Тарця повестьм’ ӈарка паднана нява ӈока по’’ тяхана падась. Хусувэй падвэда илӈгад’ хобэй сераць. «Нярмодана хубта» падвэмда тюку по’ тамна толабаӈгура. Тюку яля’ тамна ӈопой’ пелямда толада.
Яник хабтона’’ тёрдева’’. Мэтаиняхана вакад самляӈг тым’ нисян тарпра’’махад, подеротӈго’’махад, нись пон ӈэда сяйм’ ӈэро’’махад мани’ ялянд ха’’ман’ ӈэдалэйни’. Ӈэдо’ сянакуць няватада’’ тыни’ сибицякована пенёвархандо’ маймбадараха’’, нямдсяхава, тикыд иб’’ ӈо’’ хаво’’ либрада ӈарка писяраха’’. Лабтавна няватада’’ малбуй’’ тэхэбид хэвняд маниеб’’ ӈабцато ӈод’’ тарцяраха’’ ӈэсеты’’.
– Мани’, хасавав нюв, Пэ –Яхан’ пями’, – нян сыла нисяв ма, нярмодана муноциета ӈыламна ванедэй’’, тяха’ вэтада: – Теда’’ маня;; выӈгнана’’ Пэ- Яхамд хэрабта минда сехэрэр яӈгу, нерня ӈо’’ тарця сехэрэр вуни таняӈгу’’.
– Ӈамгэ? – мань юнрадм’, хар’’н ӈани’ ниня ненэцялха хибярит – хуркари парэӈодит, королят, ид’ ерват, янд ӈылы иленит ерв’’ – мал солотхад, ненэйхад, сидеркад мивы, писавэй’ хаерат ӈылы салабадрев’ ӈадвортараха илелава хаӈгод манэтархадм’. Тарця мядот танявам’ хадан, хэ’’ли’ мякнана’’ ӈадиберта Ӈарка янд юнета вадакурта Паш Миколаянд лахарёхот мань намдсятывва.
– Теда’, хасавав нюв, хибярит и’ ӈудо маниева’ е’’эмня хусувэй хибяр грамотам’ теневаван’ харва. Маниеванд хавна тикыд харто’ индо’ ӈудо ӈод’’ хаебаванзь’ ни’’им’ ятан’’. Харт ӈод’’ мер’ школан’ хантан. Советхана нян тарем’ маць. Маньзьван грамотам’ теневававмд, «школанд», «Советанд» ӈамгэ ӈэвам’ худ мад’ теневавнын, тарем’ ӈод’’ мадм’: – Ханя, хусувэй ӈамгэн’ тоходана… ӈока ӈамгэмд тенева тара.
Тарем’ ӈабцата сюдбала Паш Миколай манзь пэрцеты. Ханзодо’’ иркан’ инзелева’ тахарув’ мань вадакохот намдвын мядот е’’эмня ибедорӈадма, тикыд теда’ мер’ мана’’мав тасламбидма, валакада тикымбохона сэр’’ сыӈгрёсьда яр вэно’’ мадӈэ марналтада. Ӈарка’’я сярктэта няӈодо’ хортабада, тикыд хусувэй лохоляӈг ха’’ал’ хэвхана мадарӈа’’, хэвхани’ ӈани’ ни’’ мий’’. Нюрте’’э мань тикыд пихийӈэ пяйнась, валакада ни’’им’ мадар’’.
Сававна манэць хэвхыдо’ ха’’алдо яв’ вархы’’ манебэ’’нибтя лаӈгхарт’’ нись ӈа’’ – пя’’ ӈэвы’’ню’’, тикыд пеляндо’ пирувна сыра тохоравыда. Сырар янда ний’ хавна харто’ лохоляӈгат ниня ӈо’’ паромдэӈэ юседаню’’, тикы паромдэт ӈылад ӈани’ няръяна пэхэт ӈамтавы’’ хэкур’’ порвы’’. Ханяӈыто’ нид тамна нибтя якэ, нибтя инд’’ моӈгъя. Пуна мань тикыт хардаӈэ нюмдебада пя мядо’’ ӈэвам’ тасладм’; тикыд валакада тенад’ ин ӈылрина мэвы хардат ирэхэ’’на сабенюдя’’ню’’.
–О! Ань дорова, Микул! Ӈани дорова! Носи, небось, нинув’ та’’? Аль тарем’… хабейманзь’ тон? – саць муноциетана, мэкадувна ембдёда пирця хибя хэвханани’ то. Ӈэванда ний ӈамгэхэвада тода лабо’’ла, нярмодана икар паркаси’’ пяйры, хэбицяко’’, тиделтана хорха’’, посабтавыраха’’ пибида ни’’ выяӈг’’, паромдэй’’ Нина тикыда саць ирна’’. Ензита ӈылна паромдэхэртад ицюмбадараха’’.
–Ти, ӈани’ тодм’ мань, Аким. Нябида пеля юд’ мян носи тадама. Ӈавар ханя тара’’ – сяй, сахар’’, юр’’,нянь. Хане мэта хамадярл, харвабта, ӈадимдакы? –вадида ханзеркава’’ вэнпа нисяв нянда ма.
