’’ нина’’ тикы е’’эмня ӈокавна манзара’’. Тамна тарця хибярина яханана ӈока’’, хуний хуркари’’ серка’’на мэбе’’ӈа’’.

Пыдо’ харто’ минрена’’ манзаяха’’нато’ нисьты’’ хаюр’’, тикы’ хавна тамна ивняндо’ ӈэда серудо’ танесеты’’. Хибяхова’’ сэдорась мел’’, сэдорасьты’’, хари’’ ӈудаха’’нато’ сян’’ тенз’ паской манзаи’’ сертасеты’’. Хибяховина’’ хыно’’кад’ ӈэсьты’’, пыдо’ сё’’ мэць, хыноць я’’авлада’’. Тарця нина’’ ӈани’ яханана танеда’’ фольклорный коллективха’’на’’, ненэцие’’ театрханана сянаку’’. Хибяховина’’ паднава серкана ныхы’’ӈа’’. Пыдо’ ӈани хуркари’’ иле’’ми’ падби’’, стих’’ ӈэдакы’’, пьесы’’, рассказ’’. Тарця хибярина’’ маркана иле’’, округна хусувэй ӈэсыхына таня. Хуркари’’ сер’’на мэбета хибяри’’ маниесь ихиня’ маймбцо ӈэсьты.

Носиндалава ирийхана « На бис» нюбета концерт’ ваерась. Таняна хуркари’’ сидя ёнар’’ няхарамдэй яӈганя тетимдей яӈганя похона нердевы’’ хибяри’’, коллектив’’ нюмдебиць. Пыдо’ нямна сценахад’ ихиня сомбой вада’’ соць, пыдо’ грамоты’’ ня’’амбиць, ӈамдэд’’ няндо’ тэвравыць. Тарця коллектив’’ поӈгана «Мел не’’» клубхана ма’’люрта’’ нина’’ нердець. Таняна мю’’люрта нина’’ маля мат’’ по’’ ямбан ӈобкана ма’’люрӈа’’, таӈок по’’ ямбан сэдора’’. Пыдо’ ӈудаха’’тато’ ӈока сомбой манзая’’ сэдвыць. «Мел’’ не’’» маля харто’ историядо’ таня. Мат’’ по’’ тяхана сямянд’ нюрте не’’ ӈобт’ ма’’лэйдаць. Тамальӈгана хибяхартадо’ нись’ ман’’: тюкохона пон’ мэвндява’’ ӈэдакэва’’? Ма’’лэйяд, ивняндо’ ӈэда манзаидо’ сэдбиць, ханяӈы’’ сэдорась тоходанаць. Нюртей нида’’ ма’’лавы не’ Екатерина Никитична Бобрикова. Илеванда ямбан сэдорана не, ӈока по’’ ямбан Ненэцие’’ школа-интернатхана тоходанвы’’ няюв’ манзарась. Пыда «Мел’’ не’’» клубхана мэна’’ нида’’ ӈод ӈока сава серт’ тохолась.

Тюку ялян’ лаханая, хэтась тара: Няръяна маркана танеда’’ «Мел’’ не’’» клуб’ мэбета клуб’. Мат’’ по’’ ямбан пыдо’ тю’’у сававна и’’илыд’’, вады’’. Таняна сэдорана’’ не’’ манзаидо’ хуркари’’ выставкаха’’на танесеты’’. Маня’’ яханана илена’’ манэ’’цетыдо’, тикы’ хавна ӈани’’ яха’ тэворцеты’’.

«Мел’’ не’’» клуб’ манзаям’ нерня пэртяӈэ’ теда Маргарита Егоровна Латышева тара. Пыда нида’’ хусувэй си’’ивхана ма’’ламби’’, не’’ ӈобкана сэдора’’, няхататто’ тоходана’’.

Теда сэдо’’рахая сертабада’’ манзаидо’ ӈод ӈарума’’, нянэй паным’ сэдась хусувэдо’ мян’’ӈа’’. Ханяӈы’’ не’’ харто’ ӈуданато’ сэдвы’’ ной’ паны’’ мэ’’ӈа’’. Ӈопой’ вада – пыдо’ пэдова’’, ӈоб’ нерня таремъюв’, харвась, маймбась манзарада’’!