Маня’’ яханана хуркари’’ юн’’ газетахад’ толабасьтына’’, тикахад’ ӈармбэй хибярина’’ е’’эмня маля’’ сян’ по’’ ямбан журнал’ таня. Таняна ӈармбэй хибярина’’ нямна падвы материал’’ танесеты’’.

Ханзер’’ пыдо’ иле’’, ханя тэворӈа’’, хурка серу’’ тасламби’’ таняна падвэхэт’ теневасьтыва’’. Тюку поход’ яханана тамна ӈопой журнал’ танеӈгу, хуний ӈобтарем’ маня’’ газетана редакцияхана манзарана’’ сертабаӈгудо’, маня’’ хибярина таня паднаӈгу’’. «Сава юн’’» таремъюв’нюмдевы журнал’ нюртей номер’ маля ты’’ саполана ирийхана ӈадимясь. Журналкана ӈэрм’ тенз’ ненэцие’’ ила’ нямна паднавы’’ материал’’ танеӈгу’’. Похона тет’’ тарця журналм’ сертабаӈгува’’, редакторӈэ’ паднана нява Инга Артеева тара. Журналан’ паднаван’ харвабнанда падвы манзаида нянда тэврамбида’’. Тикахад ненэця’’ вадавна падвы’’ ӈод таняна танеӈгу’’. Округна хибяри’’ ила нямна паднаӈгува’’, хуркари ихиня сомбой ӈаву манэ’’лабтаӈгува’’. Тикахад’ ненэця вадам’ тохолаван’ харвана’’ вадан’ журнална’ тя Юлия Ледкова няюв’ тоходангу’’, пыда хамандавы урокда хоӈгуда’’.

Журнал’ няхар ю’’ си’’ив страницада. Рубрикида маля ӈока’’: хуркари юн’’, тикахад’ ӈани’ ян тэвормы’’ хибяри’’ ӈэдалёрмидо’ няна ваде’’та’’, хурка проект’’мана нина’’ манзара’’ тикым’ хоӈгуда’’.

«Ӈэрмний яхана» – ненэцие’’ вадавна падвы’’ толабаӈгуда’’. Таняна ӈод ваде’’тава: хурка сава сер’’ яханана таня, ӈани’’ яхад’ тэвравы’’ юн’’ ӈод таняна падбаӈгува’’. Ӈацекына е’’эмня падвы’’ манзая’’ танеӈгу’’. Нерня минда’’ ӈацекына нямна паднаӈгува’’. Мань’ енам’, тарця серкана ненэця’’ вадам’ пэртя’’ тохолкода’’ нядаӈгода’’. Тикахад’ журналкана тикада сава, ваеравы сер’’ нямна падвы’ хавна тамна ӈока’’ сидяӈг манэ’’лабтава пир’’. Газетан’ ӈока сидяӈг паклева сер’ яӈгусеты’’.

«Сава юн’’» журналва’ хусувэй няхар’’ ирийхана ӈопоймэвна ӈадиберта’’, понанда тет журналм’ сертаӈгува’’. Толырта’’ ӈока’’ ни’’ӈа – мат’’ юр’’ экземпляр’’.