Вы здесь

Хынокад хасавам’ тенева’’

Семён Няруй – композитор музыкальных образов / Фото из открытых  источников

Си’’ив ю’’ самляӈг по’’ тяхана Саля’ яв’ вархана ёнар’’ хасуюёнар’’ тет ю’’ маттамдэй яляхана ӈарка пэвдей ирий’ маттамдэй яӈганя толыркана сём’ мэта нява’’ Семён Николаевич Няруй соясь.

Нянэй ненэцяӈгат’ пыда нертей сё’’ падабадава’’, композитор, хынокад хасава.Тены’’ похо’ таслась, Семён Няруй падвы сё’ янда’’хана илена’’ ненэця’’ мэйдо’. Ӈарка ненэця’ нямдо’ ханярина илена’’ ненэця’’ теневадо’, тенедо’.

Пыда сёмда ханабата
Пыда тад’ хынолпата
Сёрида ӈэрм’ я’ нимня хайна
Ямал’ хоё» помна ханда
Ӈэрм’ нумгыда сюдре сонараха
Ӈарка’’я вабцхананда сёрида тайнанараха
Харп’ сюдарта сехэрым’ нёракутараха.

Пыда сёрида хайнась
Нюкубц сём’ ханась
Пыда вабцда ӈаркась
Маня’’ выӈганана’’ соясь
Сё мэта сехэрым’ нёдась
Неда’ мюмня сёёда пыдаранараха’
Марнана сырако’ ниня нявотадараха’

Тикы нерде’ тарем’ ненэй сё падабавы ненэць’ яӈгусь. Семён Николаевич Няруй сём’ мэць пяванда сер’ сёда падарт’ падабась пяйдась. Пыда хынокад’ мяд’ тер’’ мякана соявысь, со’’ямахаданда мякнанда сём’ намдурцеты. Небяда’, нисяда’ илеванди’ ямбан’ сё’’ мэ’’ӈаханзь. Пыда школахана тохолкованда мальӈгана сём’ мэ’’мам’ харвабтавэдась, сёнзянда мю’ мэёвна паклевэдась. Школамда ёльце’’махаданда училищехэна музыка’ серт’ тоходанась, тикы’ пуд’ мале манзараванда сер’’ консерваториям’ ёльцесь.
Пыда илеванда ямбан’ сёё мэ’’ӈась, пыда ӈаркая вабцамда хусувэй ненэць’ теневадась. Теда’ пыда сём’ мэ’’мы сехэрэмда хасава нюда Нядма Няруй нёдада, ӈобтарем’ ненэй вадавна сё’’ мэ’’ӈа. Нисянда сём’ нерня’ минреда. Нядма харта хынокад хасава, музыкам’ падаби.
Семен Николаевич Няруй мяд’ тер’’ мал’ ненэй вадамдо’ савовна теневадо’. Семен Няруй пухуця’ Валентина Нёликовна Няруй ненэй вадавна школахана тохолкода ӈацекы’’ е’’эмня тарана литературам’, учебник’’, учебной пособия’ ӈока по’’ ямбан’ падаби. Пыда ненэй вадава ӈоб’ нерня минреда. Теда’ хасава нюмда хусувэй серкана нядабида.
Тюку ирий’16 яляхана Ямалкана илена’’ хибяри’’ Семен Николаевич Няруй тензебтембиць. Пыда’ сёда ӈэрм’ яхана пилибт’ соӈгу, тенеӈгува’’.