Хэвхы округхана ненэцие’ вадавна падбада «Няръяна Ӈэрм’» нюбета газетахана маля ӈока’’ по’’ ямбан Няю Вэнго манзара. Минрена манзаита серо’ нямна явнанда ӈэдалёрмаханда ненэцяӈгат’ ярабц, сюдбабц, лаханако падбасеты. «Петров луца’ вадавы – Вэра’ ӈацекы» ярабц’ ӈани’ тарем’ ховэда. Тюку яля’ нертей’ пелямда толада’’.

Сэвни’’ тяхад Петров  луца си’’ми вадавы. Инда’’ми’ пирта ненэцяӈэ хэ’’мяхадани’, Петров луца ненэцяӈгат ты’’ тэмда. Ты’’ тэмда’’махаданда пыда тарем’ ма:

- Теда’ ӈарман, тыд ти’’ӈэда’’. Тыд хадоламбан’’, лэтамбан’’.

Мадорота яха’ хэван’ тыни’’ ма’’лэян. Тэсавэйӈэ хэ’’мяхадани’, ты’’ пэртяӈэ мань таня иледм’. Ӈамгэ’ пиркана няхар’’ сян по’ иле’’мяхадани’, си’’ми’ вадавэми’ ӈани’ то. Пыда тарем’ ма: - Ӈопойӈэ иле вунир пират’’. Теда’ недамд пюӈгудм’. Ёндар’ не ню таня. Тикы нем’ неданд мэб’’ни’ сава ӈэдараха.

Петров луца тиканда хая. Вадари нивы ӈа’’. Ёндар’ не нюм’ тэврада. Не мядм’ мяра. Нени’ ня’ та илелъяни’. Луцами’ ӈаврадми’ пили’’ тамбасеты. Ябе идм’ тэвра ӈани’ ни юрыбю’’. Недми’ мэмахадани’ ялэ’’ ябесетыдм’. Тад ябелмани’ Ёндар’ не ню тыда харта ялэ’’ лэтамбасетыда. Таӈы ӈэбта, тыда харта хадоламбида. Манзьван ялэ’’ ябесетыдм’. Тасламбабани’ няхаркав’ по’  ябенярхадм’. Тарем’ мэнахани’ Петров луца товы. Пыда тарем’ ма:

- Вэра ӈацекы, ӈамгэр хадкэ? Нидамзянё’ ман’’: ялэ’’ ябеин! Тэдамд тэмдавы’’ тыни’’ нецейр ялэ’’ лэтамбида. Ты’’хадоламба са’’лан ӈэвэн: теда’ ӈанохана нянани’ ядэртан. Ӈано’ енертаӈэ тараӈгун. Хурка мань ӈод’’ ӈанохона ӈани’ ядэртадм’. Ёндар’ не ню тыда харта маниеӈгуда.

Тикани’ ӈанон’ тияв’’. Такы хардаха’’ тэвына’’. Петров луца ӈаномда хамеда. Манзаранаданда, лабетанаданда няхар’’ юр’’ луцам’ пэӈа. Ӈанохана’’ тийна’’. Тад манзадавана’’, няхаркав’ иры’ пиняри’ миӈава’’. Тарем’ сырпани’, ханесэйна’’ ӈо’ сэро’’ ниня ва’’анда тэрха’’. Петров луца тарем’ манзеты: - Ханесэйна’’ тамна палькато’ тэваӈгуна’’.

Мань манзетыдм’: - Ханесэй’ ӈоканё’’. Тикарихад ханехава’’.

Петров луца ӈани’ тарем’ ма: - Тамна палькато’ тамна тэваӈгуна’’.

Тяха’ тамна мирнава’’. Ӈо’ сэр’’ ядувна нултава’’. Сэр’’ний тедахав’ париде. Си’’ми’ вадавы луцами’ ма: - Пявандид ти’’, енерць пэд’’! Няхар’’ юр’’ луца тэванаӈгу’’, ӈанидо’ яханаӈгу’’.

Тад енелавани’ ӈано’ пыя’ нид тунини’ малри сюра. Луци’’ пелядо’ яхана’’, ӈани’’ ядавыни’’ тэваби’’. Ӈаномдо’ ханесэйха’’на пэмбидо’. Ӈанондо’ тю’’уй варм’ пенд’ ёльцедо’. Петров луца ма: - Тикамбоховада хамба’ ӈэдяӈэ тарая.

Ӈанова’’ пэмба малесь, луцава’’ ма: -Салаба ни’ хорк’’ ха’’аврада’’! Хаӈоротаӈгува’’! 

Салаба’ ни’ ӈавар’’, иде’’ ха’’авра’’. Няхар’’ яля’ ябева’’. Няхар’’ ӈэсоӈгана Петров маси’’: - Масярка ӈэя, тикамбохобидо’ ӈо’ сэр’’ ниня таня хаёя’’.

Ханесэйна’’ пеля’’, хаӈорона’’ салаба’ ниня таня хаи’’. Ӈанохана’’ тийна’’. Ӈобкав иры’ пуня’ мякна’’ миӈава’’. Ӈамгэ’ пирхана мерця теба. Мэта ӈанова’’ тахара’’. Ит’ лямборъяна’’. Петров луцам’ пюла пяв. Пыда ӈани’ ит’ лямбормы’’. Няхар’’ юр’’ луцахав’’ ӈэвто’ тарли’’ тырцана хая’’. Си’’ми’ манэць Петровми’ си’’ми’ ня’’ма. Ит’ лямборо’’махад си’’ив яля’ мани’ хатэкарӈани’. Ӈамгэ’ пирхана ӈэвакони’ нид ӈоб’’ лаханана тарем’ маманонда: - Вэра’ ӈацекы, хора няк ӈанор ти тода. Ӈанор ня’’мад!

Малда ни’’ӈа