Пой ӈутокана хыбяхарт яӈгу. Тад хано’’малан’ тэвыв’’. Лыӈгарёвы хасава санэй’’, мэта инями ня’’мада. Тадахава ханав мер’ сярада. Си’’ми сёбяцяхадан ня’’ма. Хананда няна нюдерць хана. Наронда ӈылад сябарць тыбкамда тюхалӈа. Ӈэвав сапада, пыя’ вэч пирахарт ни’ ха’’м’’. Ӈэвав сапасетыда, ӈобтикы яханда ӈани’ ӈомзеты’’. Пэвсюмя’ ямбан’ си’’ми сапапи. Нё’ си’ няна си’’ми хана. Пи’ ямбан’, няхар’’ яля’ ямбан’ си’’ми сапапи. Няхар’’ яля’ ӈэсоӈгана мят’ тёрэй’’: – Не’’, падыда’’ тада’’! Пады’ ед’ сапатав.

Не падэмда нюдерӈа, не ма’’нив’: -Хабтаркаця тэта’ ню, ӈамгэт сер’’ ӈэсеты’’да’’? Ӈаха’’нава – даӈгурась, хэӈгар ӈэись.

Не падэмда мода, ма’’нив’: – Манав’ хадабцур. Нир хадаӈгу’’, хэвдэт ниня сахаӈгава’ тараӈгу.

Пады’’ ед’ си’’ми сапа. Ив ёховы. Тад ив то, ся’’ны ху’’ны хавэм’ ӈэвэм’ сиди’’манан ӈумзеко’’ соявы’’, ӈамдэд’’ вадёвы’’. Хурка ӈамгэхэрт едяда ни со’’. Юркыв’’, я’ хамболон’ сидя хэван хури’ пэръян.

Месури’ ялъяв’’. Ся’’ны хуны сояравы неда ни ӈадю’’. Панын нини тимы’’. Тецьдар теци, няӈуён тоярӈа’’. Ӈэрёй’’ ӈэвы’’. Ямб ӈувоци сидя хэвувнан сярсетым’. Тарем’ ядэртахани сыраӈэ хая. Сыра’ ямбан’ ядэрӈам’. Ханяӈэхэна сыра’ ӈыл’ сы’’ӈатасетым’. Тарем’ ядэртахани нарэйӈэ хая. Таӈомава. Таӈэ хэмя’’вахад ханику, писяку ӈамзь пэръян. Танда ӈани’ ваера, ӈани’ тецяхама. Сидя хэвувнан ӈумзеко сярсетым’.

Ӈавэ’’ пирка’’на ӈани’ ӈарка мя’’ ӈадимя. Ӈамгэри мя’’ ӈэя, нена’ ханьтам’. Тикы мят’ хаям’. Мят’ тэвыв’’. Хасава ма’’нив’: -Манзаяв товыню’’.

Тыбкамда ня’’манё’’. Си’’ев паӈг’ ед’ сапа. Ӈани’ пи’ ямбан’ сапторӈа. Ӈудада есьмя. Хабтарка тэта’’ ню пыда тарем’ ма: – Не, падэр та’’.

Не тэдорӈа, ма’’нив’: – Ӈамгэт сер’’ ӈэсеты’’. Нюдякоця ӈацекэцям’ вадавэр ӈэбат ӈаха’’на хэӈгар ӈэӈгусь.

Не мят’ тю. Нёмда лакадта. Хабтаркаця тэта’’ ню си’’ми ӈани’ паӈг’ ед’ сапа. Сэва’’ ӈадимб’’ сыра’ ӈылана хаевэм’. Сыра’ ӈылад ти юркыв’’. Тм харасяда ян’ ялъяв’’. Сидя ӈарвэреми нёраку’’лам’. Няхар’’ по’ ядэрӈам. Няхар’’ по’ ӈэсоӈгана яв’ варан’ тэвыв’’. Яв’ варан’ тэв’’махадан яв’ маравна ядам’. Яв’ ся’’ӈэ хая. Сяд’ ни’ танэйв’’, сяд’ нимня ядам’. Наӈэдя иры’ ядам’. Иры’ ӈэсоӈгана пи ходм’.

Сюре’’леян. Мюнянда ты’ тивак’’ ӈади’’. Пя’ мю’ пакалъяв’’. Нидани си’’ми пя юталӈа. Юрка я’’мыв’’. Пя’ мюня таня ютлым’. Сырпа’’ни нарэйӈэ хая. Ӈайӈэ хая, варёко’’ ӈадимя’’. Ӈэдалёда то. Сидя хабтаркада ӈалеко’’ ӈаленд’’. Пям’ манэсарӈада. Хасава ма’’нив’: – Хусей нохо, нюдав еремы.

Си’’ми тюхулӈа. Ӈуда’ хара’ ниня си’’ми’ хананда ни’ ила. Тадхава тикы хасавар сидя хабтарканда иням’ нэкалӈа. Тарем’ мидяханда сидя варё’ пан’’ ӈобт’ вэталъяд’’. Нерни’ няна сидя ӈарка мя’’. Тикы мяк’ ня’ тэвыни’. Няби мяд’ нё’ сивна хая. Ӈуда’ хара’ ниня ханамда ӈэдавдавэй’ си’’ми мят’ тюле.

Пыда тарем’ ма: – Пухуцёв’’, нюдамд тамэй’. Пухуця, тур пята’’.

Пухуця тумда пятада…

Малда тамна ни’’ӈа.