Округханана тарця хибярина таня’’, хуний тюнто’ пуд ӈобкана ӈока’’ по’’ ямбан илесеты’’. Нидо’ нядабась илевамдо’ мэцьтыдо’, хусувэй серкана нидо’ нядабась’ нерня минзьты’’. Тарця хибярина поӈ гана Людмила Алексеевна, Ким Андреевич Вонгуевна нюмдеӈгудм’. Пыди’ ӈобкана маля самляӈг ю’’ по’’ ямбан илеӈаха’. Маӈгты ирий’ нертей яляхана золотой тюнямди’ мэ’’ӈаханзь. Ким Андреевич вадавна: - Илева ямбан’ хуркари’’ сер’’ танесеты’’. Саварим’ тенесь нерня илесь’ нив’ тара’’. Мани’ ӈобтарем’ тарем илени’. Хусувэй вэвко’ сер’ пуняна хаевы, нерняна яӈгоя.
Ким Андреевич Ӈарка я’ тер ненэць’, Колва няхад’ пере. Евакоӈэ’ си’’ивӈэ’ хаёсь, вадюданаць. Нида’’ нядабава е’’эмня пыда мер’’ манзарась пядась. Институтан’ тэвванда нерцю ханяна валакада нися’’ манзара’’. Няръяна маркана культпросветшколам’ ёльце’’махаданда хоян’ манзаравась’ тэввыць. Ленинградхад’ то’’омахаданда тянембёвна Амдермахана тохолкодаӈэ’ манзаравысь, тикахад’ Хорей -Веран’ тэвыць. Няхар’’ ю’’ няхар’’ по’’ ямбан Хорей Веркана илеӈаханзь, тохолкодаӈэ’ манзараӈаханзь. Ким Андреевич школандо’ ервотаӈэ’ няхар’’яӈганя по’’ ямбан тарась. Тикахад’ Хорейверский Совет председательӈэ’ манзарась. Харта ӈэсынанда илена’’ хибярита е’’эмня сертавэда тянё вани’’ӈа’’. Хусувэй сертавэда таняна илена’’ хибяри’’ ихиня иле.
Неда Людмила Алексеевна Якутия’ няна соявы, Олёкминский район’ тикы яхана таня. Тяням’ нюбета нюдякоця ӈэсыкоцяхана вадёвысь. Школанда’ пуд ӈацембой пирибтяко тохолкодаӈэ’ тоходанвась ӈарка март’ еримясь. Таняна пыда’ сита Кима Андреевич тикаминда сэвтевэдась. Няхар’’ по’’ ваерась тюн’ сертаӈаханзь’. По’’ мер’’ ваера’’. Самляӈг ю’’ хаи’’. Таӈок по’’ ямбан илевахананди’ ӈамгэ нися’’ таня’’. Тарем’ ӈод нянди’ сырць, сидди’ маниесь нин манд’ - тоенана сер’’ илевахананди’ таневакы?! Пыди’ таӈок по’’ ямбан ниди’ нядабась ӈопой сярпявна ядӈаха’, ниди’ мэнесь илеӈаха’. Хибярихина ӈод илеванди ямбан саваха’ ӈэсьтыхы’. Вэвко вадам’ мэ’’мади’ яӈгусь. Хибяри маха’ тяхад вэвко сер’ сертавэди’ яӈгува. Иди’ сомбой хибярихи’. Теда пыди’ маля ӈахакуд’’ Нярьяна маркана илеӈаха’. Поди’ тянё вани’’ӈа’’, тарем’ ӈод ӈопой яхана нисьтыхы’ хасена. Хусувэй маркана танеда мероприятияхана сидди’ маниесьтыва’’. Людмила Алексеевна «Илебц» театрхана сянакусь, «Ханебцёхона» хыно’’ӈась. Ким Андреевич паднава серм’ минре, пыда’ округна историям’ тохолаби, паӈгута нямна падарм’ падби. Сава ихиня гармошкахана сянакосьты.
Пыди’ ӈобкана ханяримна ӈэдалёрцетыхы’. Ким Андреевич ненда со’’яма ян’ харвась’ тэворцеты. Хусувэй сидя по’ таняюв’ ядэрцетыхы’. Ненда перена тенад’ харто’ ӈэсыхынандо’ иле’’, манзара’’. Харта ямда Людмила Алексеевна нида юрбю. Тарем ӈэбнанда нив’ тара’’.
Не нюди Коткино ӈэсыхына маля’ понку тохолкодаӈэ’ манзара, не нюнди’ не нюкця ӈобтарем’ тохолкодаӈэ’ Архангельск’ маркана тоходана. Поӈгнандо’ сававна иле’’, нидо’ хусувэй серкана нядабидо’, мядоманзь’ няхато’ тэворцеты’’. Тарем’ нерняна илеваханандо’ ӈод ӈэя’’. Ким Андреевич, Людмила Алексеевна хынёси’, ябда тамна пон’ илеяха’!
