Вы здесь

Ивъер’ манзарана нява’’

В центре – Екатерина Корепанова, сотрудник сортировочной почтовой службы / Фото из открытых источников

Ваеравы по’ пудана’’ яляхана ихина сомбой юн’ намдаваць. Няръяна маркы почта’ сортировочной службахана’ манзарана нява’’ недво’’мы наградам’ ня’’амась.

Екатерина Васильевна Корепанова почтовой отделенияхана ӈока по’’ ямбан’ манзара, манзаямда теневана не. Пыда Дмитрий Михайлович Серебряков’ микрорегион’ директор’ Благодарственной письмом’ ня’’амась.

Почтан’ манзараванзь Екатерина самляӈг яӈганя по’’ тяхана тось. Тэри’’ тарем’ нись ту’’, манзаямда сававна теневадась, тикы нерде’ манзаравада мале тянё нись’ ӈа’’. Теда’ пыда харта ӈацембой манзараванзь товы’’ нида’’ тохолаби, хусувэй серкана нядаби.

Екатерина Васильевна – Канинской выӈгана мюсермы’’ ненэця’ мякана соявы. Небядо’ мер’’ яӈгумысь. Небяси’ хаювы’’ ӈацекы’’ вадабась хададо’ нядаӈговысь, интернатхана илець. Школанда’ пуд училищем’ ёльцевысь, почта’ манзаям’ пэртяӈэ таняхад тарпыць.

– Манзаяв’ ивнян’ ӈа. Ханяӈэхэна саӈговоцеты, пэдасетыв’, ныхыми’ яӈгударха’ ӈэсеты. Тарем’ ӈэбнанда ӈод’’ савада манзаянан’ ӈокарка, – тарця вади’’ Екатерина Васильевна хэтась. – Хибяри пон’’ ӈатевы посылкам’, письмом’ ня’’амбата маймбаӈгу, тарцям маниесь ихинан’ саварха’ ӈэсеты. Ханяӈэхэна ӈарка вадам’ хэтасеты’’, – ванерабтёсь Екатерина лахана.

Сава сер’’ хибярихи’ тэврамбава, хусувэй яля си’’ми манзаяхан’ парумбась ядась табадаби, мань хибярихи’’на’’ тарана манзаям’ пэрӈадм’.

Тамна Екатерина Васильевна маймбась «Родные напевы» народной фольклорной ансамбльхана хыно’’ӈа’’, хусувэй репетициянда харвась ядсеты. Тикы’ хавна «Илебц» ненэцие’ народной театрхана сянакосеты. Пыда нянэй не, сававна харта вадавнанда лахана, ненэцие’ традиция’’, ил’ ватом’ теневана.

Едэй пом’ ядтава’’. Товы похона Екатерина хусувэй ӈамгэда сава ӈэя, сававна илея, маймба манзаяханда ядэрӈая. Пыда сёнзяда сава некоця, нямбара, тарця хибяри хусувэй ӈамгэда сава ӈэбнанда тара. Енам’ тарем ӈэӈгу. Илевахананда’ ӈод’’ хусувэй ӈамгэда сава ӈэвндя!