Маня’’ яханана манзарана’’ депутатна хуркари’’ тарана закон’’ округханана илена’’ хибярина е’’эмня ня’’амарпи’’. Толырто’ тянё ненэцие’’ няюв таславы’’ закон’’ ӈод таня.

Тикы я’ серо’ тасламбава нямна, яханана ты’’ ялям мэ’’ма е’’эмня, тикахад’ ненэця’’ вада нямна падвы, община’’ серу’’минрева нямна ӈэда, тамна ӈани’’ танеда’’ закон’’. Тикахад’ округна харта’ Вато’ Мэбц падарта таня – луца’’ вадавна хэтась: Устав Ненецкого автономного округа. Ненэця’’ вада закон’ ватовна мал’’ тарця падар’’ ненэцие’’ вадан’ сертась таралмысь. Тарця манзаям’ сертабава е’’эмня харто’ вадамдо’ теневана’’ хибяри’’ ма’’лаць.

Округна Вато’ Мэбц, ненэця’’ илан’ таславы’’ закон’’ ненэцие’’ вадан’ пэртя группа’ яханана ирий’ тяхана манзарась’ пядась. Тарця серм’ сертамбава е’’эмня есям’ округна администрация ӈэрм’ тенз ненэцие’’ серо тасламбада управление’ ховысь. Пыдо’ ӈод тарця серкана теда манзара’’.

Округна закон’’, Вато’ Мэбц ненэцие’’ вадан’ падбава серкана манзараван’ харвана’’ хибяри’’ ӈули’’ нерде сид’’на’’ ма’’лабнандо’ ӈокархаць. Тикахад’ янамбовна ханяӈы’’ харто’ сер’’манандо’ хэвня хая.

Теда тарця манзаяхана манзара: Р.И.Канюкова, Ф.С.Кауц, М.М.Тайбарей, С.В.Тайбарей, С.П.Дуркина, М.И.Талеева, Т.Ю.Давыдова, мань’ ӈод нядагудм’. Сян’’ яля’’ ваерась саць тоенана’’ манзаина сертавы’’ ӈэӈгу’’, тикахад’ округна нормативно-правовй акт’’, Устав ненэцие’’ вадавна сертавы сборникӈэ’ ӈадимда’’.