Маня’’ яханана харто’ ныхыриндо’ енась илевамдо’ минрена не’’ тянё ни’’ӈа’’. Тарця некоця’’ округна еркы’ маркана, округна хусувэй ӈэсыхына иле’’. Не’’, хуний хуркари серм’ пирдалесь нерняри’’ миӈа’’.

Тарця неӈэ’ мань’ Людмила Алексеевна Булыгинам’ манием’. Тикы нями’ маля ӈока по’’ ямбан теневав’. Ӈока лаханась няцьтыв’, ханяна радион’ падбасьтыв’, газетахана тюӈгсеты, теда пэрманда манзаита нямна вади’’ мэцьты’’. Тюку ирийхана Людмила Алексеевна Булыгина со’’яма яляда, юбилеемда мэ’’ӈась. Тикы яляхана ӈока сейхад’ миндя’’ вади’’ пыда намдась, ӈарка вадам’ хэтвы’’ нида’’ тянё вуни’’ӈа’’.

Округна Нюдя’ яхана соявы, Нельмин Саляхана вадювы, маркана Ненэцие’’ школа-интернатхана тоходанвы. Манзарась’ пя’’махаданда Няръяна маркана иле. Тюку маркана хаюпась’ хаясь, тюкохона сидя не нюкцяюда’ сояӈахась, вадыхысь. Теда маля нюдяюм’ не нюда округна еркы маркана манзара. Ӈаркаюмда’ Краснойхана хаюпи’, тикы ӈэсыхы’ школахана тохолкодаӈэ’ тара. Не нюхуюда ӈод’ илан’ мэёвна сыртата’, небянди’ сава тохолкова сер’’. Тикы не Людмила Алексеевна Булыгина ( харта тензда Выучейской ӈэвысь.) Маркана иленаӈэ’ пыда сита’’ ӈокаюв хибяри’’ теневадо’. Саць я’’авлада не. Пыда сита’ маниесь ихинянд’ мадан’: тюку нехова’ хуркари’’ манзаям’ пирдалесь пир’’тарха’. Ненсянда ӈод’ тарця. Людмила Алексеевна ханяна нибнанда манзара, хусувэй серт’ сававна сырта. Хуркари’’ манзаям’ ив’ ер пэрць’ торомы некоця. Ӈока по’’ ямбан горпромкомбинатхана манзарась, манзарава поӈгана институтм’ ёльцевы. Тикахад’ Саляхана семейно-родовой община нерм’ пэртяӈэ’ тарась, тамальӈгана ӈока тэхэна’’мэна’’ нида’’ нядабасьтыда’’. Тыто’ толыр’’ ӈарумдабиць. Харта’ ӈод нянэй мякана илесь, тамальӈгана хусувэй хой’ манзаям’ пэрцеты. Няръяна март’ то’’омахаданда Людмила Алексеевна ненэцие’’ театран’ сянаковась’ тось. Нянэй некоця, харта вадамда сававна теневана. Хари’’ тенз’ культурава нерня илева е’’эмня ӈарка манзаям’ сертамби. Сидя по’ тяхана Няръяна маркана «Ханебцём’» нюбета фольклорный группа ӈадимясь. Таня нянэй не’’ ма’’лэйдаць, хуний ненэцие’’ невхы сё’’ тамна тене’’, малӈэ’ харто’ хыно’’ӈа’’. «Ханебцё» сидя по’’ ямбан ӈока ныхыдамда ма’’ла’’, ненэцие’’ сёдо’ ханярина сосьты’’, хуркари’’ сценки’’ сертабасьты’’. Ӈарка манзаям’ ӈацекы’’ няюв’ сертамби’’. «Ханебцёхона» сянакода нида’’ нерня минренаӈэ’ Людмила Алексеевна Булыгина тара. Тарця манзаямда харвась’ минреда, ивнянда ӈэда’ серта ӈэдараха’.

Тюку яля’ сава теневана няхан’ тарця вади’’ мэ’’ӈадм’: Людмила Алексеевна тад’ нерня ӈод’ илевар’ саваривна миӈая, ябда иле, сензан’ ӈа’’, тарана’’ манзаямд’ тамна ӈока’’ по’’ ямбан харвась’ минред’. Нянд’, ӈарка вада’’! Ӈоб’ нерня ядванд’ яӈга мэё’’ ӈэя!