Ты’’ ниць ирийна сидя ю’’ хасуюдимдей яляхана вэвко юн’ намдаваць, тикы яляхана Федосья Семеновна Кауц яӈгумам’. Ӈарка нява Няръяна маркана мэта’ ирийна маттамдэй’ толыркана сюрӈаваць.
Федосья Семеновнам’ теневана’’ хибяри’’ округханана тянё вуни’’ӈа’’. Тюку яля’ хусувэдо’ яӈгумы нянда’’ нямна харта вадамда хэтась пир’’ӈа’’. Пыда’ Нюдя яхана мюсерта’ ненэця’ мякана ты’’ сие ниць ирий’ сидя ю’’ самлязимдей яляхана ёнар’’ хасуюёнар’’ няхар’’ ю’’ си’’ивумдей похона соявысь. Нися’ хасада сайнормахана яӈгумысь. Ханяна яӈгумамда евакоӈэ’ вадюданавы’’, ӈока маям’ манэ’’мы’’ нюда’’ тенад’ ехэра’’. Нисяси’ вадювы’’ нюда’’ малӈэ’ сава хибяриӈэ’ вадыць. Федосья Семеновна тохолковамда ёльцесь,
илеванда ямбан ӈокавна манзаравы’’ не’ нисяв’ ӈа’’, илан’ мэёвна сырта некоцясь. Хурка манзаям’ нися’’ минре’’. «Выучейской» нювм’ нюбета колхозхана манзараванда мальӈгана пилибт’ хоян’ ӈэдалёрцеты. Ханзер’’ тыбэртя’’ ненэця’’ манзара’’, тыдо’ хурка ӈэвам’ сэвхана манэць’ теневадась. Ида’ хойхана мюсерта’’ нита’’ нямна пилибт’ ядэрцеты’’. Тикахад’ сидя юкад’ вата по’’ ямбан Федосья Семеновна Малоземельской сельсовет’ председательӈэ’ тарась. Тарця манзаяхана манзарась ӈока’’ хибярим’ нядавы. Харта’ ӈэсынандо’ илена’’ хибяри’’ няюв’ сававна манзарась.
Саляхана манзаямда хае’’махаданда Федосья Семеновна Няръяна маркана илесь. Нянэй не’ харта вадавнанда лаханась, ненэцие’ культурава сававна теневанась, ӈудида мэта несь. Пыда ӈудаханата сэдвы’’ манзаида ӈока’’ маркана танеда выставкахана маниесьтына’’. «Илебц» театрхана нюртей яляхад’ сянакусь. Пыда няданда ӈока’’ хынс’’ намдаваць. Нюдя яхана соявы, вадювы нява сян’’ по’’ тяхана «Ханебцём’» нюбета фольклорный группам’ ӈадимдесь, таняна Нюдя я’тер’’ нина’’ невхы сё’’ мэ’’ӈа’’.
Федосья Семеновна пуданда хаёвы’ сарпяда тыя’’ ни’’ӈа’’. Тарця лата’ сарпявна, няндо’ пявы’’ манзаям’ ӈоб нерня минресь, нида’’ ядгу’’. Ненэцие’ невхы сё’’ яханана пилибт’ соӈгу’’.
Федосья Семеновна Кауц ӈарка’’ ил’ мэ’’ӈась, илан’ мэёвна сырта хибярись. Пыда теневана’’ нита’’ ихиняна’’ пилибт’ илеӈгу’’. Тенеӈгува’’.
